ژن مارەبڕینمان
Jump to navigation
Jump to search
| جا بێمە سەر باس ژن مارە بڕین | نەک مارە بڕین بە پارە کڕین |
| جاران ڕەسم بوو ژن بە خۆڕایی | شەرعەن حەرام بوو پارەی شیربایی |
| ئێستە خوا دەوام مامۆستا بدا | فێڵ ئەدۆزێتۆ حەڵاڵی ئەکا |
| لەسەر شیربایی مارە ئەبەستێ | حەڵاڵی ئەکا و هیچ لێی ناوەستێ |
| ژنی بێ باوک بە بێ برایە | حەقداری تەنیا یەک ئامۆزایە |
| کە یەکێ هاتوو داواکری بوو | سا بەهەر جۆرێی خڕیداری بوو |
| ئامۆزا ئەڵێ خۆ من حەقدارم | مەسەلی مەشور بەشە بەشدارم |
| پازدە دینارم ئەوێ شیربایی | خۆ من شێت نەبووم هەر بە خۆڕایی |
| کچ ئەڵێ بەخوا پارە ناگرم | شوو بەمە ناکەم چون من چاترم |
| بەڵێ ئامۆزا ڕاستە حەقدارە | هەر خۆی حیسابە گەورە و سەردارە |
| ئەمما بەو شەرتە نەمدا بەم کابرا | ئەوم قەبووڵە لەباتی برا |
| ئەم پیاومە ناوێ هەرسات لە جێیێ | سەرسەری و بێ ماڵ هەر تاو لە دێیێ |
| ئەمجارە کابرا کە جواب کرا | پەنا ئەباتە بەر خزم و برا |
| پارە قەرز ئەکا بە سوود و سەلەم | پازدە دینارێ بەبێ زیاد و کەم |
| وەختێ ئامۆزا پارە ئەبینێ | ڕەحم و ئینسافی لەلا نامێنێ |
| ئەڵێ مامۆسا مارەی ببڕە | با دابمەزرێ ئەم دەڵە شڕە |
| ئەمجا کچ ئەڵێ بەخوا شوو ناکەم | خۆم ئەخنکێنم قەت ئیزن نادەم |
| ئامۆزام حەقی بەسەرمۆ نییە | نانیم نەخواردوە حەقداری چییە؟ |
| ئامۆزا ئەڵێ بێ حەیای ماکەر | چۆن ئیزن نادەی ڕۆحت دێنمە دەر |
| دەس ئەداتە دار پڕی ئەداتێ | ئەیگرن نایەڵن دەستی بیگاتێ |
| ئەمجا کچ ئەچێ بۆ دراوسێ ماڵ | خۆی ئەشارێتۆ بەسەد هەزار حاڵ |
| چرا هەڵ ئەکا ئەیدۆزێتەوە | بەقژ ئەیکێشێ ئەیهێنێتەوە |
| خەنجەر دەردێنێ فیشەک تێ ئەخا | بە لوولە تفەنگ جار جار لێی ئەدا |
| بە زەجر و بەداخ بە خەنجەر لێدان | ئەیکێشێ هەتا دێنێتە مەیدان |
| ئەڵێ مامۆسا سا، خێراکە دێرە | من ئیشم زۆرە نامێنم لێرە |
| کچ هاوار ئەکا ئەڵێ کاک مەلا | پەنام بۆ هانیت ئەی مەردی خوا |
| مەیەڵە بمدا بەم کابرا کەرە | لە عەقڵ و زانین زۆر بێ خەبەرە |
| مەلا دێتە جواب دادە زۆر چاکە | پیاوێکی کاسب زۆر تینەت پاکە |
| تمەس مامۆسا زۆر بە کوڵە بۆی | پەلە پەلیەتی بۆ حەقەکەی خۆی |
| کچی بێچارە دێتە گوفتوگۆ | ئەڵێت هەی هاوار هەی هانا هەی ڕۆ |
| نەمکردوە و نایکەم ئەگەر لەت لەت بم | یاخۆ باڵ بەستەی گوریس و پەت بم |
| ئامۆزا دیسان مشت ڕائەکێشێ | لەکەس ناترسێ هیچ نای ئەندیشێ |
| فیشەک گولەکۆڵ ئەنێتە تفەنگ | مشتی بۆ ئەگرێ بێ سەدا و بێ دەنگ |
| ژن ئەقیژێنێ ئەڵێ هەی مەلا | فریام بکەوە بۆ خاتر ئەڵڵا |
| مارەم ببڕی منەت بە گیانم | زۆر زۆر مەمنوونم بەندە فەرمانم |
| مارەی ئەبڕێ ئەمجار مامۆسا | بێ ئیجازەی شەرع بێ ئیزنی خوا |
| مەلا دەک کوێر بی بۆ زهد و ورعت | دەک پشتت شکێ بۆ ئیجرای شەرعت |
| کەی باوک و باپیر هەروا زووبەزوو | دروستە بە زۆر کچ بدا بە شوو |
| ئەمە کەی دینە و کام ئیمام فەرمووی | پووکاوڵت بێ خۆ تۆ ڕیش چەرمووی |
| زۆر تماعکار بی سێ ڕووپیە ئەبەی | بۆ پارەیێ کەم بۆچی وا ئەکەی |
| ئەوا ئامۆزا وەحشیە و کەرە | مەلا دانیشتووی جێی پێغەمبەرە |
| میللەت تا بەکەی جەهل و نەفامن | میللەت تابەکەی شێت و عەوامن |
| میللەت هەموو کەس گەییە جێی مەردی | ئەی تۆ کێ ئاوا لە ڕێگەی بردی |
| میللەت قانعی خوشکی نەماوە | خەمی تۆ ئەخوا ئەم بەند و باوە |
This work is first published in Iraq and is now in the public domain because its copyright protection has expired by virtue of the Law No. 3 of 1971 on Copyright, amended 2004 by Order No. 83, Amendment to the Copyright Law. The work meets one of the following criteria:
- It is an anonymous work or pseudonymous work and 50 years have passed since the year of its publication
- It is a work where the copyright holder is a legal entity or a work of applied art and 50 years have passed since the year of its publication
- It is a photographic or cinematic work that is not compositive (artistic in nature) first published before 1 January 1999
- It is work published in Iraq before 1 January 1954, and the author died before 1 January 1979
- It is another kind of work, and 50 years have passed since the year of death of the author (or last-surviving author)
- It is one of "collections of official documents, such as texts of international laws, regulations and agreements, judicial judgements and various official documents."
- It is the work of a body corporate, public or private, published by January 1st, 1980 (Article 20, 1971 law).
Public domainPublic domainfalsefalse