چیرۆکی پشیلە و مشک
Jump to navigation
Jump to search
| ڕۆژێ گوربەیەک پڕ خەت و خاڵێ | هەڵتروشکابوو لە گۆشەی ماڵێ |
| تۆزێ ئارەزووی خواردنی ئەکرد | هەرچی ئەبینی لووتی بۆ ئەبرد |
| لووت بۆ تەشتە نان، بۆ تیکە نانێ | دەم بۆ ناو چڵکاو لە بۆ ئێسقانێ |
| ڕووەو کەیبانوو جار جار ئەیماوان | لە ڕووی کەیبانوو ئیخلاسی ئەنوان |
| خۆی هەڵ ئەساوی لە شانی مناڵ | پیاوی بۆ ئەبوو بە کۆگای زوخاڵ |
| زۆر بە هەژاری خۆی نیشان ئەدا | ئەتوت. سۆفییە و عیبادەت ئەکا |
| گا خۆی ئەشاردۆ کە کەس نەزانێ | گاگا ڕائەکشا بەقەد مژانێ |
| تاوێ لە هەیوان، تاو تاوێ لە ژوور | ئەسووڕایەوە خەیلێ بە زەروور |
| لە تاو برسیەتی، زکری یامەتین | کردبووی بە وێرد، بە دڵەی غەمگین |
| ئیقراری ئەکرد کە گوناحکارم | بۆیە وا لات و برسی و هەژارم |
| شەرتە ئێستاولا، نوێژ نەفەوتێنم | ڕۆژوو قەت نەخۆم هەتا بمێنم |
| لە نوێژ و ڕۆژوو، لە ئەدای زەکات | لە حەج و عەمرە، یا لە حەسەنات |
| گەر من بە دڵ پاک ڕوو کەمە خوا | خوداش بەچاکی ڕزقی من ئەدا |
| چەن هەزار وەک من دەستیدا ئیرشاد | بۆخۆی خۆش ئەژی بە مەیل و مراد |
| خەلیفە ئەگرم لە ناو مشکانا | لە ناو دەسە برا و دەستە خوشکانا |
| مشکێ گوێی لێ بوو، لەم قسە و باسە | زوو باوەڕی کرد کە ئەمە ڕاسە |
| هات کە زیارەتی دەستەکانی کا | تاکوو پاشەڕۆژ بۆ بەهەشتی با |
| کاتێ پشیلە، مشکی چاو پێکەوت | لە خۆشی مشکە دڵی نەئەسرەوت |
| مشکە کڕنووشی گەورەیی بۆ برد | لە پێش دەم گوربە، خاکەکەی ماچ کرد |
| وتی: ئەسسلام، شێخی خاوەن وەرع! | عولەمای عالم شارەزای ڕێی شەرع! |
| سەد شوکری خوا، خاوەن ئیمانی | تۆ پشت و پەنای گوناهکارانی |
| منیش وا هاتم خۆم خستە پەنات | بۆیە کە هاتووم، تۆبە بکەم لات |
| پشیلە ڕوانی کە نیوەشەوە | هیچ دەس ناکەوێ و مشکەش قەڵەوە |
| وتی: سۆفی مشک بێ ئاو و نانم | شێخیم بۆ ناکرێ، زۆر پەشیمانم |
| خانەقام کوانێ؟ تەکیەم لە کوێ بوو؟ | بۆ مەلا لە کوێ بێمە هات و چوو؟ |
| بۆ من واچاکە بە ڕاو و بیرم | بچمە سەر ڕەوشت باو و باپیرم |
| شەو گەر ماڵەوماڵ بۆ مشک گرتن | زۆر زۆر چاکترە لە تۆبە کردن |
| مشکە کە زانی چاک لێی قەوماوە | عومری شیرینی تەواو فەوتاوە |
| وتی: ئاغای خۆم خاوەن دیوەخان! | شێری کوڕی شێر، خاوەن سفرە و خوان |
| ژێر دیوەخانت، زیندان و کۆتە | بکوژ و ببڕ، قابل بە خۆتە |
| جەریمەی مسکێن، بێگاری هەژار | خوا بۆ تۆی دانا لە ڕووی ڕۆژگار |
| زەوی دێمەکار، بە نیوەکاری | زیادە لەمیشە ڕۆنی دیاری |
| ئەوەش بەر ئاوە بە فتوای مەلا | سێ بەشی بۆتۆ و بەشێ بۆ فەلا |
| فەلای قوڕبەسەر خەلەی بۆچییە؟ | خۆ دیوەخان و چێشتخانەی نییە |
| وەڵامی پشیلە: | |
| وتی بە مشکە: نامخڵەتێنی | بە تاریف کردن ملم بشکێنی |
| تیکەیی چەوری لەم نیوە شەوە | کەوتوویتە دەستم لەم وەختی خەوە |
| لە زووۆ چاوەڕوان بۆ شوێن و جێتم | گەر بەرت بدەم، دیارە کە شێتم |
| بۆیەکا، خوا چنگی پێ داوم | ئێوەی پێ بگرم، هەتاکوو ماوم |
| خودا پێی داوم دانی درێژم | کە خوێن هەژاری وەک تۆ بڕێژم |
| گەر دەستم بڕوا، سەد هەزار وەک تۆ | لەبەر خاتر خۆم، ئەکەم ڕەنجەڕۆ |
| وەڵامی مشک: | |
| شازادەی چنگ تیژ، ئەمە بزانە | کە یەزدان گەورەی ئەرز و ئاسمانە |
| کەی خودا فەرموویە هەرکەس دەستی ڕۆی | هەژاران بکوژێ، لەبەر سوودی خۆی؟ |
| لەناو قورحانا لە دووسەد لاوە | نەحلەت لە ناو چاو زاڵم کراوە |
| زاڵم و شەیتان هەردوو مەلعوونن | ڕۆژی قیامەت هەردوو زەبونن |
| تۆ ئەگەر دڕکێ بچێ بە پێتا | بێ ئارام نابی لە ناوی جێتا؟ |
| ئەگەر تۆ تۆزێ سەرت بێتە ئێش | هاوار نانێری بۆ بێگانە و خوێش؟ |
| بزانە منیش کەوا گیاندارم | لە ژین حەز ئەکەم، لە مەرگ بێزارم |
| هیچ وەخت مەنازە بە شان و باڵوو | کاتێ بزانە دنیات لە دەس چوو؟ |
| بیر بکەرەوە لە حاڵی هیتلەر | لە خوێن مژین و لە جەوری قەیسەر |
| «لیوسی شازدە» چەندە خوێنخۆر بوو | تەماشا ئەکەی، بە چ دەردێ چوو؟ |
| شازادە گوربە دنیا هەر وایە | هەر وەک شریتی سینەما وایە |
| زۆر زۆر خوێنمژ بی، هەر وەکوو زوحاک | کاوەیەک ئەبێ بتنێتە ژێر خاک |
| بە ماڵی دنیا هەرگیز مەنازە | گشت تەواو ئەبێ چ کۆن، چ تازە |
| زۆر دەوڵەمەند بی ئەبی بە «عەدەس» | هەموو ڕەنجەکەت ئەچێ بە عەبەس |
| باخێ داگیر کەی لە یەکێ وەک من | سەد هەزار وەک من ئەبێ بە دوژمن |
| جۆگەی «دەڵێن» و «ماڵوان» و «تەیناڵ» | نامێنێ بۆ تۆ، هەتا هەزار ساڵ |
| تۆ سەری باوکت، مسکینی هەژار | جوێنی پێ مەدە و مەیبەرە بێگار |
| خوسنی مێژوو مەهێنە سەر خۆت | گێتی هەتا سەر هەر نامێنێ بۆت |
| کوڕ چیت بۆ ئەکا لە پاش مردنت؟ | تۆزێ بفامە، دەستت بە گونت |
| وەڵامی پشیلە: | |
| مشکی تەرەس باب! تۆزێ بفامە | شەئنی ئاغایی یەکجار گرانە |
| هەتا ئیستعمار ببێ لە مەیدان | ئاغا هەر ئاغاس، وەک جاری جاران |
| ئێوە و جووجەڵە و چۆلەکەی پاسار | بۆی حەڵاڵ کردووم، کاکی ئیستعمار |
This work is first published in Iraq and is now in the public domain because its copyright protection has expired by virtue of the Law No. 3 of 1971 on Copyright, amended 2004 by Order No. 83, Amendment to the Copyright Law. The work meets one of the following criteria:
- It is an anonymous work or pseudonymous work and 50 years have passed since the year of its publication
- It is a work where the copyright holder is a legal entity or a work of applied art and 50 years have passed since the year of its publication
- It is a photographic or cinematic work that is not compositive (artistic in nature) first published before 1 January 1999
- It is work published in Iraq before 1 January 1954, and the author died before 1 January 1979
- It is another kind of work, and 50 years have passed since the year of death of the author (or last-surviving author)
- It is one of "collections of official documents, such as texts of international laws, regulations and agreements, judicial judgements and various official documents."
- It is the work of a body corporate, public or private, published by January 1st, 1980 (Article 20, 1971 law).
Public domainPublic domainfalsefalse