چناق قلعه ماصالى

From Wikisource
Jump to navigation Jump to search

چناق قلعه ماصالى
by ناظم حكمت

چناق قلعه ماصالى


هلال شونى نقل ايدر هر كوكه چيقيشنده:
بوندن ييللرجه اوّل استانبولك ديشنده
اوچ دكيزى سير ايدن بر اسكى قلعه واردى؛
ايچنده پك مبارك بر اوليا ياتاردى.
يالچين ديوارلرينى آيدينلاتيركن غروب
اوزاقدن باقيلنجه بو قلعه باغداش قوروب
تپه لره اوتوران بر ديوى آنديريردى،
اك جسور يوركلرده قورقو اويانديريردى.
نور اينركن سمادن قارانلق مازغاللره
يشيل صاريقلى بر پير بورونرك آللره
كوكسنده بر آى ييلديز هر كيجه ذكر ايدردى
بوراسى مقدّسدر، كمسه كيره مز! ديردى.
ولينك قدرتنه اينانميان دورت چاپقين
بو قلعه يه ايتديلر كوله لريله آقين.
صانكه بر آن ايچنده چالقالندى بر دكيز
ايچدن كلن بر دعا دولاشدى دهليز دهليز
كوستر بو كافرلره قدرتكى يا ربى!
بردن بره ييقيلدى قلعه داغ كوچر كبى
دورت چاپقين كوله لرله طاشلر آلتنده قالدى.
قارانلقلر بوشلقده صاللانارق آلچالدى!
او كيجه اوليانك روحى اوچدى اللّهه!
هيچ كمسه ياقلاشمادى بو قلعه يه بر دها...

ناظم حكمت