چراغم بی ڕام
Jump to navigation
Jump to search
| چراغم بی ڕام، چراغم بی ڕام | فەڵەک بێمەیلەن، باوانت بی ڕام |
| تۆ «لەیل» قەدیم من «قەیس» ئەییام | چون مەبۆ حاسڵ عومرم وا بە کام |
| ئەر وە سەر ڕازین سەر نە پاشانم | گیان وە سەر توفەیل خاک ڕاشانم |
| ئەر ماڵ مەسۆزان من بێ ماڵەنان | مەجنوون موفلس خەم خەیاڵەنان |
| غەیر جەسەودای عەشق دین تۆ دیدەم | ڕابەر نیم وە هیچ ئەی بەرگوزیدەم |
| ئەر وەلای حاکم داد وێم بەروون | داد و بێداد جە دەست باوانت کەروون |
| تەرسوون حەکایەت «نەوفەل» بدۆ سەر | تۆ شاد وە باوان من هەر دەربەدەر |
| ئەرنا گاڕۆێی نە کۆچ خێڵدا | وێڵبای وە ماوای مەجنوون وێڵدا |
| هۆردارووت بە ڕووت بەو جامازەوە | بەو جاماز خاس پڕ جیازەوە |
| مەترسوون کە نام نیکیت نەنگ بۆ | جەو بابەت زووان با بۆت لەنگ بۆ |
| قەوم و قەبیلەت گشت بەدنام مەبۆ | من جەوان بەتەر ڕیسوای عام مەبۆ |
| ئەر سەد بێماڵم بێپارە و بێپووڵ | من یانە هیچ کام نەدارۆ قەبووڵ |
| هەر تا زندەنان جە ڕووی سەر بیسات | دایم وە مەیلت مەکەرۆ قنیات |
| خۆفم هەن جە جەور چەرخ بێ ڕامی | پەیدا بۆ پەرێت «ابن سلام»ی |
| ئەوسا دوبارە زامم خەتەر بۆ | ئی داخیچ وە بان داخان تەر بۆ |
This work was published before January 1, 1929, and is in the public domain worldwide because the author died at least 100 years ago.
Public domainPublic domainfalsefalse