| شوکری خوا کە پەردەیی میحنەت دڕایەوە
|
پەترۆی برینی عاشقی شەیدا کولایەوە
|
| دووبارە جەژنە ئاگری عوشرەت کرایەوە
|
بولبول بە جەندە دێت و دەلێ «دەی» بڕایەوە
|
| شاخی درەختی عومرە شکۆفەی ژیایەوە
|
| جۆش و خرۆشی هەورە کە وا هاتە زار و شین
|
نەعرەی سەدایی بەرقە ئەنرکێنێ ئەو بەقین
|
| سەیرانی سەیرە گولاڵە بە دوو چاوی پڕ نمین
|
تەقلیدی دیدەکانی منی کردووە زەمین
|
| هەر کوێرەشیوە کە چەشمەیی تێدا ژیایەوە
|
| سوڵتانی بەفری شاخە پەرێشان و ماتەمە
|
ئۆردووی سەهۆڵ و زوقمە کلیلەی هەموو خەمە
|
| ڕۆژی نەجاتی وەحشیی و سەیرانی ئادەمە
|
نەورۆزە، جەژنە، بۆیە چراخانی عالەمە
|
| یا ئاگرە لە عومری «شتا» چوو کوژایەوە
|
| دارانی لانزارە هەموو هاتنە زمان
|
کێکف بە سۆز و سازەوە. بانگ ئەکا لە ئەرخەوان
|
| بڕوانە سووچی باخ و لە سروەی بەری بەیان
|
عەرعەر لە لەنجەدایە، لە ڕەقسایە سەروەکان
|
| بەرگی چەمەن لە ڕەنگی زوموڕڕەد کرایەوە
|
| نرکەوگوڕەی شەماڵە کە هات چەشنی شێری نەر
|
چووزەی بنی درەختە لە دوژمن کە کەوتە گەڕ
|
| کوڕ ناخەڵەف نەبوو کە نەترسا لە شۆڕ و شەڕ
|
خەیرولخەلەف نیهالی لە جێدایە سەوز و تەڕ
|
| دارێ بە بەفر و بادی زمستان شکایەوە
|
| ئازیزە بانگ ئەکا بە سەدایێکی نەرمەوە
|
بڕوانە بۆ جنوور لە شاخا بە سەرمەوە
|
| بەم پەستیەش ببینە گرەوی لێ ببەرمەوە
|
گوڵ دەستی یاسەمینی لە ملدا بە شەرمەوە
|
| فەرمووی زەمانی بولبولە با بێتە کایەوە
|
| ئەییامی تۆڵەسەندنی سوڵتانی نەوبەهارییە
|
ئەم ڕۆژە ڕۆژی مێوە کە زنجیری دار بییە
|
| کوانێ وەنەوشە لە کوێدایە دیار نییە؟
|
وا تێدەگەم لە بەزمی چەمەندا چرا چییە
|
| لالە کەرۆنی شەونمی کردە چرایەوە
|
| تەرسا میسالە یارۆ کە زەننارەکە زولفییە
|
کۆگای گەنجە ڕوومەتی ڕەشمارەکە زولفییە
|
| حەڵقەی تەنافی گەردنی دڵدارەکە زوڵفییە
|
بۆ گەردنی عوششاق هەمیشە بەهارە کە زولفییە
|
| عوقدەی سیاهی دەمی ڕیاحین کرایەوە
|
| ئەم بۆنە بۆنی یارە ئەگەر بۆنی گوڵ نەبێ
|
ئەو تاجە تاجی شایە شکۆفەی لە چل نەبێ
|
| ئەم خاک و خۆڵە پاکی عەبیرە سمل نەبێ
|
قەترانی تێ تکاوە ئەگەر داخی دڵ نەبێ
|
| یا سورمەیە بە دیدەیی نەرگس کشایەوە
|
| شەوبۆ و سوور هەڵاڵە ئیشارە لە یەک ئەکەن
|
سەرو و چنار و پەڵکە کە سوجدە لە یەک ئەبەن
|
| ئەمڕۆ لە لالەزاری سەفادایە یاسەمەن
|
هەنگامی وەسڵە شەسپەڕ و مینا بە یەک ئەگەن
|
| پەردەی زەفافە قەوس و قەزەح ڕاکشایەوە
|
| بڕوانە چاوی هەور کە جۆش و خرۆشی کرد
|
دارانی سەرکڵاوە هەموو سەوزەپۆشی کرد
|
| گەنجی چیا بەجارێ گولاڵەی لە کۆشی کرد
|
لیمۆ قەدەح لە چاوی تورنجە کە نۆشی کرد
|
| بەدمەست و سەرکەشە بەشی نەرگس نەمایەوە
|
| ئاخر نەفەسیە کلیلە کە تەرکی کەلام ئەکا
|
زستانی ساردە ویداعی لە خاس و لە عام ئەکا
|
| نۆبەی بەهارە براکەم حوکمی خۆی بە کام ئەکا
|
گەردنکەچە وەنەوشە لە زەنبەق سەلام ئەکا .
|
| نیلۆفەڕە بە قەهقەهە لێوی کرایەوە
|
| کاتێ کە هەور گرتی سەراسەر هەموو زەویی
|
تاڵانی بەفری کرد چ لە بەرزی، چ نێو نەویی
|
| سوور هەلڵگڕا گوڵاڵە لە شادی کە تێگەیی
|
بووکانە ئەرخەوانە لە تارایی پەمبەیی
|
| خوێنی دڵی بە خەمزەیی شیرین تکایەوە
|
| ئەو خاتەمی نگینە کە سەنرا لە ئەهرەمەن
|
دووبارە کەوتە دەستی سولەیمانی یاسەمەن
|
| ساڕێژی کرد برینی بە بای شەماڵ دارەبەن
|
چەترێکی بێ بەرە کە درەختانی نارەوەن
|
| خێوەت کە دووبەرە نییە سێبەر بە لایەوە
|
| ئاهووی مێرغوزارە لەسەر بەزمی هاتوچوو
|
هەردەم لەگەڵ گەوزەن و کەڵ و گۆر ڕووبەڕوو
|
| پۆپەی گڵووک ئەخۆن بە مەرام و ئارەزوو
|
گریەی عینەب بە باوەشی بادامەوە وەکوو
|
| تفڵێکی شیرەخۆرە بە بەر مەمکی دایەوە
|
| سۆفی بە خۆت و ڕیشەوە خۆت لادە مەگرە ڕێ
|
بڕوانە بەزم و شۆر و سەفایە لە شار و دێ
|
| تۆش وێردی خۆت بگۆڕە وەرە سەرباسی میم و یێ
|
هەر عەتری بیدمشکە نەسیمی سەحەر کە دێ
|
| نەی دێتە ڕەقس و لەنجە ئەخاتە کایەوە
|
| جەننەتشکێنە کاکە هەموو کێو و دەشت و دەر
|
حووری نگینە برا نازی یاری سیمبەر
|
| تەئسیر ئەکاتە ڕۆح و ئەبرژێ هەموو جگەر
|
خوێنی ئەوەندە گەرمە گوڵی ئاتەشی سەحەر
|
| لوئلویی شەونمی لە مەزاقا توایەوە
|
| ئامادەیی گرتنی داوێنی یارە دڕکەزی
|
گەنجێکی چواردە سال و تەڕ و تازەیە کەچی
|
| سەردانەواوی سەلامە کە وەختێ چناری دی
|
پەستی مرادی حیکمەتە باڵای شۆڕەبی
|
| وەرنە جوانە قامەتی بۆچی چەمایەوە
|
| بڕوانە کێو و کەژ هەموو گوڵزارە دامەنی
|
خونچە بە شۆری بولبولی مشتاقە پێکەنی
|
| هێلانەدۆزە پچڕ و ئەپرسێ لە مەلبەنی
|
کەو کۆهساری گرتووە سەحرایە مەسکەنی
|
| هودهود بە تاج و حاجی بە شان و عەبایەوە
|
| وا، جاڕی دا چەمەن کە گەیشتم بە ئارەزووم
|
شاباشی گوڵ ئەکەم، لە نەبوونی زستانی شووم
|
| کۆتر ئەڵێ لە شوێنی جووتی خۆمە هاتوچووم
|
تەبریکی ساڵی تازەیە بازی مرادە بووم
|
| هاتۆتە دەر لە خەڵوە بە ڕیشی ڕیایەوە
|
| «قانع» کە کەوتە شیعر، لە شیعری دەقایقا
|
چۆن ڕاستە ڕاست ئەڵێ لە مەقامی حەقایقا
|
| گوڵدەستە شیعری حەمدییە فایق بەسەر شەقایقا
|
حەمدی نەبێ خولاسە لە جەمعی خەلایقا
|
| عومرێکی تازە لەززەتێ تازە بە شایەوە
|
