پادیشاهین سمر‌قندلی زرگر کیشی‌نی گتیرمک اوچون ائلچی‌لر گؤندرمه‌سی
| پادیشاهین سمر‌قندلی زرگر کیشی‌نی گتیرمک اوچون ائلچی‌لر گؤندرمه‌سی یازار: مولوی |
ائله کی، بو سؤزلری سولطان اوندان ائشیتدی،
حکیمین نصیحتین، جان-باشلا قبول ائتدی.
دئدی: حؤکمون نه دیرسه، او حؤکوم‌له گئدیم من،
نه ایسته‌ییرسن سؤیله، اونو ایجرا ائدیم من.
بیر ایکی نفر ائلچی، سمر‌قنده گئتدی‌لر،
اونلار چوخ مهارت‌لی، صداقت‌لی‌ایدی‌لر.
همین او ایکی نفر، سمر‌قنده گلدی‌لر،
شاهنشاه‌دان زرگره شاد خبر گتیردی‌لر.
دئدیلر: گؤزل اوستاد، هر یئرده اولموش اوستاد،
شهرلرده تانینمیش، آدی یاییلمیش اوستاد.
سنی فیلان شاهنشاه، زرگر گؤرمک ایسته‌ییر.
زرگرلیک ساحه‌سینده، رهبر گؤرمک ایسته‌ییر،
سن آل بو خلعت‌لری، گؤتور زر- گوموش‌لری،
اگر گلسن بیزیم‌له، سنین‌دیر زر ایش‌لری،
کیشی خلعتی گؤروب، اوره‌یینی برکیتدی،
اؤزونو مغرور توتوب، عایله‌سینی ترک ائتدی.
شاد-و خورم اولاراق، اونلارلا دوشدو یولا،
چونکی خبرسیز ایدی، شاه ائده‌جک قصد اونا.
عرب آتینا مینیب، شیرین-شیرین چاپیردی،
اؤزونون قان پولونو، الده آتیب-توتوردو.
ائی اؤزوندن چوخ راضی، سس وئرن شاه سسینه،
آیاغینلا گئدیرسن، اؤلومون پنجه‌سینه.
خیالیندا توتوبسان، مولکو-مالی ثروتی،
بیل کی، عزراییل سنه، ائتمز هئچ بیر حؤرمتی.
ائله کی، یول قورتاردی، گلیب چاتدی او “حبیب “،
سارایا گتیردی‌لر، گؤردو اونو شاه، طبیب.
حؤرمت‌له عیززت ایله، یانینا گئتدی شاهین،
ائله بیلدی یاندیرار، شاه اونا به‌ی‌لیک شامین.
اونو گؤرجک شاه اؤزو، تعظیم‌لر ائتدی اونا،
اؤز قیزیل خزینه‌سین، گؤستردی قوناغینا.
سؤیله‌دی بویور بو سن، بو قیزیل بو سیم-و-زر،
حاضیرلا قولباغی‌لار، بویونباغ، زنجیر، کمر.
نؤع‌به‌نؤع آیینه‌لر، سای-حیسابسیز، قاب-قاشیق،
دوزلتدیگین اشیالار، سوفره‌لره یاراشیق.
ایشینه باشلادی تئز، او کیشی گؤتوردو زر،
لاکین او خبرسیزدی، ایش‌لرین سونو نه‌لر.
سونرا حکیم سؤیله‌دی، قولاق آس بؤیوک سولطان،
خسته اولان کنیزی، زرگره وئر سن هامان.
قوی کنیز وصالینا قوووشوب خوشبخت اولسون،
یاندیغی آتش‌لری، سؤندورسون شادبخت اولسون.
باغیشلادی شاه اونا، او آی اوزلو کنیزی،
قوووشدو زرگر کنیز، چین اولدو طبیب سؤزو.
آلتی آی یاشادی‌لار، شاد خوررم قوشا اونلار،
ایندی گؤزله‌یک گؤرک، ایشین سونو نه اولار.
بیر گون گؤزل کنیزین، «شربت» یادینا دوشدو،
زرگر «شربتی» ایچدی حالی تامام ده‌ییشدی.
اوزو سارالدی تامام، قلبی قارالدی یامان،
یاواش-یاواش اوره‌یی، چیرپیندی دوردو تامام.
چونکو محبت اوندا، صاف محبت دئییلدی،
شؤهرت محببت‌ایدی، اؤجالدی تئز اه‌ییلدی.
کاش او آد-سان، او شؤهرت، اولمایایدی ازل‌دن،
بو بدبخت‌لیک اولمازدی، عومور گئتمزدی ال‌دن.
زرگرین گؤزلریندن، قان آخیردی سئل کیمی،
اؤلوم پنجه‌سی اونو، بوغوردو بیر قول کیمی.
توووز قانادلی اؤلوم، قوندو زرگر جانینا،
چو‌خ‌لو شاه‌لار سولطان‌لار، غلطان ائتمیش قانینا.
قیز دئدی: من آهویام، آلمیشدی او جانیمی،
او اووچو آخیتمیشدی، منیم قیزیل قانیمی.
من ائله تولکی‌یه‌م کی، چؤل‌ده گیزلی ووردولار،
گؤز دوشموش‌دو دریمه، بوینومو سیندیردیلار.
من او فیلم کی، منی یارالامیشدی فیلبان،
گؤز دیکمیش فیل دیشیمه، قانیم تؤکموشدو هامان.
اؤلدوردویوم بو آدام، خیصلت‌ده آلچاق ایدی،
کینیم سویومامیشدی، اورگیم‌ده داغ ایدی.
بو گون منه ده‌یه‌ن اوخ، صاباح اونا ده‌یه‌جک،
ناحاق قان آخیدان شخص، بیر گون قانین یئیه‌جک.
باخما دیوار کؤلگه‌سی، گوندوز اولار چوخ اوزون،
گون باتماغا دؤننده، گئری قایتارار اؤزون.
بو دونیا بیر داغ کیمی، عمل‌یمیز بیر نیدا،.
قاییدار اوستوموزه، داغا ده‌یه‌نده صدا.
طالع بئله یازیلدی، زرگره گور قازیلدی،
کنیز آلدی قانینی، خسته‌لیگی دوزلدی.
اؤلن‌لرین عشقی بیل، بیر ابدی عشق دئییل،
چونکو اؤلن شخص بیر ده، گئری قاییدان دئییل.
محببت دیری ایکن، هر زامان بیر زر اولار،
چونکو گولون قؤنچه‌سی، سحر تزه-تر اولار.
عشقه دیریلیک وئرر، جان‌لی اولارکن اینسان،
شراب‌دان فئیض آلینار، ساقی وئررکن پئیمان.
طالعیین حؤکمو ایله بیر، حولقوم وورولوبسا،
عومور گئری قاییتماز، اگر خیضیر دا گلسه.
سنده او عشقی سئچ کی، انبییالار سئچدی‌لر،
عشقین گوجوندن اونلار، تانرییا آند ایچدی‌لر.
سانما کی، بیز او شاه‌دان، آچماریق صؤحبت یئنه،
کریم‌لره سؤز قوشماق، چتین دئییلدیر منه.