| وە خاڵ تۆوەن، وە خاڵ تۆوەن
|
نوور لقای حەق وە خاڵ تۆوەن
|
| شۆڵەی شەم وە شەوق جەماڵ تۆوەن
|
دەردینان وە داخ کەماڵ تۆوەن
|
| لەیلێ کەنیزەک شیرین بەندەتەن
|
سەد «زڵێخا»ی «میسر» وە زەڕ سەندەتەن
|
| «هومەیلا»ی زەریف بەڵقیسای باڵدار
|
گوڵشای گوڵئەندام «عوزرا»ی گوڵعوزار
|
| یەکایەک حەیران بەژن باڵاتەن
|
باڵای نەونەمام سەوڵ ئاڵاتەن
|
| دڵ ئارام دڵ سەمەن بۆی پەری
|
«مەنیژە»ی بیژەن، زوهرە و موشتەری
|
| خەرامان حەیران حوسن زێباتەن
|
بانوان تەمام گشت جان فیداتەن
|
| حووران جەننەت فریشتان فەرش
|
سەناخوانتەن جە زەمین تا عەرش
|
| گوڵ جە گوڵستان وە داخ تۆون
|
داخداران وە داخ دەماخ تۆون
|
| هەر چەند پەروانان هەن جە سەحرا و کۆ
|
گشت ماتەن جە شەوق شەم دەستوور تۆ
|
| من چون پەروانان هەر جان فیدای تۆم
|
حەیران جەمین بەزم ئارای تۆم
|
| وە سەرگەردت بام شای سپی شەمان
|
سەرگەردان تۆم دوور جە هامدەمان
|
| بەشق خاڵ وێت خاتر شادم کەر
|
یا ڕوخسەت یا مەرگ یا ئازادم کەر
|
| ئیسە بۆ چەنیم لادێ سازابە
|
جەی گشت عەزابە گەردن ئازابە
|
