هكبه‌لى آداده
| هكبه‌لى آداده محرری: مصطفى رشيد |
اى چام ليمانى اى دله مرساى سعدت!
اى لانۀ سبزين فسونكار محبت!
اظلال لطيفه‌كده كچن بر قصه‌جق جم
عالمده بنى ايلدى صوك مرتبه خرم
اى ييللرك آلتنده اكلمش٬ قوجامش چام!
سايه‌كده سنك ايتدك اودلدار ايله آرام
اوتلر اوزرنده اوزانوب يار كولركن
كل روينه كوز ياشلرى دوكمكده ايدم بن
محرور دلى لطفنه غرق ايلر ايكن يار
حيفا بو كونى ايتدى سيه چرخ ستمكار
اى چام؛ بو كوزك خاطرۀ ذوقمى صاقلا!
عالمده بنم بو بريجك شوقمى صاقلا!
مصطفى رشيد