هارە سەختەنی
Jump to navigation
Jump to search
| هارە سەختەنی، هارە سەختەنی | تۆ خۆ کەم قیمەت، سەنگی سەختەنی |
| چی بوڵەند ئیقباڵ، ساحێب بەختەنی | یار ئاما وەلات، جەهدو جەختەنی |
| تراشیدەی دەست سەر ئوستادی باش | جەستەت پوڕ زەخم قوڵنگەی سەنگ تاش |
| یادگار ئۆسای قەدیم زەمانان | دەس ئاسی دەس کێش خیاتەی خانان |
| چمان تاشیای تێشەی فەرهاد بێ | دەستت جە نەمام دارای شمشاد بێ |
| ئارۆ قیبلۆ من بە لەنجە و لارە | تەشریفش وەلای تۆ ئامان، هارە! |
| شیرینەن نیشتەن دانە مەدۆ پێش | هارەش هار کەردەن دەور مەدۆ نەوێش |
| مەگێڵۆ بە دەو چوون چەرخی چەپگەرد | هەیاهووش گەرمەن مەناڵۆ جە دەرد |
| دوو لیمۆی وەش بۆش تەرحی شەمامە | جمە جمشانە نە یەخعەی جامە |
| کەس چوون تۆ ئازیز جەلای یار نەبی | هارە چی وەشی سا چی هار مەبی |
| تای توڕەی زوڵفان سیای عەنبەر بۆ | سەر ئاوێز کەردەن تا وەبانی تۆ |
| دەخیلەن دەستت بە دەستی یارەن | پەنجەش ڕێش نەبۆ، هارە هاوارەن |
| شیرین بە سەد ناز مەکێشۆ دەستە | دانە مەدۆ پێت چوون ئاوات واستە |
| دانەش مەسانی چوون ستەمکاران | مەکەریش وە گەرد توتیای شاران |
| تاقەت شی جەلام واتم ئەی هارە | بە مەودای ئەڵماس بای پارە پارە |
| تۆ دەستی شیرین دەستە کێشتەن | ئاواتت بڕیان، ناڵەی چێشتەن! |
| تۆ پەنجەی شیرین کەفتەنت وەسەر | چی ساڕێش نەبی زامانی خەتەر |
| با من بناڵوو ڕوان تا شەوان | زەدەی هیجرانم، دەردم بێ دەوان |
| هارەی هەراسان، هەردەی هەردە گێڵ | کەم دەور دە نە وێت چوون دێوانەی وێڵ |
| ئانە شیرینەن دوڵبەر، دوڵستان | دڵ چێت مەسانۆ بە مەکرو داستان |
| بە بەین و بە قاش هیچ مەبە خەرە | جەفاش سەد بارەن، وەفاش یەک زەڕە |
| چەنی کەس تا سەر هەرگیز یار نیەن | یاری ساحێب شەرت وەفادار نیەن |
| کاتێ مەزانی هۆر ئێزا بە قەس | چوون بێ بەینەتان جە تۆش کێشا دەس |
| شی بە ماوای وێش تەشریف بەردەوە | تۆش ئاستی وەلای داخ و دەردەوە |
| کۆتایی سەداو نەعرەتە و دەنگت | بێ قیمەت گنای، کەساس بی سەنگت |
| بە دڵەی پوڕ سۆز مەینەت بارەوە | پێچیای بە دەرد دووری یارەوە |
| ئەوسا چەنی زام بێ دەوای خەتەر | مات مەبی بێ دەنگ، جە سەیدی بەتەر |
This work was published before January 1, 1929, and is in the public domain worldwide because the author died at least 100 years ago.
Public domainPublic domainfalsefalse