من کێم و تۆ کێیت
Jump to navigation
Jump to search
| من قامیشە شکاوێکم | زەلە فڕێ دراوێکم |
| لە سەرە ڕێی مەینەتیدا | لە چەقی خەم و پەستیدا |
| تۆش نایێکی شیرینی جوان | پەنجەی هونەر، هونەرمەندان |
| ئەتجووڵێنێ بۆ ساز بە ناز | بە ئاواتی جوانتر ئاواز |
| من بووکەشووشەی مناڵم | ژیرکەرم هۆی گڕوگاڵم |
| من «یاری»ی مناڵەوردەکەم | بێفەڕترین بووکەشووشەم |
| تۆش پەیکەرێکی پیرۆزی | ڕێکوپێکی، بەرزی، قۆزی |
| دیاری و قوربانیت بۆ ئەدەن | بەکۆمەڵ قۆچت بەخت ئەکەن |
| من گوڵێکی دانەوێڵەم | زەرد و ملکەچی دروێنەم |
| ملم بە داس هەڵئەبڕڕێ | لاشەم لە دەشت فڕێ ئەدرێ |
| بێ گۆڕ و شوێن بەدەم باوە | لاشەم وردە و تووڕ دراوە |
| تۆش کێڵگەیەکی بەرینی | نەمری، جوانی، شیرینی |
| ماوەیەک جوان گرتمتە خۆ | وشکت کردم هەروا بێ هۆ |
| بێ خواحافیزی بەرت دام | هەروەها وازت لێ هێنام |
| من هەناسەیەکی سەختم | کپ و بێدەنگ و بێبەختم |
| ئاهێک کە هیچ ڕەنگی نییە | لە دەرچوونیش بێبەرییە |
| تۆش ئاوازێکی بەجۆشی | گۆرانییەکی زۆر خۆشی |
| لەسەر سەدان لێو و دەمی | دوور لە ناخۆشی یان خەمی |
| لە خۆم ئەپرسم کە من کێم؟ | دەروونی خۆم ئەپسێت لێم |
| مادەم من خۆم بە خۆم ئەڵێم | خۆم ئەپرسم کەوا من کێم |
| ئایا من پارچەی کڵۆڵیم | بچووکترین بەش و لەتیم |
| یان کڵۆڵی لەتە لە «من» | بچووکترین کەرتە لە من |
| یەکێکمان هەر لەوی ترین | بۆیە وا بە یەک هۆگرین |
| من پەڵەهەورێکم کە با | سەدان ئەملاولام پێ ئەکا |
| بە هەواوە ئاوارە بووم | نابارێنم چونکە تینووم |
| ئایا هەوریش هەیە تینوو؟ | بێسەروشوێن، ئاوارە بوو |
| ئەو فرمێسکەی ئەیبارێنم | زووخاوە گشتی ئەڕژێنم |
| زووخاوی دڵ ئەیڕژێنێ | ئەو دڵەی خوێن ئەدەڵێنێ |
| وا بێتین و شەکەت بووە | ئەوەندە سزای چەشتووە |
| چاوەکانم واق وڕماون | لە ترووکاندن وەستاون |
| ئەوی «خۆشی» یان «شتێ» بێ | ئەوان هەر گاڵتەیان لێ دێ |
| نەڵێی دڵم هەر سادەیە | بەڵکوو دوو گلێنەی هەیە |
| بەوان هەست بە ئازار ئەکەم | هەست بە ڕۆژ شەوی تار ئەکەم |
| ئەگەر ئەوان نەبوونایە | هەستیان بە من نەدابایە |
| نە خۆم وەها باش ئەناسی | نە ئەمزانی تۆش چ کەسی |
| من شەتڵێکی گەلێ ساوام | بچووک، دووپەل وا لە بنتام |
| گوێم لە دەنگی بولبول نییە | نازانم خۆشخوانی چییە |
| ئەو پایەیەم نییە کە وا | گوێم لە سۆز بێ لە هیچ وەختا |
| تۆش دارێکی گەورە و بەرزی | خاوەن گۆپکی هەزار تەرزی |
| پەل و لق و گەڵات زۆرە | بولبول و لان هەمەجۆرە |
| هێلانەیان لەسەر پەلان | دروست ئەکەن بە دڵ و گیان |
| سۆز و ئاواز و گۆرانی | ڕۆژ تا ئێوارە و بەیانی |
| بۆت ئەڵێن و پێشکەشتە کەن | بێ ئەوەی دڵ لە دڵ بدەن |
| گشتی بۆ خۆتە بەتەنیا | کەس هاوبەشت نییە تێیدا |
| لەگەڵ ئەوەی کە ئاوت ئەدات | هەتا پۆپەم نوقم ئەکات |
| من بە جارێ ئەخنکێنێ | گیانی شیرینم دەردێنێ |
| من زەلکاوێکی بچووکم | بێنرخ و بێبەها و سووکم |
| بۆق نەبێ هیچی تیا ناژی | قەوزە و هەڵم بە ناخۆشی |
| دەور و سەریان وا گرتووم | وا ئەحواڵیان شڕ کردووم |
| تیشکی ڕۆژم قەت لێ نادات | ئاوات بە لای دڵما ناڕوات |
| تۆش مێرگێکی جوان و شیرین | پڕ لە گوڵان سەوز و بەرین |
| نێرگس و گوڵی وەنەوشە | کام گوڵانەی بۆنیان خۆشە |
| کام گوڵانەی گەلێ جوانن | لەسەر ڕووی تۆدا ڕواون |
| تیشکی ڕۆژ بە ڕەنگەکانی | هەر حەوت ڕەنگە جوانەکانی |
| پەخشان ئەبێ بە سەر تۆدا | دڵت پڕ لە ئاوات ئەکا |
| ئەمە تۆ بیت جا ئەمن کێم | دەروونی خۆم ئەپرسێ لێم |
| بەلەمێکم ڕێ بزربوو | ئاوارە و ڕێ هەڵەکردوو |
| شەپۆلی ئاو بە ئەملاولاو | هەردەم بە لایەکمدا ئەدا |
| کەوتوومەتە شەوێک کە ڕێ | هەر نازانم بۆ کوێ ئەچێ |
| ئاواتمە کە نوقم بم | یان بۆ ڕۆخی دەریا بچم |
| بگەمە ئەوێ ئەوسا لەوێ | تۆزێ وچانم بەر کەوێ |
| بەتەما بووم کەوا بگەم | بەڵام داخەکەم داخەکەم |
| من ئەو کەسەم کە چەند ساڵە | ژینم بەدبەختییە و تاڵە |
| پەتی قەنارەم لە گەردن | لە مل شەتەک دراوە تون |
| بەبێ ئەوەی گیانم دەرچێ | یاخود وازم لێ بهێنرێ |
| مردن لەمە خۆشترێکە | هەر ساتێکم مردنێکە |
| ئیتر من چۆنم پێ خۆش بێ | کە ناوی تۆم لە لا ببرێ |
| لە کاتێکدا کە تۆ تەنیا | ئەم گشت سزایەت بە من دا |
| تۆیت هۆی ژیانی سەختی من | بوویتە هۆی وا لێ کردنم |
| نزیک مەرگ یان مردنم | با کۆتا بێ باسکردنم |
| چ بێوەفا و بێبارێکی | چ ژەهرێکی، چ مارێکی |
| ئەگەر«ڕووناکی» نەبوایە | سەد «تاریکی» بهاتایە |
| هیچ کەس ڕقی لێ نەئەبوو | بیری بۆ ڕۆژ هەر نەئەچوو |
1962/10/05
بەندینخانەی سلێمانی
This work is first published in Iraq and is now in the public domain because its copyright protection has expired by virtue of the Law No. 3 of 1971 on Copyright, amended 2004 by Order No. 83, Amendment to the Copyright Law. The work meets one of the following criteria:
- It is an anonymous work or pseudonymous work and 50 years have passed since the year of its publication
- It is a work where the copyright holder is a legal entity or a work of applied art and 50 years have passed since the year of its publication
- It is a photographic or cinematic work that is not compositive (artistic in nature) first published before 1 January 1999
- It is work published in Iraq before 1 January 1954, and the author died before 1 January 1979
- It is another kind of work, and 50 years have passed since the year of death of the author (or last-surviving author)
- It is one of "collections of official documents, such as texts of international laws, regulations and agreements, judicial judgements and various official documents."
- It is the work of a body corporate, public or private, published by January 1st, 1980 (Article 20, 1971 law).
Public domainPublic domainfalsefalse