| نیزامی جە قەوڵ بەغدادی سەلام
|
وەی تەور تەنزیم کەرد ئی شیرین کەلام
|
| ئەو ئیبن سەلام شەوهەر لەیلێ
|
یەکساڵ بی هامسەر لەیلێ پڕ مەیلێ
|
| وە یەک نەزارە جەو شادمان بی
|
شەریک ڕەفیق غەم و حیرمان بی
|
| جە قەزا و قەدەر قادر لامەوت
|
ئاما پەرێ سەعد مەشهوورنامەی فەوت
|
| فووت و فەنای ئەو پێش کریا ئیعلام
|
تەب و لەرز یاوا وە ئیبنوسەلام
|
| ڕاحەتی مەزاج ڕەختش پێچا و بەست
|
ئیعتدال تەبع قارورش شکەست
|
| چوار عونسور بە هەم کەردن ئیختلاف
|
جسمش بی وە جای مەعرەکە و مەساف
|
| حەکیم حازق ئاوەردن بەلاش
|
بەڵ پەی دەوای دەرد سەعد کەرۆ تەلاش
|
| قارورەشناس نەبزش فشار دا
|
نشانەی نەزدیک مەرگش دیار دا
|
| شەربەت و دەرمان پەرێش دا جەواز
|
ئاوردەن پەرێش مەیل کەرد بە دڵواز
|
| کەمێ ئیعتیدال مەزاج بی پەیدا
|
پەرهیزش شکەست تەب بی هوەیدا
|
| ڕۆژ بە ڕۆژ تەب و لەرزش زیاد بی
|
لاغر و زەعیف، سست و بەرباد بی
|
| جە زەلزەلەی سەخت تەب و لەرز و تاو
|
بەنای بەدەن جور مووخش بی وە ئاو
|
| مورغ حەیاتش بەرشی جە قەفەس
|
ئاما وە پایان شومارەی نەفەس
|
| شی وە مەردەشۆر، نە تەختەی چووب، مەرگ
|
سفیدیی کەفەن کرباس کەرد وە بەرگ
|
| بە ئیعتزاز خاس ئایین ئیسلام
|
سپەردن وە خاک ئەو ئیبنوسەلام
|
| لەیلێ چون تووتی ئەسیر جە قەفەس
|
ڕەها بی و کێشا چون بوڵبوڵ نەفەس
|
| هەرچەند جە ویساڵ شەوهەر بی مەئیووس
|
ئەمما چون ساڵێ چەنەش بی مەئنووس
|
| بە حوکمی فیتری عاتیفەی بەشەر
|
قەڵاخی پۆش بی چوار مانگ و عەشەر
|
| جە دەرد فیراق شەوهەر ناکام
|
مەناڵا بە زار خۆلاسەی کەلام
|
| بە زوان پەی سەعد بە دڵ پەرێ قەیس
|
ئەسرین مەڕێزا وێنەی سەیل غەیس
|
| بە ڕەسم عەرەب بەرگ ڕەش پۆشا
|
یەکساڵ جە ئەغیار شادی نەنۆشا
|
| وە ئەبیات خاس ئەشعار دڵگیر
|
دۆستش مەلاوان جە شام شەبگیر
|
| خۆف و خەتەر و ڕاهبەندش نەمەند
|
خەرگاش خەڵوەت بی پابەندش نەمەند
|
| جە دمای یەک ساڵ حەبس بێتاوان
|
لەیلێ بێوە بی یاوا وە باوان
|
| جە ئەندووهـ و غەم دنیا ڕستەو
|
دەس نیا وە ڕووی خاس و کەستەوە
|
| ناماش وە نەزەر دنیای دوون
|
غەیر میهر مەجنوون سەریر واژەگوون
|
| هەر بە یاد ئەو عاشق دێرین
|
مەواتش ئەشعار ئابدار و شیرین
|
| تەعامش کەم بی نەهاڵش نابوود
|
بێ خورد و بێ خواب بێ سەودا و بێ سوود
|
| خۆراکش غەم و خاوش خەیاڵ بی
|
جە هیجران قەیس شادیش بەتاڵ بی
|
| زەعیف و لاغر ڕۆژ جە ڕۆژ بەدتەر
|
وەزع زیندەگیش گنا وە خەتەر
|
| مەزانان مەجنوون چون وێش ناتەوان
|
هاز پاش نییەن پەی ڕاگە لووان
|
| دەعوەتش نەکەرد جە ئەو خەریدار
|
پەی شادی و سروور تەجدید دیدار
|
| وات وەسەن پەی قەیس سەنگین بار غەم
|
با زەعیفیی لەیل نەوینۆ وە چەم
|
| یەک ویداعنامە و خوداحافزی
|
تەنزیم کەرد بەی تەور بە دڵ عاجزی
|
| مەجنوون بە یادت، مەجنوون بە یادت
|
بە سەودای بێسوود وێنەی فەرهادت
|
| بە ڕەنج عەبەس تەمام بەربادت
|
بە خاتر خەمین تەمام ناشادت
|
| نمەشیم جە یاد هەر هام جە یادت
|
ڕەنجەڕۆم پەرێ ڕەنجی بەربادت
|
| ئازادم بکەر، کەردم ئازادت
|
عەشق من چون وێم کەردش بەربادت
|
| ئی نامە موژدەی وادەی مەرگمەن
|
سیاهش سەواد بەخت و بەرگمەن
|
| جەوهەرش سورخیی هوون جەرگمەن
|
سفیدیش شێوەی کفن و بەرگمەن
|
| عومرم بی تەمام جە سەودای عەشقت
|
هاوکار بیم جە مەینەت مەشقت
|
| تۆیچ دایم چون من مەینەتەن مەشقت
|
مەشهوور بی نەعام ڕیسوائیی عەشقت
|
| ئەر مەپەرسی حاڵ مەینەت دەردەکەت
|
عاشق و سادق دڵسپەردەکەت
|
| مەحبووب مەحجووب پشت پەردەکەت
|
ئامانەت گەنج پێ سپەردەکەت
|
| زەعیف و زگار، خەستە و ناتەوان
|
ماتەمزەدەی غەم بێ دەم و دەوان
|
| سەنگینیی بارم ڕۆژان و شەوان
|
ئامادەم پەرێ قیامەت لوان
|
| هیچم نەمەندەن جە بونیە و قامەت
|
بێجگە جە گەنجم ساغ و سڵامەت
|
| باقییەن پەی تۆ تا ڕۆی قیامەت
|
شەهید عەشقم نییەن مەڵامەت
|
| قەیس و مەجنوونم دۆس و دڵگیرم
|
هامڕاز و هامفەرد شام و شەبگیرم
|
| عەمۆزای عەزیز ئەدیب و ژیرم
|
عەزیزتەر جە داغ، هامشیرەی شیرم
|
| دۆس دڵپەسەند بیابان گەردم
|
شەریک شادی و غەم شەفا پەی دەردم
|
| گۆش دەرۆ مەفاد خاتمەی فەردم
|
غەمگینتەر نەبی ئەگەر من مەردم
|
| سەد چون من نە بۆ تۆ بای سڵامەت
|
دیدەن دیدار فەردای قیامەت
|
| با بۆی هەردوومان بەردن نەدامەت
|
ئەگەر لەیل نەبۆ قەیس بۆ سەڵامەت
|
| نامەش دا وە دەس یەک مەحرەم ڕازی
|
بەردش وەلای قەیس بە دڵنەوازی
|
| قەیس نامەش وانا دەردش دێویا
|
چون ئاهووی تەنیا سەر لێش شێویا
|
| نەتاوا جواو نەکێشا نەفەس
|
قاسید وە تاجیل گێڵاوە وەپەس
|
| خانا شادی و غەم تا سەر پەرێ کەس
|
نەمەندەن پەنام بە زات ئەقدەس
|
| خاتمەی حوسن بکەرۆ ئیعتا
|
وە من و ئیسلام، زات بێهەمتا
|
