| شەیدائی مەجنوون بی وە ئاوازە
|
ئەدا و باب کەردەن داخ دڵ تازە
|
| مەلووح و سەلیم عامیری و مادەر
|
ئیخوان، ئەخەوات، خواهەر و برادەر
|
| سوار بین وە پشت جەمازەی ڕەهوار
|
ڕاهی بین ڕۆژێ جە وادەی ئێوار
|
| تەی کەردەن ڕاهان بادیەی غەریب
|
بە غەم و خوسە و ئەندووهی حەبیب
|
| دین نە دامەنەی توباد و سوبان
|
پڕەن جە وحووش بەڕ و بیابان
|
| گەوەزن و گورگ، ئاهوو، شێر و بۆر
|
پڵنگ و خەرگۆش، مورغ و مار و مۆر
|
| ئەوەندە جەم بییەن بە تاجیل و تاو
|
زاڵەی زامداران زوو مەبۆ وە ئاو
|
| جە دوو سدا دان، قەیس ئاما وە هۆش
|
پەڕاگەندە کەرد تیوور و وحۆش
|
| شین وە لای مشتێ ئیستخوان و پۆست
|
خاڵی جە گردین ماڵاماڵ جە دۆست
|
| بە زاری و شیوەن وێنەی مەردەنش
|
دەست ئیشتیاق کەردەن گەردنش
|
| بۆسان دیدە و دەم بێ خورد و خاوش
|
پەررسان جە تاقەت تەوانا و تاوش
|
| وات نییەن جە لام غەیر جە عەشق لەیل
|
ئەدا و باب جە خەم دەروون کەردن کەیل
|
| هەرچی نەسیحەت، هەرچی دڵداری
|
کەردشان، دەردش فێشتەر بی کاری
|
| ئەو شۆ تا سەحەر نیشتن لاشەوە
|
پاڵدان وە باڵین سەنگ تاشەوە
|
| سەحەر هورێزان پەی دید بۆسی
|
وداع کەردشان بە سەد مەئیووسی
|
| گێڵانۆ دما هەردە وە هەردە
|
لوان وە یانە چون ئازیز مەردە
|
| جە دەرد فیراق فەرزەند جوان
|
مەلووح ڕۆژ بە ڕۆژ مەبی ناتەوان
|
| ئاخر جە هیجران فەرزەند شیرین
|
گیانش تەسلیم کەرد وە جان ئافەرین
|
| جە دمای بابۆی موعەللا سیفات
|
مادەر و خاڵۆی قەیس کەردەن وەفات
|
| ئی هەواڵ یاوا وە قەیس بەدبەخت
|
دەردش بی گران قەترە دا بە جەخت
|
| ئاما وە سەر خاک گڵکۆی ئەدا و باب
|
دڵ و جەرگ ڕێش خاستەر کەرد کەباب
|
| بە سۆز دەروون، بە ئاواز بەرز
|
بە ئەشعار شۆخ شیرین تەور و تەرز
|
| خاڵۆ و ئەدا و باب بە دڵ مەلاونا
|
سیاسەنگ بە سۆز چون مۆم مەتاونا
|
| ئیخوان، ئەخەوات، برا و خواهەران
|
ئەقرەبا و خوێشان، هاوسا و هاوسەران
|
| شین نە دەور ئەو بە شین و زاری
|
ئەسرین مەڕێزان جە بێقەراری
|
| زیادتەر جە گشت پەی وێڵیی مەجنوون
|
قەیس جە ئەوان بی فەراوان مەمنوون
|
| ئاخر هۆرێزا توند و شتابان
|
ڕوو نیا وە ڕای چۆڵ و بیابان
|
| دەست کەرد بە وەردەی گیای کەش و کۆ
|
نە جای غەزای خاس شاهی باشکۆ
|
| برا و خواهەران مەئیووس شینە پەس
|
دەست تەئەسوف نیان نە ڕووی دەس
|
| خانە پەی گرد کەس دنیا فانییەن
|
دنیا پەی هیچ کەس جای وەفا نییەن
|
| دوعای خێرت بۆ ئیمان سەلامەت
|
بشی وە عوقبا وە بێ مەلامەت
|
