| دمای نام حەق بە عشق لەیلی
|
تەنزیم کەرد نامەی ئینشای پڕمەیلی
|
| نویسا مەنزڵ تازەت موبارەک
|
عەید عەرووسی، تەهیە و تەدارەک
|
| چون یار تازەکەت گەنجش بیشتەرەن
|
چەنی قەیس وێڵ کەی بەرانبەرەن
|
| ئەو کەی چون مەجنوون، دڵدادەی مەفتوون
|
شەو و ڕۆ نە وەسف فیکر و باڵای تۆن
|
| ئەو کەی وێنەی قەیس کەڵپۆس کەرد نە کۆڵ
|
وێش کەرد بە هامڕاز وەحشیان چۆڵ
|
| ئەو کەی نە جای خەز پەڵاسش پۆشان
|
کەی چون قەیس پەی تۆ زووخاوش نۆشان
|
| ئەو کەی پۆست پاش کەردەن وە پاڵا
|
بگێڵۆ نە شۆن ئەو بەژن و باڵا
|
| ئەو کەی جە غەمت بیەن چون کەمان
|
قامەت وێنەی قەوس قەزای نەوئامان
|
| ئەو کەی پەی تۆ ڕای چۆڵ گرت نەپێش
|
وێش ئاوارە کەرد جە قەوم و جە خوێش
|
| ئەو کەی بی پەی تۆ جە شاهیش وییەرد
|
تەرک تاج و تەخت پادشاهی کەرد
|
| ئەو کەی بی بە وەحش بیابان و چۆڵ
|
کەی بی وە ڕەفێق دێو و جن و غۆڵ
|
| هەر پاسە مەبۆ ڕای وەفاداری
|
تۆ جە عەیش و نۆش من جە غەمخواری
|
| وەفای ژن پاسەن جە عەشقبازی
|
پەنجەت خیزابەن پەی پەنجەبازی
|
| خیزاب پەنجەت هوون جەرگمەن
|
ڕازانت یاسین وادەی مەرگمەن
|
| خۆش وەقتم، جە غەم خاترت شاد بۆ
|
جە عەیش و عوشرەت منت جە یاد بۆ
|
| شەیدایی شێوەی شۆخ دوڕ مەکنوون
|
قەیس عامیری مەشهوور بە مەجنوون
|
| نامەدا بە دەست پەیک سەبووک خێز
|
یاوناش بە لەیل شۆخ شەکرڕێز
|
| ئەو نامەش وانا سەرانسەر بە مەیل
|
ئەسرین جە دیدەش مەڕێزا چون سەیل
|
| قەڵەم گرت بە دەست، گەوهەر ئەفشان کەرد
|
سەرنامە بە هوون قرمز نشان کەرد
|
