لەیلا و مەجنوون/03
Jump to navigation
Jump to search
| ←02 | لەیلا و مەجنوون (1770) by 03. بردن ملوح شاه قیس فرزندش به طواف کعبه |
04→ |
| بەواتەییاران عیماری هەودەج | حازر کەرد چەنی قەیس بسۆ پەی حەج |
| جە خاسان وێش چەند بزورگەوار | ئامادە کەردش بە شیرین ئەتوار |
| هەدایای بێ حەد، ناقەی قوربانی | بەردەن وە دەربار دانای ڕەببانی |
| وە نییەت حەج بەستشان ئیحترام | ڕوو نیان وە ڕای، بيت الله الحرام |
| یاوان وە حەرەم کابەی موبارەک | وە لەببەیک، لەببەیک، تەهیە و تەدارەک |
| تەوافول قودووم مەککەی موعەززەم | نماز جە مەقام، ئاو واردەی زەمزەم |
| مولتەزەم چەنی حیجر ئیسماعیل | حەجەرول ئەسوەد بۆسان بە تاجیل |
| سەفاوو مەروە، مینا و موزدەلەف | کۆهـ عەرەفات گرد لوان بە سەف |
| شەیتان کەردەن ڕەجم، کەردەن قوربانی | ئامان وە تەواف بەیت ڕەببانی |
| مەلووح وات بە قەیس نوور دیدە و دڵ | وە پەردەی کەعبە چنگ بدەر چون گوڵ |
| واچە یا ڕەببی پادشای شاهان | تەوبە و پەشیمان جە گرد گوناهان |
| بە ئەڵتاف وێت جە ڕووی ڕەزا و مەیل | بەر کەریم جە دڵ سود سەودای لەیل |
| قەیس دڵحەزین دەست بەرد وە باڵا | چنگ پێکا وە زەیل پەردەی بەیت، ناڵا |
| وات ئەی خوداوەند موبەڕڕا جە عەیب | سەتتارول عیووب، پشت پەردەی گەیب |
| جە دونیا و عوقبا بە تۆم هەن ئیمان | جە ردین گوناهـ تەوبە و پەشیمان |
| بغەیر جە مۆبەت حەقیقەت لەیلێ | زیادتەر بۆ جە دڵ جە سابیق خەیلێ |
| چون جە سوورەتش سانیعم دییەن | پەی عەشقی لەیلێ مانیعم نییەن |
| شەرت هەر ئەو شەرتەن پەی لەیلم کەردەن | بازگەشتیم نییەن تا بە ڕۆی مەردەن |
| ئێد وات و بەرشی جە یانەی حەرەم | ڕوو کەرد وە سارا دەروون پڕ جە غەم |
| بابۆش ئەساسەی سەفەر پێچاوە | چەنی هامڕاهان شی وە کەجاوە |
| سواران خێڵ ڕواڵان بە دەو | قەیس دیان نە کۆ، گرتن دەور ئەو |
| ئامان دەست و پاش بکەران وە بەند | واتش بە یاران لێو بە شەکەرخەند |
| ئێوە و خوداتان من خوار خەستەم | جە ڕووی بێڕەحمی نەکەن دەستبەستەم |
| بابۆش بە زاری گرتەش نە ئاغۆش | واتش ئەی فەرزەند دارای عەقڵ و هۆش |
| ڕاگەی بەدبەختی مەگێڕە نە وەر | ماوەرۆم پەرێت لەیل نازپەروەر |
| قەیس بی خاترشاد، دەروونش جۆشا | دمای چەندین شیعر، لیباسش پۆشا |
| شی وە پشت زین، جەهان پەیماوە | چەنی ڕەفیقان هەی بە دماوە |
| ئامان وە یانە بە خۆشی و شادی | ئێڵ ئامان پێشواز موبارەکبادی |
| مەلووح میهمانی میهمانان کەردش | هەرکەس پەی وێش تەبەڕوک بەردش |
| جە دمای تەبەڕوک، وروود حەجاج | مەجنوون بی مەلبووس زەڕبەفت دیباج |
| برا و خواهەران، پدەر و مادەر | شاد بوون بە ئەڵتاف قەیووم قادر |
| قەومان و خوێشان عامری فەرجام | ئامان وە سەر کار لەیل جەمین جام |