لادێیی و بزن فرۆشتن و هەڵبژاردن
Jump to navigation
Jump to search
| ڕۆژێ کابرایەک دانیشتووی دێهات | دوو بزنی هێنا و بۆ ناوشار ئەهات |
| کە بیافرۆشێ بۆ پێویستی ماڵ | گەیشتە ناوشار سا بەهەر ئەحواڵ |
| ئەو ڕۆژە ڕۆژی هەڵبژاردن بوو | لە هەموو شارێک نائیب ناردن بوو |
| کوڕێکی شاری گەیشت بە کابرا | وتی: ها چۆنی ئەی دەسەبرا! |
| خەریکن ڕەئی ئەدەن بۆ نوێنەر | تۆیش بڕۆ ڕەئیت بخەرە دەفتەر |
| لادێیی وتی: ڕەئی چلۆنە؟ | ئاخۆ تازەیە یا وەکوو کۆنە؟ |
| من بە تەمەن خۆم ڕەئیم نەدیوە | لە هیچ کەسیشم هیچ نەپرسیوە |
| نازانم ڕەئی خواردنە یا پۆشاک | نازانم ئایا بێ فەڕە یا چاک! |
| من هەموو ڕۆژێ دێم بۆ ناو بازاڕ | بۆ ڕەئیم نەدی لای حاجی و توجار؟ |
| ئاخۆ بە مترە یا بە کێشانە؟ | ئاخۆ بەر تەسکە یا بەری پانە؟ |
| بە دەستە ئەیدەن یاخۆ بە دانە؟ | نرخی گرانە یاخۆ هەرزانە؟ |
| ئەر شتی چاکە هەردوو بزنەکەم | ئەیدەم بە ڕەئی بێ زیاد و کەم |
| ئەگەر خراپە بۆچی بیکڕم؟ | نانی خێزانی برسی ببڕم؟ |
| ئەو بزنە ئەیدەم بە ڕەئی بێفەڕ | ئەیدەم بە کڵاش بۆ پێی ئەحە کەڕ! |
| کابرای شارسانی لێی هاتە زمان | وتی: لادێی هەژاری نەزان |
| ڕەئی بۆ پیاوی مەندووب دانراوە | لە وڵاتێ یەکێ دیاری کراوە |
| مەندووب یەکێکە ئەچێتە بەغدا | بۆ ناتەواوی هەوڵمان بۆ ئەدا |
| نایەڵێ هەرگیز زۆرمان لێ بکەن | دەس ڕەنجی ئێمە بە بایی ببەن |
| قەمچی بپێچن لە سەر و گوێمان | بە خوت و خۆڕایی جوێن بدەن پێمان |
| ئەمان پارێزێ چون حەقدارمانە | لە خۆمان چاتر ئەو خەمخۆرمانە |
| لادێیی: | |
| بۆچی کاکە گیان! ئەوە هەر بووە؟ | ئیستە داهاتووە، یا پیشەی زووە؟ |
| شارستانی: | |
| نە، نە، براکەم! بووە تا بووە | مەجلیسی نەواب، هەر پیشەی زووە |
| کاتێ تەشکیلات حکومەت کرا | مەجلیسی نەواب خێرا دانرا |
| ئەم چەن ساڵیشە مەندووبت بووە | لە کوردسانۆ بۆ پایتەخت چووە |
| لادێیی: | |
| ئەر مەندووب هەیە، بۆ دەسەی زۆردار | هەر ڕۆژ نە ڕۆژێ ئەمبەن بۆ بێگار؟ |
| ئەر مەندووب هەیە بۆچی مام کوێخا | لەسەر خۆڕایی ئابڕووم ئەبا؟ |
| ئەر مەندووب هەیە و غیرەت ئەنوێنێ | ئاغا جەریمەم بۆ لێ ئەسێنێ؟ |
| ئەر مەندووب هەیە تووتنەکەم کوانێ؟ | ئەر مەندووب هەیە دۆنمەکەم کوانێ؟ |
| ئەر مەندووب هەیە بۆچی هەزاران | بە برسی ئەگرین شەوسوو ئێواران؟ |
| نە ڕەئیم هەیە و مەندووبم ئەوێ | بزنم لە مەندووب زۆر خۆشتر ئەوێ! |
| تا ئیستە مەندووب هیچی نەکردووە | ئیتر من چیمە لەم هاتوچووە؟ |
This work is first published in Iraq and is now in the public domain because its copyright protection has expired by virtue of the Law No. 3 of 1971 on Copyright, amended 2004 by Order No. 83, Amendment to the Copyright Law. The work meets one of the following criteria:
- It is an anonymous work or pseudonymous work and 50 years have passed since the year of its publication
- It is a work where the copyright holder is a legal entity or a work of applied art and 50 years have passed since the year of its publication
- It is a photographic or cinematic work that is not compositive (artistic in nature) first published before 1 January 1999
- It is work published in Iraq before 1 January 1954, and the author died before 1 January 1979
- It is another kind of work, and 50 years have passed since the year of death of the author (or last-surviving author)
- It is one of "collections of official documents, such as texts of international laws, regulations and agreements, judicial judgements and various official documents."
- It is the work of a body corporate, public or private, published by January 1st, 1980 (Article 20, 1971 law).
Public domainPublic domainfalsefalse