كوفه
| كوفه محرری: محمد عاكف |
بش اون گون اولدى كه، معتاده انقياد ايله بن
صباحلين چيقيويرمشدم أودن ايركندن
بزم محله‌ده استانبولڭ كنارى ديمك
صوقاقلرنده گزلمزكه يوزمه بيلميه‌رك!
آديم باشنده درين بر بحيره طالغهﻻنير،
صولر قارارد يمى٬ آرتق كلن كلير طايانير!
بر ألده اولملى قنديل، بر ألده اسقانديل
سلامتڭ يولى انسان ايچون بو٬ باشقه دگل!
ألمده بر قوجه دگنك، اونڭله يوقلايه‌رق
اوڭم آطه‌يسه باصوب٬ يوق٬ دڭيزسه آتلايه‌رق،
- آياقده طورمايه أل برلگيله غيرت ايدن،
لسان حال ايله اما ركوعه نيت ايدن -
او سالخورده خراب أولرڭ صاچاقلرينه،
صيغينمش اويله گيدركن همان آياقلرينه
دليلمڭ قوجه بر شی طاقيلدى.. باقدم كه:
گنيشجه بر كوفه ياتمقده هم اپى أسكى
بو بر حمال كوفوسيمش.. عجب كيمڭ؟ ديركن
اون اوچ ياشنده قدر برچوجوق گلوب اوته‌دن٬
گريلدى تكمه‌يى اينديردى اويله بر كوفه‌يه
تكر مكر كوفه بيتاب دوشدى تا اوته‌يه
- بنم بابام سنڭ آلتڭده أولدى٬ سن حاﻻ
قورومله يات سوقاغڭ اورتاسنده بويله دها!
او آنده قارشيكى أودن بر اورتا ياشلى قادين گوروندى:
اوح بنم اوغلم٬ گل ايتمه قيرمه صاقين!
نه ايسته‌دڭ كوفه‌دن ياوروم؟ آغزى يوق ديلى يوق
باباڭ سكز سنه قوللاندى.. هم ده ديردى كه: چوق
اوغورلى بر كوفه‌در٬ قلمادم همان يوكسز..
باباڭ گيدنجه ديمك قالدى عادتا اوكسوز
اونڭله بسله‌يه‌جكسڭ آناڭله قارده‌شڭى
ببكميسڭ دها اوگره‌نمدڭمى سن ايشيڭى
ديدم كه بن ده: - آيول ديڭله اننه‌ڭڭ سوذينى
فقط چوجوق بڭا حايقيردى اكشيدوب يوزينی:
صقالی يوقمى ايشڭ؟ گيت٬ جهنم اول شورادن!
نه ديرﻻنوب دورييورسڭ صباحلين اورادن؟
بنم ايچم يانيور: طاغ قدر بابام گيتدى...
-باباڭ يرنده٬ آدامدن نه ايستدڭ شيمدى؟
آداجغز سڭا باق حال ديلنجه سويلركن
-براق خانم او چوجوقدرقصوره باقمام بن
آدڭ نه‌در سنڭ اوغلم؟ -حسن - حسن ديڭله
ضررلى سن چيقاجقسڭ بوتون بوحدتله
بنم ده ياندى ايچم آڭلاينجه درديڭزى...
فقط باباڭ سڭا اصمارﻻيوب ده گيتدى سزى
او٬ بونجه ييل چاليشوب آلنڭ تريله سنى
نصل بويوتدى؟ بوگون٬ سن ده كندى قارده‌شڭى
يتيم براقمايه‌رق بسليوب بويوتمليسڭ
-كوفه‌يله اويله‌مى؟
-هاى هاى نه‌دن بو سوز لكن
قوزوم٬ عيبمى چاليشمق٬ گناهمى يوك طاشيمق؟
عيب: ديلنجيلك٬ ايشلركن ال٬ يوروركن آياق.
-نه طوغرى سويلدى! اوپ اوغلم عمجه‌ڭڭ ألنى
-اونوتدڭ ويله‌مى؟ بايرامده قومشونڭ گلينى:
حسن٬ دايم ياتى مكتبلرنده ضابطدر؛
سنڭ ده ذهنڭ آچيق.. سويله‌مش اوﻻيدق بر..
قوياردى مكتبه.. طور سويله‌يم ديمشدى هانى؟
اوقوتمه سن ده حمال ياپ بو ياشده شيمدى بنى!
سوز آڭلادم كه اوزون هم ده پك اوزون سوره‌جك:
بنمسه واردى او گون بر چوك ايشلرم گوره‌جك
برقدم اونلرى٬ صاپدم يوقوشلو بر يولدن.
نه اولدى شيمدى عجب كيم بيلير زوللى حسن؟
بزم چوجوق ياراماز٬اوده ديڭلنوب طورماز.
گچنده فاتحه چيقدق ايكندى اوستى براز
كومورجيلر قاپيسندن گيرنجه بز٬دوه‌لر
قيزڭ مراقنى جلب ايتدى٬ داﺌما ده ايدر:
او يامرى يومرو بدن٬ اوپ اوزون بويون٬ او باجاق
او آرقه‌سنده‌كى پوسكول كه قويروغى اوله‌جق
حقیقته‌ّ كوره‌جك شی دكلمی یا؟ دیركن،
دوننجه آركه‌مه، باقدم" بش اون آدیم كریدن.
بلنده أكلیجه بر شال، باشنده آبانی،
بر اورته بویلی، كولر یوزلی پیر نورانی،
یاننده قوس قوجه‌مان بر كوفه‌یله بر چوجاق،
یاواش یاواش كلیورلر. فقط تصادفه باق:
چوسوق، بنم او صباح كوردیكم زواللی یتیم..
نصل ده منظره، غایتله جانكداز و ألیم!
جیلیز باجاقلرینك دیزدن آلتی چیر چیپلاق..
بر اینجه مینتانك آلتنده تتره‌یور، طونه‌جق!
آیاقده قوندوره یوق، باشده وار می فس؟ نه كزر!
دوكوملی آلننك اوستنده ساده بر چنبر.
نفس دكل او صولقلر، برر انین مدید!
نظر دكل او باقیشلر، برر بكای شدید:
بو بر آیاقلی سفالت كه یالن آتاق، باش آچیق،
اون اوچ یاشنده بوروشمش جنین صافی، یازیق!
او آنده مكتب رشدیه‌دن طابورله چیقان
بر أللیدن متجاوز چوجوقكه، منتظماّ
كچركن ایلدیلر اختیاری وقفه كزین..
حسنله قارشیلاشیركن بو صحنه اولدی حزین:
أوت، بو یاورولرك هپسی، پر سدود شباب،
ایدر طوروردی برر آشیان نوره شتاب.
بر آزدن اوینایه‌جق هپسی بونلرك، به أیی!
فقط حسن، باباسندن قالان او پیس كوفه‌یی،
- كه أزمك ایستدی كورمكله‌رهكذارنده -
الی الاءبد چكه‌جك دوش اضطرارنده!
او، یوك دكل، قدرك بر جزاسی معصومه..
یازیق، كناهی نه‌در، بیلمه‌ین شو محكومه!
محمد عاكف