قیبلەم مەردەنم
Jump to navigation
Jump to search
| قیبلەم مەردەنم، قیبلەم مەردەنم | ئامانت فەرزەن وادەی مەردەنم |
| نە حاڵات وەخت وەسیەت کەردەنم | نە ئاکام سەخت گیان سپەردەنم |
| وەسیەتم ئێدەن شای شەم ڕووخساران | بی وە باڵینم چون بەینەت داران |
| بێخۆف و ئەندێش جە کەس نەکەی شەرم | هۆردارە پەردەی حجابت بە نەرم |
| نەپۆشی جەمین شەمس خاوەری | بۆوە زانۆدا چون ئەسمای پەری |
| بنیشە وە بان باڵینم وە ناز | بوانە سوورەی «یاسین» وە ئاواز |
| زووان بە ڕێزەی شەکەر ڕازەوە | دەنگ وە سەدای خاس وەش ئاوازەوە |
| جەمین وە عەرەق بۆ گوڵاوەوە | گۆنا و ئەگریجە و زوڵف خاوەوە |
| جەو عەرەق نە دەور گۆنای مەەپارە | جە سەر بتکێو بگنۆ وە چارە |
| تا دیدەم جە سەیر دیدەی سیات بۆ | نەزارە و نەزەر نازت زیاد بۆ |
| گۆش هەم وە سەدای ڕێزەی ڕازت بۆ | بەو سوورەی شەریف وەش ئاوازت بۆ |
| ئەر سەد جار «قابز» سزا بدۆ پێم | هەنی نیم وە تەنگ گیتن کێشان وێم |
| ئەگەر بەو تەور بۆ ڕۆح ڕەوانم | بیللا وە ئاسان بەرمەشۆ گیانم |
| های چە وەش مەبۆ عومر و زیندەگیم | نە خاک پای تۆ بکەردام تەسلیم |
| ئەگەر وە تەحقیق سەد کۆ گونامەن | ئینشەڵڵا بەهەشت هەشتەمین جامەن |
This work was published before January 1, 1929, and is in the public domain worldwide because the author died at least 100 years ago.
Public domainPublic domainfalsefalse