قیبلەم خاڵ تۆم
Jump to navigation
Jump to search
| قیبلەم خاڵ تۆم، قیبلەم خاڵ تۆم | بە قورئان قەسەم کوشتەی خاڵ تۆ |
| زامدار خەستەی پای دەسماڵ تۆم | سەرعی، شەیدای دەست لال باڵ تۆم |
| پێکیای پەیکان موژەی سیای تۆم | بێ هۆش و خامۆش وەلای دیای تۆم |
| جە رۆ بێ خۆراک شەو بێ خاو تۆم | ئەر موسۆڵمانی، دڵ کەواو تۆم |
| ئەگەر حاڵ زانی، من ب ێ حاڵ تۆم | سەنعانم ئازیز، دین بە تاڵ تۆم |
| شێتم هەم شەیدای یەخەی واز تۆم | فیدای ئەگریجەی مێقراز گاز تۆم |
| قەیس ئەراگێڵ دیدە ی مەست تۆم | مەحبووس دوساخ هەم پابەست تۆم |
| بەهرام! تا وەحشر نمەدپۆش تۆم | قوربان! من غوڵام حەڵقەگۆش تۆم |
| فەرهادێ کۆکەن، جەفابەردەی تۆم | عاڵەم مزانۆ وێڵ و هەردەی تۆم |
| کەسم نەمەردەن عازیەت بار تۆم | دووروا دوور جە تۆ گرفتار تۆم |
| جەفای بێ سفات ئازیز تا وەکەی؟ | بۆی سەردی وەفات ئازیز تا وەکەی؟ |
| تاکەی ڕۆخسارم زەرد بۆ وێنەی بەی | تاکەی هەناسەم بەیۆ پەیاپەی |
| تاکەی چۆن مەجنوون لونگ خەم پۆشم | تاکەی چون کوورەی ئاهیر بجۆشم |
| تاکەی لەیلەکەم بەرگم پەڵاس بۆ | تاکەی تەن ڕێزە ڕێزەی ئەڵماس بۆ |
| تاکەی هێجرانت بەی تەور جاری بۆ | تاکەی خەدەنگت نە دڵ کاری بۆ |
| تاکەی بەرگەکەم قەڵاخی پۆش بۆ | تاکەی عەیش و نۆش جەلام خامۆش بۆ |
| ئەر مروەتت هەن وەسەن کافیەن | چینە زیاتەر بێ ئێنسافیەن |
| وەسەن، کافیەن سەوڵ سایەدار | رەحمێ کەر وەحاڵ ئی بەندەی هەژار |
| تاکەی جە زوان لاڵ بۆ پەی حاڵت؟ | رەحمێ وەجەستەی سفتەی ئەوداڵت |
| هەی زەڕڕەی سفتەی لێوە بمانۆ | مەشهوور بۆ نەعام گشت عاڵەم زانۆ |
| گشت عاڵەم زانۆ زەدەی شەست تۆم | قاتڵ! من مەقتووڵ دیدەی مەست تۆم |
| مۆهرەن وەسەلام «ئەحمەد » داخ نە دڵ | ئازیز! سامازە داخ بەرۆ وە گڵ |
This work was published before January 1, 1929, and is in the public domain worldwide because the author died at least 100 years ago.
Public domainPublic domainfalsefalse