شەرابوو عەشقو تۆ
Jump to navigation
Jump to search
| شەرابوو عەشقو تۆ ساف و زەڵاڵا | بە لەزەت وەش بنۆشای، توندو تاڵا |
| مەدینەش پەی کەسێ تۆ دڵ نەوازی | بەبێ مینەت جە موحتاجی سواڵا |
| مەبۆ مەستی ئەبەد هەرک س مەنۆشۆش | کە ساقی پادشاهی ذوالجَلالا |
| کەسێوەن ئا کەسە، لێوەن بە «ظاهر» | بە «باطِن» عاقڵ و ساحێب کەماڵا |
| نە فکرش هەن جەلاو موڵکی، نە ماڵی | نهۆ باکش جە فورزەندو عەیاڵا |
| نهۆ «مُعجِب» نهۆ بەندەی ڕیا کار | نە مەقسوودش بە دونیا گەنج و ماڵا |
| بە تاقی ئانە پیرەن گێرە دەستش | نهۆ پیری ویەردەی ماهـ و ساڵا |
| درێغ چی کشت و دونیای ئێمە هەرگیز | شکارتێو پەی قیامەتمان نەکاڵا |
| دە یاران وەر بدەیمێ دەس جە دونیای | نەبیمێ شاد پەنەش، شادیش بەتاڵا |
| ئەگەر سەد ساڵ چەنەش مەنمێ بە دڵشاد | چەنەش تا سەر مەنەیمان پەی مەحاڵا |
| هەزار جامێ جە شەربەت ئەر بنۆشمێ | جە ئاخر ژارو مەرگیمان قەتاڵا |
| بە ناگاهـ باخەوان مەبڕۆ بە تێغمان | نیەن ڕەحمش، جە یاوان و جە کاڵا |
| وەنەش فەرزەن بشۆ پی کاروانە | ئەگەر «بُوجَهل»ەنوو، وەر هۆ «بِلال»ا |
| زەڕێومان سەرحیسابەن، خاک وە سەرمان | نە پۆشاک و نە واردەیما حەڵاڵا |
| وەرینان ئەولیای دڵ پاک بێنێ | جە دڵ پاکان ویەردەی کارساڵا |
| جە ڕۆو مێشەر وەبێ پەروامەشانێ | وەلای «جەننەت»، چەنی پەرواز باڵا |
| جە «حلّ» و «سُندُس» و «اِستَبرَق»یشان | خەڵاتی خاس مەپۆشانێ وە باڵا |
| پەی ئێمە موشکیڵەن، بارما گرانا | خەتاوو مەعسیەت، زوڵم و وەباڵا |
| درازو دوور سەفەرمان ها نەوەردا | نە تۆشەی ڕا، نە پۆشاک و نە پاڵا |
| جە پەنجا ئاستان ڕاگیر مەنیشان | ئەوان چێمە مەپەرسانێ هەواڵا |
| جە هەر یاگێو جوابشا وەش نەدەیمێ | «تَوَقُّف»مان هەزارێ پەڕ بە ساڵا |
| جە دیوان و سەبای سا چێش بکەرمێ | نەبا دامان بە دەستی چەپ قەباڵا |
| کەریما، غافِر الذَّنبا، ڕەئووفا | ڕەحیما، بێ شەریکا، بێ زەواڵا |
| بە لوتفی تۆ قەوی ئومێدمانەن | نەبیمێ قەهرو تۆ، دڵمان زوخاڵا |
| ئومێدمان هەن پەنامان دەی جە دۆزەخ | نەک ئێمە حۆرو جەننەتمان خەیاڵا |
| ئیلاهی تۆبەی ئیخلاسمان قبوڵ کەی | قبوڵ تۆبان جە عوسیان چی بناڵا |
| یەقین «إِنّي لَغَفَّارٌ لِمَنْ تابَ» | پەرێ بەخشاییمان شاهێد بە حاڵا |
| شەفاعەت خوای گوناهکاران «موحەممەد» | کە ساحێب عیززەت و جاهـ و جەلالا |
| مەگەر تۆبی تکا کار «یا مُحَمَّد» | وەگەرنا ڕوستگاریمان مەحاڵا |
| خوداوەندا بە فریاو سەیدی یاوی | جە وەختێونە کە مەنزڵ تیرە چاڵا |
This work was published before January 1, 1929, and is in the public domain worldwide because the author died at least 100 years ago.
Public domainPublic domainfalsefalse