شیرین و خوسرەو/80

From Wikisource
Jump to navigation Jump to search
شیرین و خوسرەو  (1735)  by خانای قوبادی
80. جواب دادن شیرین خسرو را به غمزه
دیسان شەربەتدار ڕێزەی قەند بێزان قیامەت قامەت قیامەت خێزان
بەی تەور دا جواب شای بورجیس ئەفسەر جە دورج یاقووت ڕێزنا گەوهەر
وات تا کە خەرگەی زەیبەقیی گەردوون بێ مێخ و تەناف، بێ ڕشتە و ستوون
جیلوەگەر نە ڕووی عەرسەی زەمین بۆ شەهەنشا نە دەور دارا نگین بۆ
ئێد کە شا فەرماش مەحز خیلافەن ڕاستش هەر نیەن، درۆ و گەزافەن
غەیر جە من فێشتەر جە ڕای گومڕاهی پەی تۆ کەردم تەرک ئەورەنگ شاهی
ڕازی بیم بەی قەسر چۆڵ وێرانە وێم کەرد جە سەودات ڕیوای زەمانە
تۆ جە کۆ کێشات پەی من دەرد سەر؟ جە کۆ وێنەی من زامت بی خەتەر؟
ئەی هوو من جە تۆ فڕین غوبارم پەی چێش یەند وە پووچ مدەی ئازارم؟
مەر تۆ عاشقی بە وێت منازی عاشقی دوورەن جە سەرفەرازی
عاشق وێنەی من سەودا سەخت مبۆ نە عاشق ساحێب تاج و تەخت مبۆ
شا بە شاهیی وێش شوکر مەغروورەن شاهی جە دەستوور عاشقی دوورەن
غەیر جە تۆ فێشتەر هەناسەم سەردەن ڕەویەی عاشقیم هەر بە ڕا بەردەن
وەرنە تۆ جە ڕای عاشقی دووری بە ئەسباب و گەنج شاهی مەغرووری
من جە مەی عەشقت تا جامێ وەردم تەرک تاج و تەخت شاهیی وێم کەردم
یا جەی قەسرەدا چەنی با خەم بەستەنم چون چین تای زوڵف وێم چەم
جە گەرمیی سەبوون سۆچیان جەرگم بێزارم جە عومر، ڕازیم وە مەرگم
بە جای جام یەخ ئاو گەرم نۆشم چون دیگ بوریان دەروون پڕ جۆشم
دایم نە گوڵزار مۆغان ئەرمەن مکەردم گوڵ گەشت چون ئاهووی خوتەن
ئیسە ها جەی قەسر شۆرە زەمیندا جە گەرمی مدەون هەڕ بە جەمیندا
جەی قەسر دەربەست من بەی ڕەنجووری بە ئومێد تۆ کەردم سەبووری
خۆ واتن خەیلێ شەرت و وەفاتەن نەزانام بەی تەور جەور و جەفاتەن
سا چون بەی تەورەن جەور و جەفای تۆ جە حەد ویەردەن زوڵم و سزای تۆ
جەی زیندەگانی وەشتەرەن مەردەن سەرم بە شمشێر تۆ تەسلیم کەردەن
بزان زەڕڕەی عەشق تۆ کەردەن خوارم جەی سۆنگ و سەبەب جە گیان بێزارم
وەرنە من هێمای چون سەوڵەن باڵام بازارم گەرمەن، ڕەنگینەن کاڵام
هێمای گوڵ غونچەی باغم نەشکفتەن ئەڵماس دانەی دوڕ نەجم نەسفتەن
هێمای تاف جۆش نەوجوانیمەن دەعوای تاج و تەخت جیهانبانیمەن
دیدەم چون هیندووی ئاتەش پەرستەن بەڵا پەی کەسێ بە دین دروستەن
ڕوخسارم شۆڵەی شەمع خۆر بێزەن سوپا کیبر و ناز، غەمزەم خوون ڕێزەن
خورشید حەیرانەن شوعلەی جەمینم قەمەر بێ نوورەن چون نە کەمینم
نە شەوق دیدەم ئەنجوم پەرێشان جە عەکس سوهام نوور بیەن بێ شان
هەم وەلی نیعمەت عەتر و عەنبەرم وەلی عەهد شەهد شیرەی شەکەرم
شەو شەم جە چرای حوسنم پەروانەن شاهان عاڵەم پەرێم دێوانەن
زنجم جە نارنج بەغداد بەردەن ڕەنگ لاڵ جە لەبانم سەر مدۆ بە سەنگ
دورج دەهانم پرەن جە گەوهەر بەهاشەن خەراج ئوڵگەی هەفت کیشوەر
ئەر بشنەوان عەتر خاڵان لیمۆم یا بۆیێ جە زوڵف سیای عەنبەر بۆم
ماوەران پەرێم تا بە ڕۆی مەردەن ئاهووی خەتا و چین خەراج بە گەردەن
گوڵشەن چون حوسنم ڕەنگ و بۆش نیەن چەمەن چون باڵام سەوڵ نۆش نیەن
غونچەی دەهانم چون گوڵ ڕەنگینەن بەهای هەر ماچم موڵک ماچینەن
بە سیلسیلەی زوڵف سیای بۆ عەبیر سەرکەشان چون تۆ مکەروون زنجیر
شیرینەن وێنەی نام وێم ڕازم کوشندەن چون تیر نیگای وێم نازم
پڕ شیکەن گێسووم، بۆ عەبیرینەن چون حەڵوای شەکەر لەفزم شیرینەن
بە غەمزەی خوون ڕێز چەند کەسم کوشتەن بە خوون چەند کەس پای تەوقم ڕەشتەن
ئیسە و بێ زام، وە بێ جەفایی بەرشۆ پەرێ ویت تۆ بە سەفایی
وێت بەرکەر وە بەر، خۆف کەر جە لەنجەم ئەر نەشناسی کێم «شیرین گەنجە»م
مەبادا بە تێغ ئەبرۆی زام خەتەر بیاوۆ بە زات پادشا زەرەر