| ئوستای شەربەتدار بەی تەور بەی شەکەر
|
شیرین کەرد ئەی قورس حەڵوای موزەعفەر
|
| یەک ڕۆیێ خوسرەو زیلل ئیلاهی
|
نیشتەبێ بە شاد، بە تەخت شاهی
|
| شاهان جەم قەدر، دارای هەفت کیشوەر
|
بەزم پابۆسش بەستەبین کەمەر
|
| نە پای پێشگاش نیشتەبین شاهان
|
جە چین تا بەغۆر، ڕەی تا ئەسفەهان
|
| سالار خوتەن، تا پادشای زەنگ
|
بە شادیی خوسرەو جام مەی بە چەنگ
|
| سا وەختێ جە زۆر شەراب بی سەرگەرم
|
هۆرداشتن شاهان جە ڕوو پەردەی شەرم
|
| شەهەنشای جەم بەزم، سکەندەر ئەفسەر
|
جە دورج یاقووت ڕێزنا گەوهەر
|
| فەرما: نە کام موڵک مەحبووب فێشتەرەن؟
|
نیگاشان نە جەرگ وێنەی نەشتەرەن؟
|
| یەکێ وات: نە ڕۆم وڵات قەیسەر
|
مەحبووب بێ حەدەن، جە حەد زیادتەر
|
| یەکێ وات: ئەرمەن پەری زادەشەن
|
مەی بەخش و مەی نۆش مەیل بە بادەشەن
|
| یاگەی مەحبووبان ئەرمەن زەمینەن
|
نە خوتەن، نە ڕۆم، نە موڵک چینەن
|
| وەختێ کە ئەو شەخس نام ئەرمەن بەرد
|
خوسرەو جە دڵدا کێشا ئاهـ سەرد
|
| نیهایەت جە شەرم شای والا سیفات
|
سەرش وست نە وەر «قَطعاً» هیچ نەوات
|
| یەکێ وات: لایق سەرکار شاهان
|
«شەکەر» نامێ هەن ها نە ئەسفەهان
|
| سەوگەند بە تاجت شای دارا میغفەر
|
ئەسفەهان میسرەن، شەکەر نەی شەکەر
|
| ئەگەر بدیایەش یۆسف جە کەنعان
|
شیت مبی پەرێش چون شێخ سەنعان
|
| بۆی عەتر زوڵفش مشۆ بە فرسەخ
|
جۆیاشەن شاهان هیند و چین و بەڵخ
|
| بەڵێ ئەوەند هەن ئەو نازک نازە
|
ئەو شیرین شێوەی شەکەرین ڕازە
|
| هەر هام پیاڵەی مەی پەرستانەن
|
هەر شەو بەزمێ شەکەر ستانەن
|
| دایم خاتر شاد هەر وەش دەماخەن
|
چەنی بزورگان دایم گوستاخەن
|
| ئەر ببۆ پشتان باڵاش یەک شەوێ
|
بەگێ، بەگلەرێ، خانێ، خوسرەوێ
|
| جە لاشان نەرمیی نەرگس جە گوڵزار
|
منمانۆ بەتەر جە سەر مەودای خار
|
| غەرەز جە نەسرین نازکتەر ئەوەن
|
چون شەهد شیرین شەکەر هەر ئەوەن
|
| خوسرەو زائیقەس جەو شەکەر شکەن
|
شیرین بی چون ڕاز شیرین ئەرمەن
|
| خەیاڵش ئێد بی ئەو دارا ئەفسەر
|
مەر بەیۆ بە ڕا شیرین بە شەکەر
|
| غەرەز مکەرد سەعی مەر بەیۆش بە دەست
|
جە قین شەککەر شیرین سەرمەست
|
| نەک بە گشت دڵێ، هەر بە زوانی
|
بە شیرین مکەرد فەرەس دەوانی
|
| وەرنە جە لای ئەو کەیانی ئەفسەر
|
کەی وێنەی «شیرین» شیرین بی «شەکەر»؟
|
| نە جە شەکەر لەب دڵ منیا یەکسەر
|
نە جە ئەسفەهان پێش ماما شەکەر
|
| بەی وەسواسەوە ئەو شای بەرز ئیقباڵ
|
سەبر خەیرێ کەرد تا موددەی یەک ساڵ
|
