شیرین و خوسرەو/69
Jump to navigation
Jump to search
| ←68 | شیرین و خوسرەو (1735) by 69. نامه فرستادن شیرین به نزد خسرو |
70→ |
| قاسید ئاوەردش بە دەوان دەو | جەواب نامەی شیرین پەی خوسرەو |
| دیا بە نامەی شیرین ئەرمەن | خوسرەو چون تووتی بی شەکەر شکەن |
| حەیران مەند بە نەزم بۆ عەبیرینش | بە حەڵوای مەزموون ترش و شیرینش |
| شەهەنشای جەم بەزم سورەییا سەریر | ئاخر شی نە فکر خەزانەی زەمیر |
| وات یە جەوابەن نە غەوغا و جەنگەن | کوڵۆخ ئەنداز هەر پاداشش سەنگەن |
| بە سزای کەسێ نامەی ناخۆشێ | بنویسۆ وەلای شۆخ سەرکەشێ |
| ئاخر چون مریەم بادەی مەوت نۆشا | خوسرەو پەی شیرین هەم جەرگش جۆشا |
| پەی چێش؟ کە مریەم شووم دڵ جە سەنگ | چون خار پێکابێ نە دامانش چەنگ |
| هیچ نازاش هەرگیز ئەو زوڵف عەبیرین | خوسرەو بوینۆ دیدار شیرین |
| جەو سەبەب خوسرەو جە دەست مریەم | بە شەو تا بە ڕۆ هەر مکێشا خەم |
| وەختێ کە فەوت بی ئەو کەیوان مەقام | نە ڕووی عەرسەی دەور مەحفووز بی تەمام |
| بەڵێ جامێ ئاو جە پەی بێ کەماڵ | وەشتەرەن جە عومرپڕ عەیش سەد ساڵ |
| پەی چێش؟ جە دمای خەسمێ سەرکەشەن | ڕوێ بویاری دنیا هەر وەشەن |
| چونکە شا جە دەست ئەو شەیتەنەتوار | ویاراش چەندێ بە تاڵ ڕۆزگار |
| جە نەو تەڵخیی عەشق ئەو جە حەد ویەرد | جە شیرین دیسان شەکەر دەرخوا کەرد |
| بە چەربی و نەرمی چەند نامەی شیرین | کیاست پەی شیرین زوڵف بۆ عەبیرین |
| شیرین مونقاد بی ئەو بە فەرمانش | نە دڵ دەرێ داشت ئێد بی دەرمانش |
| بەڵێ ئەو شەش دانگ شۆخ شاباز بێز | نە خەیاڵشدا ئێد بی کە پەروێز |
| بە دیدە و بە گیان بە دڵ یارش بۆ | شیرین تەر جە وێش تەڵەبکارش بۆ |
| بە ڕەسم شاهان فەرەنگی و ڕووسی | بکەرۆش بە عەقد نیکاح عورووسی |
| جەی سەسەب دایم غەمزە و ناز مکەرد | هەر ڕۆ خیشم ئالوود ڕێزەی ڕا مکەرد |
| بەڵێ جەلای ئەهل دانای دیاری | خاس نییەن کەرۆ کەس تێز بازاری |
| مەتای هەرکەسێ خریدارشەن | ئەو زوو بوورەشۆ سەرفەی کارشەن |
| دەوڵەتمەند ئەوەن کاڵای وێش دایم | چون ڕەواجش بۆ نەکەرۆش قایم |
| خوسرەو پەرێ وەسڵ شیرین دڵبەر | هەرچەند سەعیش کەرد نەبی مویەسسەر |
| بێ حەد پەی وەسڵش سزا و مەینەت بەرد | ئەوجا غەمزە و ناز موویێ کەم نەکەرد |
| وەختێ عاجز بی خوسرەو جە نازش | جە توندی و ترشی، جە ڕێزەی ڕازش |
| دەرمان کەرد بە سەبر جەرگ پارەی وێش | داش بە دەست عەقڵ تەدبیر چارەی وێش |
| شایەد کە شیرین فرێ شۆخ و شەنگ | بە ڕاهێ هەموار باوەرۆ بە چەنگ |
| جە جایێ هەنیچ گەرم کەرۆ بازار | شایەد کە ئەو شۆخ پێش ببۆ هەموار |
| جەی سەبەب بە گەرم شڵی بڵند ئیقباڵ | جە دانشمەندان مپەرسا هەواڵ |
| مەر بگنۆش بە دەست شۆخێ عەنبەرین | بوازۆش جە قین بێ مەیلیی شیرین |