شیرین و خوسرەو/33

by خانای قوبادی

←32

شیرین و خوسرەو  (1735)  by خانای قوبادی 33. آمدن شیرین به خیمه‌ی خسرو با کنیزان و مقالات بیت خواندن ایشان

34→

شەوێ میشکینتەر جە زوڵف شیرین	نەسیمش پڕ عەتر، هەواش عەبیرین
ساراش جە شەمیم وەشبۆی بەهاری	مبەخشا نەفحەی عەتر عەتتاری
هەواش چون ئاهووی شۆخ خەتایی	مکەرد نە سارا نافە گوشایی
جە میشک ئەفشانی باد تەرەبناک	عەنبەر مبێزا عەتر نافەی خاک
زەمین چون یەتاخ مودبیرەی تاتار	مواتت تێشدان کۆی میشک بە خەروار
مدرەخشا نە بورج چەرخ ئەخزەری	کۆی زەڕڕین مانگ، زوهرە و موشتەری
نە قیرتاس سەوز تاق زەڕڕین تەوق	عەتارید مکەرد ئینشای مەشق زەوق
گۆشەی سورەییا چون دوڕر مەکنوون	ڕەخشان کەردبێ گەنجینەی گەردوون
زەمزەمەی مورغان ڕەنگین شەوخێز	سەدای عەیش بەزم وەستەبێ و بێز
خوسرەو نیشتەبێ وێنەی ئەسکەندەر	نە بارگەی بۆ میشک مورەسسەع گەوهەر
جە فەڕ فەیرووز فەرخوندەی شاهی	نماناش نە چەم جە مەهـ تا ماهی
بەغەیر جە دڵدار شیرین دڵبەر	بێزار بی جە تەخت، جە تاج و ئەفسەر
ئەو شەو یەک شەخسێ زوڵف بۆعەبیرین	کیاست وە پای تەخت فەڕبەخش شیرین
فەرما واچە پێش هەی نوور عەینم	ڕەونەق بەخش ڕەنگ ئاینەی زەینم
جە عەرسەی وەسیع دارای هەفت کیشوەر	شەوێ جە ئەمشەو نمەبۆ خاستەر
هەواش بۆی بەهەشت هەشتەم مبێزۆ	گەرد میشک جە باد ساراش مخێزۆ
چێش مبۆ ئیمشەو تا بە سوبح دەم	بنیشم بە شاد چون جەمشید جەم
جە نەشئەی شەراب شیشەی عەنبەربۆ	بەر کەرمێ نە دڵ کۆگای خەم کۆکۆ
شیرین چون چەنی بانووی دڵپەسەند	جەناب خوسرەو وەردەبێ سەگەند
متەرسا و مکەرد بە ڕۆ تا بە شەو	فرێ ئیحتیات جە کار خوسرەو
ئاخر لا عیلاج ئەو شای شیرین ڕەنگ	چەنی دە کەنیز زوڵف و خاڵ سێوڕەنگ
خاستەر جە میشعەل فرۆزەندەی شەو	کەردشان ڕەوشەن مەجلیس خوسرەو
سۆسەن بۆی گوڵ بووم، کەڵاف عەنبەربۆ	شیرین شەش دانگ شای فریشتە خۆ
نیشت بە شاد چەنی جەقەی نەوهاڵان	جە بەزم بۆ میشک شای کەمەر لاڵان
هەم ئەو شەو فەرماش شازادەی	دە کەنیز شۆخ گوڵ بۆی گوڵ دەهەن
«- - - - -» «پەریزا»ی بۆ ناف	«سەوڵ باڵا»ی سەرمەست، زوڵف دەستەی کڵاف
«سەمەن تورک» شۆخ جەمین جام زەڕ	دڵشاد «گەوهەر موڵک» وێنەی سەوڵ تەڕ
»فەرەنگیس» شۆخ نەوڕسیدە نوو	«عەجەب نۆش» چون چەرخ تەوار خۆش خوو
«هومیلان» شۆخ باڵا زەڕ ستوون	چون ئاهووی خوتەن هەم «خوتەن خاتوون»
گردین جەم کەردن نە خەرگەی خوسرەو	سۆ سەندن جە شەوق شوعلەی شەمع شەو
شاپووریچ مدرا دەست وە بان دەست	نە پای زەڕڕین تەخت پەروێز سەرمەست
جە دمای نۆشان بادەی خۆش گەوار	فەرما پێشان شای فەریدوون تەبار
هەر یەک چون تووتی بەزم ئەسکەندەر	حەرفێ جە شیرەی شەکەر شیرینتەر
بواچان نە بەزم تا شەق مبۆ شەو	بە بەست ئەحواڵ شیرین و خوسرەو