شیرین و خوسرەو/28

From Wikisource
Jump to navigation Jump to search
شیرین و خوسرەو  (1735)  by خانای قوبادی
28. به هم رسیدن خسرو و شیرین در شکارگاه و آشفته هم گردیدن
ساقیی ئەی بادەی بەزم بەهەشت بێز بەی تەور سوراحیی زەڕڕین کەرد لەب ڕێز
ئەو ڕۆ کە خوسرەو بە موغان یاوا شیرین چون حوریی «جَنَّة المَأوىٰ»
چەنی سوپا و سان سیا کەمەندان تۆق تۆق جە یاران، پۆل پۆل جە ڕەندان
نە سارای موغان شەراب موەردن مەست مەست و شۆخ شۆخ شکار مکەردن
جە ناگا خوسرەو دانای خاس خەیاڵ یاوا بە شیرین سەوڵ سۆسەن خاڵ
هەردو چون سوورەت نەقشکەندەی سەنگ مدیان بە هەمدا بێ سەیدا و بێ دەنگ
خوسرەو چون شاباز شەش دانگ شاهی شیرین وێنەی سەوڵ ڕشتەی ئیلاهی
خوسرەو چون خورشید درەخشندەی نوور شیرین چون تەرسای شێخ سەنعانی
یەکێ جە یەکێ شۆخ و شەنگتەر بین هەردو پادشای ساحێب ئەفسەر بین
منمانا جە دوور ڕوخسار پەروێز خەت چون وەنەوشەی گوڵ باخچەی نەوخێز
دەستەی زوڵف لوول سیای عەنبەرین مبەخشا شۆخی بە شێوەی شیرین
شیرین جە شۆخی و شیرینیی خوسرەو جە دەستە کاکوڵ پەخش چینیی ئەو
زەڕڕێ عەقل و هۆش پێش نەمەندەبێ بە بانشدا بووڵ بانان شەندە بێ
خوسرەو جە شێوەی شیرین پڕ شەوق ملەرزا جە شاخ سەهی سەر و جە زەوق
ئەرواش بەردەبێ نیم نیگای نازش شیرینیی ئەندام شۆخیی ئەندازش
ئەوان کەردشان تەماشای یەکتەر عەقڵ و هۆش فام بەرشیشان جە سەر
ئاخر هەردووشان لەب تەشنە و هیلاک نە پشت سەمەند کەفتن نە ڕووی خاک
ساتێ وێنەی مورغ بیسمیل نە سارا خڵتیان نە خاک بە بێ مدارا
جەو دما نە خاک خەم سەر هۆردەردەن بە یەکدا زاری فراوان کەردن
عاقبیت یاران دانەی خاڵ بەدەخش بە دەو پەرێشان حازر کەردن ڕەخش
سوار بین بە ڕەخش ئەو هەردو دڵبەر یەکێ وێنەی شەمس یەکێ چون قەمەر
وەختی سوار بین شیرین و خوسرەو پەی گەشت گوڵزار ڕاهی بین بە دەو
یاران حەیران بین جە یەک ڕەنگیشان جە شێوەی شیرین شۆخ و شەنگیشان
قیاس مکەردن ئەو نەونەمامان شیرین بە بەڵقیس، خوسرەو سولەیمان
سوپای نەوهاڵان چەنی چەنگ و دەف نە دەور خوسرەو شیرین بەستن سەف
شیرین جەو دەمدا هۆرکێشا جڵەو عەرز کەرد بە جەناب جەم قەدر خوسرەو
واتش فیدات بام شای فەریدوون فەڕ سالار شاهان تاج و کەمەر زەڕ
جیهاندار جەیش حیشمەت پەناهان تاج و دهیهیم بەخش فەرخوندە شاهان
چێش مبۆ بە فەڕ فەڕڕوخ بار وێت هۆرگێری نە خاک پەرستار وێت
چەندێ چەنی هەم بنیشمێ بە شاد بە بادەی گوڵڕەنگ خەم بدەین وە باد
خوسرەو وات هەی سەوڵ گوڵ باخچەی ئیرەم دەوڵەتت زیاد سایەت نەبۆ کەم
بە کێش هەرکەسێ عالیجەنابەن غەریبنەوازی خەیلێ سەوابەن
عەیب نیەن جە لوتف ڕای سەرفەرازی غەریبێ چون من ئەگەر بنوازی
شیرین ئێد شنەفت جە لەفز خوسرەو قاسیدێ کیاست بە دەوان دەو
جە فەڕڕ تەشریف شای والا تەبار مەهین بانوو کەرد دەرسات خەبەردار
سوار بی بانوو بە دەوان دەو ئاما وە پێشواز فەڕبەخش خوسرەو
جە دێبای نەفیس کارخانەی فەرەنگ کێشا پێشکەشش بە سەد هەزار ڕەنگ
ئاوەردش بە قەسر زەڕنیگار وێش نیشاناش بە تەخت چون شاهان پێش
خوسرەو نیشت نەو تەخت ئاڵای عەبیرین خاترشاد بە شەوق دیدار شیرین