شیرین و خوسرەو/24
Jump to navigation
Jump to search
| ←23 | شیرین و خوسرەو (1735) by 24. فوت شدن هرمز و خبر رسیدن به خسرو |
25→ |
| مونشیی خوشنویس بەلاغەت ئایین | خاستەر جە شاپوور خیرەدمەند چین |
| بەی دەستوور بە ئاو تەڵا و لاجیوەرد | سەرلەوح ئەی لەوح جەدوەلکاری کەرد |
| کە پەروێز بەور شای فەڕڕوخ شیعار | نیشتەبێ بە شاد ڕۆیێ بە هوشیار |
| ناگا قاسیدێ دڵ خاتر خەستە | قامەت چون چەمەی چەوگان چەم بەستە |
| چون کاسەی چینی پڕ جە ئەسرین چەم | پیشانی پڕ چین چون چەرخ پا دەم |
| ئاما وات هورمز نیگوون بی بەختش | تەختەی تابووت کەرد فەڵەک بە تەختش |
| بە جای زەڕڕین تاج شاهی جە وەتەن | نیاشان جە فەرق کڵاوچەی کەفەن |
| مەرحووم بی جە قەسر ئاڵای زەر نیگار | جە دەیهیم و تاج، جە تەخت و تۆمار |
| ئیسە ئەو جەم قەدر دارای داراکێش | سای سەنگ ئەڵحەد بی بە ماوا و جێش |
| غوڵام یەک ڕەنگ جون یار جانی | جەلاش کەردبێ عەرز نیهانی |
| نۆگەی پەروێزەن وەخت فرسەتەن | تەشریف شەریف باوەر بەی وەتەن |
| تەی کەرد بە تاجیل دەشت و کۆ سارا | نە جایێ یەک سات مەکەر مدارا |
| وەختێ جە قاسید عەرزەی ئەو غوڵام | ئێد یاوا بە سەمع شای فەڕڕوخ مەقام |
| زاناش کە گەردوون شووم نامەردەن | تا سەر چەنی کەس بەسەر نەبەردەن |
| مەعلووم بی جە لاش دنیا بەد تەورەن | عەجووزەی بێ شوون، پڕ مەکر و جەورەن |
| ئەر منیۆت نە فەرق وێنەی ئەسکەندەر | تۆمارێ جە لاڵ، تاجێ جە گەوهەر |
| سەلاح هەر ئێدەن پێش نەوی مەغروور | پەی چێش؟ بێ شەرتی کەردەن بە دەستوور |
| کاتێ مزانی نە ڕووی کائینات | تاج و تۆمارت گشت وەست بە میرات |
| ئەی دنیای بێ شەرت، ئەو شەربەت دارەن | کە شیرەی قەندش ئامیتەی ژارەن |
| دایم و دەرهەم پەرێ میمانش | پڕەن جە ترشی شیرینی خوانش |
| حەیا پێش نیەن لێش مەبەر غافڵ | حەڵوای گوڵ قەندش جە زەهر قاتڵ |
| شادیش بێ شیوەن، زەوقش وە بێ خەم | نە ڕووی سەرزەمین کەس نەدیەن وە چەم |
| هیچ نەفێ جە چەنگ بەڵاش نەڕەستەن | سەبووی کێ وە سەنگ میحنەت نەشکەستەن |
| کێ بە کەدووی ئەو نۆشا ئاو سەرد | نەوی جە ئیسقا وێنەی کەدوو زەرد |
| چونکە بێ تەورن شەرت و ئایینش | پەی چێش سا کەسێ شاد بۆ بە دینش |
| «خانای قوبادی» ئەر ساحێب هۆشی | جە شیشەی دانش جام مەی نۆشی |
| جە زەوق و زینەت دنیای دوونپەروەر | چون عیسای مەریەم وێت مەجەڕڕەد کەر |
| پەی چێش؟ کە ئەسباب دنیا بە تاقی | پەی کەس تا بە سەر نمەبۆ باقی |
| بێ شەرت و بێ شوێن، بەین نادروستەن | دەها چەند شاهان جە شاهی وەستەن |
| کەسێ چون شاد بۆ بەی زیندەگانی | ئەر سەد ساڵ مەنۆ هەر مبۆ فانی |
| مەردی جە ڕەفتار ئەی دنیا دوورەن | ئەبلەهـ کەسێوەن پەنەش مەغروورەن |