سەنگ هەواران
Jump to navigation
Jump to search
| سەنگ هەواران، سەنگ هەواران | سەنگ سیاڕەنگ سفتەی هەواران |
| مەلوول ماتەم پەس مەندەی یاران | چون من هام شەریک دەرد و پەژاران |
| تۆ سەنگ کۆنی یە کام هەوارەن | یە پەی کێ ڕەنگت ئازیەت بارەن |
| سفتەی سەودای عەشق کامین نەوهاڵی | بێدەنگ بە دڕەنگ مات مەلالی |
| تۆ جە داخ کێ سفتە سۆزانی | پەس مەندەی هەوار کامین هۆزانی |
| ڕاس واچە هجران کێت نە دڵ داخەن | جە هجران کێ بەرگت قەڵاخەن |
| سەنگ وات سیابەخت ستەم کێش خەم | «پەروانە»ی پەشێو دوور کەفتەی پای «شەم» |
| مەر نمەزانی لێڵاویت لێڵەن | نە ئیجا مەسکەن گوزەرگای خێڵەن |
| یوورت چەراگای خێڵ جافانەن | جای عەیش و نشات عەنبەر نافانەن |
| هەوارگەی ڕەوێڵ خێڵ مورادیەن | ماوای شەوق و زەوق زومرە شادیەن |
| من هەوار شەم شای پەروانانم | خان خاڵخاسان سیایانانم |
| پاییز کۆچ خێڵ بیان وە دامان | تەشریف باوەران وەی زێدو زامان |
| من سفتەی ئەو شەوق شۆڵەی شەم چارەم | داخێن ئەو نوور سەحەر ستارەم |
| ئێد کە واتش پێم سەنگ هەواران | من جە ئەو بەتەر لاڵ بیم جە زبان |
| زانام سفتەی شەوق ئەو شەم ڕوخسارەن | داخدار داخ مای دەست ئەو یارەن |
| منیچ جە هجران شای شەم ڕوخساران | با بیم وە هامڕەنگ سەنگ هەواران |
| تەن چون سیاسەنگ هەوارانمەن | پادشای خەمکێش خەم دارانمەن |
This work was published before January 1, 1929, and is in the public domain worldwide because the author died at least 100 years ago.
Public domainPublic domainfalsefalse