سپين مخونه تور کودي شي په پيري کښې

From Wikisource
Jump to navigation Jump to search
سپين مخونه تور کودي شي په پيري کښې
by رحمان بابا

سپين مخونه تور کودي شي په پيري کښې
سم قدونه کوږ لرګي شي په پيري کښې

لکه شمع د سحر افتاب د ژمي
هم بې تاب و هم زېړی شي په پيري کښې

يو طرف ته يې سر رږدي بل خوا درومي
خپل صورت تمام پردی شي په پيري کښې

مړلا ښه وي پس له مرګه بيا ژوندی شي
نشته دا چې څوک زلمی شي په پيري کښې

که څه وخوري لکه زهر نه درېږي
نه څه څښی اؤ نه خوړی شي په پيري کښې

دا ځواني ده چې څه اوري يا څه ويني
نه ليدی شي نه اورېدی شي په پيري کښې

ای رحمانه پيري هسې عاجزي ده
که رستم وي زړه پری سوی شي په پيري کښې


This work was published before January 1, 1929, and is in the public domain worldwide because the author died at least 100 years ago.