سوڵتان ئیبراهیم و نۆشافەرین/40

From Wikisource
Jump to navigation Jump to search
سوڵتان ئیبراهیم و نۆشافەرین  (1765)  by خانای قوبادی
40. هێرشی ئەلیاس و مەلیک تووفان بۆسەر شازادە بە مەبەستی بردنی نۆش ئافەرین
وەختێ شازادە نەزدک بی بەو جا دەردەم قاسێدان تەمام بین ئاگا
دەردەم قاسێدان خەبەر ئاوەردن ئەلیاس هەم تووفان خەوەردار کەردن
واتن کە بەهمەن چەنی شازادە ها ئاما وەی جا وێت کەر ئامادە
جە سەحرای هاموون ئەونە شەڕ کریا سپای ئەلیاس شا تەمام قڕ کریا
ئەلیاس چون شنەفت ئەی خەبەر بە گۆش دەردەم دەرساعەت دەمێ بی بێ هۆش
چون ئاما بە هۆش وات مەلیک تووفان ئەگەر من یا تۆ بشین وە مەیدان
مەعلووم مەزانوو ماوەرین شکەست هەم مەبین وە پەند تا یەومولئەلەست
مەسڵەحەت ئێدەن بشین وە پێشواز باوەرین پەی شاربە سەد عیزو ناز
چەند پێشکەش بەرین پەی شێر خوونخوار بەدڵنەوازی باوەرین وە شار
چەند شەب چون غولام خدمەتش کەران فیکر شەڕوشۆڕ نە دڵ بەرکەران
بەعد از ئان داروو بوزین نە خوان تاکە دەست کێشۆن نە ڕووی تەعامان
وەختێ کە داروو باوەرۆ خرۆش هەردووشان دەردەم هەم مەبۆن بێ هۆش
ئەوسا جەو دەمدا عەلاجش کەریم زەنجیر نەگەردەن وە پێش ماوەریم
داشان بەوەزیر پێشکەش بەدڵواز شازادە هەر دوو لوان وە پێشواز
هەردووشان باهەم پێشوازی کەردن پەرێ مێهمانی ئیستێدعا کەردن
بە مەکر و بەفەن حیلە کەردشان شازادە بەشار خەتا بەردشان
ماهـ زەڕئەفشان هەم نۆش ئافەرین بەردن نە حەرەم ساف عەنبەرین