سوڵتان ئیبراهیم و نۆشافەرین/29
Jump to navigation
Jump to search
| ←28 | سوڵتان ئیبراهیم و نۆشافەرین (1765) by 29. ڕزگارکردنی نۆش ئافەرین و بێچووی ڕوخ لەلایەن مەیموونە خاتوونەوە |
30→ |
| خانای قوبادی حەکاک وەرین | واچە زەلیلی شای نۆش ئافەرین |
| ئەرێ پیرە چەرخ ئینە کارتەن | ئینە شەرت و شۆن ڕۆزگارتەن |
| شاباز شۆخێ چون نۆش ئافەرین | مەدەری بەدەست دێوان لەعین |
| نەکەچ ڕەفتاری شەرمێ نییەن پێت | خەجاڵەت نمەوی تۆ وە کردەی وێت |
| دێو بەدسرشت غەزەب کەرد نەکار | هەرسێ هەوادا پەی شەرارەی نار |
| ناگا بەتەقدیر پادشای بێ چون | پەیدابی دەردەم مەیموونە خاتوون |
| جە هەوا زانا نۆش ئافەرینەن | زەبوون و زەلیل دەست لەعینەن |
| وێش یاونا پێش دەست دا نە باهۆش | ڕەها کەرد جە نار ماهـ قەسەب بۆش |
| پەرێ بەچەگان هەم حەمڵە کەردش | هەردوو جە ئاهیر خەیلێ دوور کەردش |
| نیگا کەرد زەلغەم دێو سیابەخت | ئاما پەرێشان وە تەعجیل و جەخت |
| ناگا پەیدا بی مورغ دڵگوزین | شازادە ئاوەرد ئەو جە سەرزەمین |
| شێر دڵاوەر زەلغەم دی نە دوور | پەی یاران مەشۆ تەعجیل بەزەروور |
| دەست بەرد پەی شمشێر شێر زەبەردەست | وێش یاونا پێش ڕای گورێزش بەست |
| دا وە کەمەربەند دێو بەدسرشت | کەردش بە دوونیم تا کەمەرگای پشت |
| نەعرەتە پێکا دێو بەدنەژاد | ڕوحش بە مالیک جەهەنەم بی شاد |
| شازادە، زەلغەم وست نەتوی ئاتەش | سوزنا تەمام ئەو دێو ڕووڕەش |
| مەیموونە خاتوون زوڵفان عەنبەرین | نیگا کەرد خەیلێ بە نۆش ئافەرین |
| دیش نەحەرارەت ئاتەش بێ هۆشەن | وێنەی بێ ڕۆحان دایم خامۆشەن |
| واتش شازادە دڵ ماوەر وەغەم | نۆش ئافەرین وەنەزد خۆم بەم |
| نیا وەڕووی تەخت ڕوو وە باڵا کەرد | تا بەگوڵستان ڕەوزەی ئیرەم بەرد |
| هەم تەختێ ئاما جە نەوی پەیدا | تێدا نیشتەبێ وێنەی پادشا |
| شازادە وات ڕوخ ئەی تەخت زەڕکار | کێن نەسەر تەخت گرتەنش قەرار |
| دیارەن بوزورگ عەزیم شانەن | پەریی سەروەرەن وا لێم عەیانەن |
| وات عەبدورەحمان عالی مەکانەن | پادشای بوزورگ شای پەرییانەن |
| مەیموونە خاتوون هەم کناچە شەن | نۆش ئافەرینش بەردەن وەگوڵشەن |
| شازادە شنەفت شی وە پێشوازش | هەم شا چەنی ئەو کەردش نەوازش |
| واتش وەش ئامای ئەی بەرگوزیدە | خاک قەدەمگات وە بانن دیدە |
| خاترت جەم بۆ جە نۆش ئافەرین | مەیموونە خاتوون بەردەن وەگوڵچین |
| مەکەرۆ دەوای دەفع بێ هۆشی | بەرشۆ نەفەرقش مایەی خامۆشی |
| شا وات شازادە نوور هەر دوو چەم | بابشین وە سەیر گوڵ باغچەی ئیرەم |
| بکەرین سەیران ڕەونەق نمای گوڵ | بکەرین سەفای ڕەیحان و سونبوڵ |
| بەفەرموودەی شا تەختێشان ئاوەرد | شازادە و یاران سەوار تەخت کەرد |
| شین وە گوڵستان گرتشان قەرار | پەرییان ئامان بە هەزار هەزار |
| زەڕ و جەواهێر ئاوەردن وەبار | جە ڕووی شازادە کردشان نیسار |
| جە دەوڵەت سەرا گردشان ئارام | جە ڕەنج ڕاهان ڕاحەت بین تەمام |
| مەیموونە خاتوون شۆخ دڵپەسەند | پەیدا کەرد حەکیم دانای هونەرمەند |
| جەی وەرتەر حەکیم باغچەی ئیرەم بی | وێنەی ئەو حەکیم جە عاڵەم کەم بی |
| خاتوون وات حەکیم نادرەی وەرین | زوو بکەر دەوای شای نۆش ئافەرین |
| تۆ بکەر دەوای دەفع بێ هۆشی | نە سەرش بەرشۆ مایەی خامۆشی |
| هەر چێ مەوازی جە ماڵ دونیا | جە گەنج و گەوهەر تا بۆ موهەیا |
| مەدەرووم پەندت ساهەرچێ بەری | بەڵام بە شەرتێ زوو عیلاج، کەری |
| حەکیم وات خانم وە بان دیدە | بەندەی فەرمانم چون زەڕ خەریدە |
| ئینشەڵا ئارۆ تا وادەی ئێوار | مەکەرووم دەوای دەرد ئەی نازدار |
| کەنیزان جە باغ گوڵ ئاوەردشان | هەرچوار ئەتراف بەگوڵ تەندشان |
| پەرییان ئامان جۆق جۆق و فەوج فەوج | جەدەور ئەو نازار یەکسەر بییەن مەوج |
| خاتوونە خانم نازار بێگەرد | شای نۆش ئافەرین گوڵاب ڕێز کەرد |
| تا وە سێ سەعات سەوڵ نازپەروەر | کەردشان دەوای بێ هۆشیی دوڵبەر |
| ناگا چەم هۆرداشت شای نۆش ئافەرین | ویش دی هاجە باغ شیرین ڕەنگین |
| دیش نیشتەن جەلاش پەرییان سەف سەف | هەریەک دەستەی گوڵ ڕەیحان نەرووی کەف |
| مەیموونە خاتوون ها جە سەریش | مەرێزنۆ گوڵاو نە ڕووی جەمینش |
| پەری گشت بە عام بین گرفتارش | پەی پەی مەبۆسان گۆنای گوڵنارش |
| نۆش ئافەرین وات خاتوونە شیرین | تۆ چون یاونای من وەی سەرزەمین |
| مەیموونە خاتوون گوزەشتەی کردار | بەیان کەرد پەرێ شیرین نازدار |
| جە نەو پەرساوە شازادەی دڵڕێش | ئیسە جەکۆ بۆ چێش ئاما بۆ پێش |
| وات خۆفت نەبۆ شۆخ شیرین ڕاز | ها نەڕووی مەجلیس نیشتەن بە ئێعزاز |
| ئەو شەو بە سوحبەت تا سفیدەی ڕۆز | چەنی نازاران شۆخ دڵفرۆز |
| پەری تەڵەب کەرد دەستە بە دەستە | وێنەی غونچەی گوڵ جە گوڵچین ڕەستە |
| وات ئیمشەو مەشیۆ کارێ بسازان | ئیرەم چون بەهەشت بەرین بڕازان |
| پەرییان بە فەرمان پادشای وێشان | لوان تەدارەک ئیرەم کەردشان |
| پڕ سەفا و زینەت کەردشان بەی تەور | هیچ کەس نەدیدەن نەدەوران دەور |
| جای تەعریف نییەن واچە بەی شێوە | ئیرەم نام وێش هامەبۆ پێوە |
| شای نۆش ئافەرین ئەو بە خۆش دەماغ | بەردشان داخڵ کەردشان بە باغ |
| نیاشان وە بان کورسی زەڕنیگار | چون خورشید نە بورج ماهی گرت قەرار |
| خاتوونە خانم نازار بێگەرد | لوا بە مەنزڵ شازادە ببەرد |
| عەرز کەرد فیدات بام شازادەی ئەکرەم | بابشین وەسەیر گوڵباغچەی ئیرەم |
| شای نۆش ئافەرین ئنتیزارتەن | پەری حەسرەتمەند بە دیدارتەن |
| سا کە ئێد شنەفت شازادەی سەروەر | هۆرێزا نە جا بەور هونەروەر |
| داخڵ بین وەباغ گوڵباغچەی ئیرەم | بەسۆز و بەساز سەدای زیل و بەم |
| پەرییان چەندێ گەوهەر ئاوەردن | نێسار باڵای شازادە کەردن |
| سوڵتان شی وە بان تەخت زەڕینش | جە لای دەست ڕاست نۆش ئافەرینش |
| ساقی شۆخ شەنگ بادەی مەی بەدەست | کەشیدە ڕەعنا شۆخ دیدە مەست |
| ئەو شەو تا سەحەر خورشید بەرئاما | مەجلیس گرتشان جەدەوران شا |
| مەیموونە خاتوون شیرین بێ گەرد | ڕەویەی بوزورگی هەم بەجا ئاوەرد |
| ئەوەند خدمەت کەر جە نەندازە ڕەد | تا چل ڕۆژ تەمام مەرەخەس نەکەرد |
| جە دمای چل ڕۆژ یاد وەتەن کەرد | تەشریف بە حوزوور شای پەرییان بەرد |
| جەرووی بوزرگی ڕوخسەت بدەر پێم | تا شۆم بە وەتەن موڵک بابۆی وێم |
| پادشای پەری ئاما بە گوفتار | ڕێزا نە دیدەش گەوهەر بەخەروار |
| جەواب دا ئەی شێر عەرسەی زەمانە | هیچ حەرفم نییەن ماوەر بەهانە |
| بەڵێ یەک حەرفێ زبانم بەستەن | عەیبەن پەی شاهان ئیقرار شکەستەن |
| جە دەرگای داوەر دانای کردگار | وە یەقین دڵ کەردەنم ئیقرار |
| هەرکەس تەلیسمات دێو بدۆ شکەست | خاتوونە پەری باوەرۆ بەدەست |
| سەرنگوون کەرۆ ئەو دێوە غوڵە | خەراب کەرۆ کاخ موڵک زەنگوڵە |
| چەنێ تەدارەک تەعریف نەبۆ پێم | مەدەرووم پەنەش من کناچەی وێم |
| ئێستە ئەی فەتحە بەمەردی کەردی | کنا چەم نەکاخ دێوان ئاوەردی |
| ئیستدعام ئێدەن ئیسە ئەی فەرزەند | خاتوونە پەی تۆ بکەرووم پەیوەند |
| مایل بەدیدار شەمع دیدەت بۆ | بەوێنەی کەنیز جارووکەشت بۆ |
| شازادە واتش ئەی شاهـ سەروەر | من غوڵام تۆم جە بەندە کەمتەر |
| لوتفت کامڵەن ڕازت دروستەن | منیچ یەک حەرفێ زوبانم بەستەن |
| بە نۆش ئافەرین ئیقرارم کەردەن | بەیەقین دڵ سەوگەندم وەردەن |
| هەتا نەچینم گوڵزار باغش | نەنیشووم وە بان شەمع چراغش |
| خەیاڵ ڕووی کەس نەکەرووم هەوەس | چەم گوشاد نەکەم بەدیدار کەس |
| واتش ئەی فەرزەند عەیبێ نەدارۆ | بەڵێ یەک حەرفێ مەواچووم وەتۆ |
| ئێدەن مەتڵەبم چون یاوای وە زەید | ئاوەردی وە دەست ئەو جەمین خورشید |
| جەو دما نازدار خاتوون ببەری | بە دەماغ شەوق نیکاحش کەری |
| شازادە دلێر قەبووڵ کەرد ڕازش | وات مەکەم ڕۆحم وە پایەندازش |
| شاهـ و شازادە ئیقرارێ کەردن | بە سیغەی کەلام سەوگەندێ وەردن |
| پادشا فەرما دوو تەخت ئاوەردن | بەدەست شازادە و یاران سپەردن |
| شا فەرما دێوان تەختشان هۆرداشت | نەزەر بە وەتەن شارچین گوماشت |
| مەیموونە خاتوون نازار دوڵبەر | ئاما تا موحیت دەریای ئەسکەندەر |
| باز هەم گێڵاوە شۆخ خاتر ڕێش | ڕوو کەرد بە مەسکەن موڵک بابۆی وێش |
| دێوان تەی کەردن ڕاگەی پڕ ئاسیب | یاران یاونان بەکۆی سەرئەندیب |
| دێوان واتن شاهـ خاترت بۆ شاد | یە کۆی سەرئەندیب یە ئادەمیزاد |
| شازادە شنەفت چون گوڵ شکاوا | نەسیم چینش بە مەشام یاوا |
| دێوان ڕوخسەت دا تەخت هەم بەردشان | ڕەوانەی گوڵزار ئیرەم کەردشان |
| نیگا کەرد بەچە ڕوخ ئاما بەلاش | کەفتن چون غوڵام وێش نە خاک پاش |
| شازادە بۆسا سەرو باڵشان | هەم خەیلێ پەرسا جە ئەحواڵشان |
| نەوازش بەحوب بکەرد چەنیشان | ڕوخسەت دا لوان بە ماوای وێشان |
| یاوان بە یاران شازادەی سالار | داخل بین بە جای نەزدیک بین بەشار |
| بە خان محەمەد وات شێر بەچەی خوونخوار | مەبۆ تو چابک بشی پەرێ شار |
| چوار ئەسپ و چوار زین چەنی گشت ئەسباب | دەرسات باوەری بە تەعجیل و تاب |
| دەرسات هۆرێزا چون شێر شکار | پەرێ تەدارەک ڕووکەردش نە شار |
| لوا بە بازار شێر هونەرمەند | چوار ئەسپ و چوار زین توحفەی دڵپەسەند |
| جا کە پەیدا کەرد پەرێ خوابگا | ئاماوە و یاران بەردش بە ئەو جا |
| جە ئەو مەنزڵگا گرتشان قەرار | شای نۆش ئافەرین هەم شێر خوونخوار |
| نەوجاگە نیشتن شەو گرتن ئارام | ڕاحت بین نەوجا تا بە وەقت شام |