سوڵتان ئیبراهیم و نۆشافەرین/27
Jump to navigation
Jump to search
| ←26 | سوڵتان ئیبراهیم و نۆشافەرین (1765) by 27. گەیشتنی مەیموونە خاتوون بە ماڵی باوکی |
28→ |
| مەیموونە خاتوون شیرین دڵکێش | ڕوو کەرد بە مەسکەن موڵک بابوی وێش |
| تا وە سێ سەعات زیاتەر یا کەم | یاوا بە مەسکەن گوڵستان ئیرەم |
| وەقت غوروب بی، تاریک ئیوار | داخڵ بی وە تۆی قەسر زەڕنیگار |
| چون باز تەڕڵان قۆشخانەی شاهی | نیشت وە بان یاتاخ بە دڵروباهی |
| پیر و پیرزادە زاناشان خەبەر | ئامان وە پێشواز شۆخ خاترتەڕ |
| گیان و تەن کەردن وە پایەندازش | چون ڕۆح ڕەوان مەکێشان نازش |
| زەڕئەفشان کەردن جەقەوم و جە خوێش | شاد بی بە دیدار کەنیزان وێش |
| پەی شاهـ بابۆ خەوەر بەردشان | جە کار فەرزەند حاڵی کەردشان |
| هۆرێزا جە تەخت شاهـ ئەرجومەند | بەتاو و تەعجیل شی وەلای فەرزەند |
| بۆ نیا وەبۆش هەتاکە تاوا | جە شەوق دیدار چون گوڵ شکاوا |
| واتش ئەی فەرزەند نوور دنیا و دین | چون نەجاتت بی جە دەست لەعین |
| واتش ئەی بابۆ پادشای سەروەر | یەک نەوجەوانێ شێر دڵاوەر |
| ساحیب یاڵ و باڵ شێر غوڕینەن | فەرزەند عەزیز پادشای چینەن |
| بە باهۆ چون بەور ڕوستەم داستان | جەماڵ چون خوسرەو شاهـ سەرمەستان |
| عەلقەم فەوت کەردش جەرووی دەریا بار | قەسر سولەیمان کەردش یەختەسار |
| هەم دەلغەم دێو بەزاری و عەزاب | قەسر دڵگوشاد ئەو کەردش خەراب |
| تەلیسم زەنگۆڵە کەس پێ نەبەرد چار | جەزیرەی واق واق زەنگی ئادەمخوار |
| هەقت تەلیسم سەخت زەنگۆڵەی ناپاک | بەزۆر بازوو یەکسەر کەردش خاک |
| من چەنی نازار شای نۆش ئافەرین | بەر ئاوەرد نەچای عەلقەم بێ دین |
| یەکسەر گوزارش خاتوونە نازار | یاونا بەعەرز جەلای شەهریار |
| شاهـ ئەز نەدیدە عاشق بی بەرووش | بە یەقین دڵ کەردش ئارەزووش |
| من بەو گشت سپا شکەستم وەردەن | ئەو تەنها سوار ئەی فەتحە کەردەن |
| واجیبەن پەی من بکێشووم نازش | دوو فەرسەنگ یبشین هەم وە پێشوازش |
| مەیموونە خاتوون شیرین نازار | وات قەسەم بە تاج جوقەی شەهریار |
| وێنەی ئەو جەوان شێر یەگانە | نییەن جە ڕووی عەرز دەورەی زەمانە |
| لایەقەن شاهان جەهان بێ گەزاف | بەندەی دەرگاش بۆ جەقاف تابە قاف |
| شا فەرما دوو تەخت موهەیا کەردن | دەرساعەت پەی شاهـ و وەزیر ئاوەردن |
| نەکەردن مدار قەترە دان بە تاو | یاوان بەدەریا بەکەنار ئاو |
| وەختێ کە دیشان شازادەی چالاک | هاوەپشت مورغ چون شێر بێ باک |