سوڵتان ئیبراهیم و نۆشافەرین/23
Jump to navigation
Jump to search
| ←22 | سوڵتان ئیبراهیم و نۆشافەرین (1765) by 23. زەلغەم نۆش ئافەرین دەبا بۆ تەلیسمی زەنگوڵە لەلای ئارایشی دێو |
24→ |
| شازادە و یاران با بەرکەنار بۆ | بمانۆ تا وەقت جە خواب بێدار بۆ |
| (خانا تۆ ئەر فام وەرینت مەندەن | ڕشتەی غەم و داغ شەوقت نەمەندەن) |
| گۆش دەر بەداستان زەمانەی کەچباز | هەنگامەی عەزیم چ تەور مەبۆ ساز |
| زانا بەکردار دێو بەدئەندێش | شازادە مەشۆ بە مەکان وێش |
| فەردا شیرین خاڵ بەخاتر گوشاد | مەبەرۆت وەلای ئەو ئادەمیزاد |
| فەردا جەداغش ماتەم بنیشیم | نە غوسە و نە غەم جەفا بکێشیم |
| داخڵ بۆ بە چین شای نۆش ئافەرین | غەم نەدەروونم جەم مەبۆ چین چین |
| ئێد خاسەن ئیمشەو مەیدانم چۆڵە | ببەرووم بەموڵک کاخ زەنگۆڵە |
| وەلای ئارایش والیدەی دڵسۆز | بسپارووم بە دەست مادەر شەب دۆز |
| ئێد وات وەئارام دێو سیارەنگ | جە هیچ کەس ناما ئەسڵەن سەدای دەنگ |
| بەفرسەت زانا مەلعوون بەدکار | دەست کێشا بە باڵ سەوڵ سایەدار |
| پێچا وە تۆی ڕەخت وە لەحاف وێش | شانا بەدۆشدا دێوی بەدئەندێش |
| ڕاهی بی بەراهـ ئەو سیا غوولە | بەردش بەتەلیسم موڵک زەنکووڵە |
| شی وەلای مادەر سوجدەی زەمین بەرد | شیرین دوڵبەر بەمادەر سپەرد |
| مادەر وات فەرزەند ئەی شیرین خاڵە | جەکۆت ئاوەردن ئەی دانەی لاڵە |
| دێو حاڵ و ئەحواڵ گوزەشتەی وەرتەر | سەرانسەر ڕازان بە ئەودا خەبەر |
| کوشتەنی دەلغەم زەلیلیی عەلقەم | واتش بە مادەر ئەو دێو دوژەم |
| جادوو چون شنەفت خرۆشا جە دەرد | پەی فەرزەندانش خەیلێ زاری کەرد |
| جە دمای زاری جادووی ناسەواب | قەسەم وەرد دوختەر مەکەرووم کەباب |
| ئەعزاش مەپاچووم جەتەنخوای فەرزەند | نەڕووی دونیادا مەکەرووم وەپەند |
| سەرتا پای باڵاش ئاتەش واران کەم | وەپەند و واتەی ڕۆزگاران کەم |
| ئادەمیزادان پەیدا کەم نەدەور | تێغ جەفاشان مەکێشووم بە جەور |
| زەلغەم چون شنەفت گوفتار مادەر | ئاهیر جەرگش جۆشیا نەسەر |
| واتش ئەی مادەر بویەر جەی کارە | وەس بدەر نەدڵ ئەی تیر و خارە |
| ئەر نۆش ئافەرین زەرەر بکێشۆ | من مەلەکولمەوت گیانم مەکێشۆ |
| واجبەن من وێم پارە پارە کەم | ڕۆح وێم بەدەست وێم ئاوارە کەم |
| عاشق دیدار نۆش ئافەرینم | وە بێ ئەو نییەن گیان شیرینم |
| ئاخر سەوگەند وەرد دێو ڕووسیاهـ | وات نۆش ئافەرین مەوزووم نە چاهـ |
| دەر دەم زەنجیرێ ئاوەردن وەلاش | نیا نەگەردەن چەنی دەست و پاش |
| شای نۆش ئافەرین بەوێنەی ماهی | وستشان نەتۆی چاهـ سیاهی |
| شای نۆش ئافەرین جە هیجران وێش | مەگرەوا زار زار پەی بێ کەسیی وێش |
| بە سۆز دەروون وێش مەلاوناوە | سەنگ و کەش و کۆ مەتاوناوە |
| بەدیدەی پڕ نم کەردش نگایێ | ئاما بەدیدار حۆری لەقایێ |
| حۆری چ حۆری ڕشتەی لەقای زات | نییەن ناپەیدان جە ڕووی سەربیسات |
| زەنجیر ئاهەن بەندەن نەگەردەن | سەرتاپاش بە تەوق زەنجیر بەندەن |
| شەو تاریک تار گۆشەی وەرموغار | مەناڵۆ بەزار ناڵەی بێ قەرار |
| مەواتش یارەب بە حاجەتمەندان | بکیانە پەرێم مەرگێ وە ئاسان |
| یا من جەی موغار تاریک و بێ دەر | خەلاس بکەرەبە شق پێغەمبەر |
| سەراسیمە بی شای نۆش ئافەرین | کێیەن مەگرەوۆ بە ناڵەی غەمگین |
| سەلام کەرد شیرین بەو شیرین کەلام | پەری وات شیرین عەلەیکە سەلام |
| نیشت وەلاشەوە سەوڵ سۆسەن خاڵ | پەرسا ئەحواڵات چگوونەگیی حاڵ |
| وات نۆش ئافەرین نمەزانی کێم | بواچووم پەرێت نام نیشان وێم |
| من ئادەمی نیم جە پەرییانم | کناچەی خواجە عەبدوڕەحمانم |
| چون جەیران شۆخ وەلەندی ساوام | هەفت تاق هەفت بوروج ئیرەمەن ماوام |
| دایم نیشتەبیم نە بورج شاهی | جە پای تەختم بی ساز ڕوباهی |
| چەند کەنیز شۆخ زوڵفان عەنبەرین | مەحبووب مەحبووبان نەوخاڵان شیرین |
| ڕۆژێ هەوای سەیر سەرام کەفت نەسەر | چەنی سەد کەنیز زوڵفان بۆ عەنبەر |
| سەیر سەحرام کەرد دیار بە دیار | تا شیم بەسەرحەد نەزدیک بولغار |
| جە ناگا عەلقەم دێو ناپەسەند | پەیدا بی نەوجا چون کۆی دەماوەند |
| دەست ئاوەرد باهۆم گرتەبێ بەقەست | بە سێحر و ئەفسوون هەردوو دەستم بەست |
| ئاوەردم بەی جا مەلعوون بی دین | ئاما نیشت وەلام، بە قسەی شیرین |
| هەروێش موختار بی پەرواش هیچ نەبێ | بە ناحەق تەمای وەسڵ منش بێ |
| من ڕازی نەویم نەکەردم قەبووڵ | دێو جە داغ من جە غەم بی مەلوول |
| مەلعوون بەی دەستوور زەنجیر بەندم کەرد | جە قەهر و غەزەب سیا قیرش وەرد |
| بە حەرف مادەر ئاوەردم وەی جا | واتش نەی جا بۆ تا مەبۆ ڕەزا |
| تا ڕازی نەبۆ نییەن نەجاتش | مەبۆ نەی جا بۆ تا بۆ حەیاتش |
| جەولا کەنیزان زوڵفان بۆ عەنبەر | خەبەر من بەردن ئەوان پەی پێدەر |
| بابۆی من جە قین سیابی نەداغ | فەرما عەلەمدار بکێشان بەیداغ |
| چەند هەزار سوار نە جن و پەری | چەند تیپ چەند عەلەم کەرد جەم ئاوەری |
| ئاما وە ئەی جا پەرێ جەنگ کین | خراب کەرۆ کاخ ئەی جادووی لەعین |
| ئەی دێو مەلعوون بەدخۆی بەدسرێشت | لەشکەر بابۆی من تەمام دا شکست |
| ئیستە سێ ساڵەن دەستاخ دێوم | بەتەوق و زەنجیر خاتر پەشێوم |
| جەیانەی بابۆم نەدارووم خەبەر | خودا مەزانۆ چێش ئامان وە سەر |
| نۆش ئافەرین وات گیان شیرینم | خاترت جەم بۆ ئەی نازەنینم |
| سوڵتان ئیبراهیم مەبۆ خەبەردار | پەرێمان نەپشت ڕوخ مەبۆ سوار |
| ماوەرۆ وەی جا خەیمە وەنیم سات | ئیمە هەردوومان مەدەرۆ نەجات |
| نەجادوو نە بەور نە دێو پڕ فەند | نەشێر و نەغوول نەماری گەزەند |
| هیچ کام خەلاسی نییەن نەدەستش | نەدارۆن تابشت کەمان و شەستش |
| نازاران شۆخ ڕەندان جەم جام | هەردوو بەو حەرفە گرتشان ئارام |
| شۆخان تەڕلان هەردوو بە دەمساز | نەوجا بمانۆ هەر بکەران ڕاز |