سوڵتان ئیبراهیم و نۆشافەرین/09
Jump to navigation
Jump to search
| ←08 | سوڵتان ئیبراهیم و نۆشافەرین (1765) by 09. هاتنی شازادە بۆلای نۆش ئافەرین و سەرەڕێ لێ گرتنی لەلایەن مەلیک محەمەدەوە |
10→ |
| سەرافان دەور حەکاکان ڕاز | وەی دەستوور بیەن ئەی ساز و ئاواز |
| بکەرین تەعریف شازادەی چالاک | کوشەندەی شێران بەوران بێ باک |
| هۆرێزان وە پا چون هەردە جاران | ڕووکەردن نەباغ گوڵباغچەی یاران |
| شای نەوجەوانان چون شێر بێشە | یە گوزەرگاش بی دایم هەمیشە |
| چەنی خان محەمەد یاران هەرسێشان | ڕوو کەردن بەناو گوڵباغچەی خەزان |
| دیش کە چەند نەفەر دوزدانە دەستوور | دیارن جە دوور ئەو شەب دەیجوور |
| یاوان بەو مەکان کەمینگای گوزەر | کەمین نشینان زاناشان خەبەر |
| شازادە چون شێر نەعرە بەرئاوەرد | ڕووکەرد نەدوزدان چون مەردان مەرد |
| واتش ئەی دوزدان شووم نا بێکار | عەزمتان چێشەن نەی زوڵمات تار |
| دەست دا بە شمشێر مەلیک شێر مەرد | پەرێ شازادە وە توند هەڵمەت بەرد |
| شازادە جۆشا وێنەی شێر مەست | تاو دا بەهێمەت گرتش بەند دەست |
| تێغش سەند جەدەست خرۆشا بە قار | داش نەکەللەی سەر فەرق نابێکار |
| چوار ئەنگوشت بڕی کەفت نەڕووی زەمین | خەڵتان کەرد نەهوون چون شێر غورین |
| چەنی دوو غوڵام کەفتن نەرووی خاک | کەفتن نەخاشاک هەم خاک نمناک |
| باقیی غوڵامان کەردشان هەراس | خەبەر بەردشان پەی شاهـ ئەلیاس |
| هۆرێزان ئامان شازادان یەکسەر | ئەلیاس و یاران تەمام دڵاوەر |
| گرتن دەورادەور سوڵتان ئیبراهیم | تەشنەی خونوشەن گشتشان دایم |
| شازادە دەست بەرد بە شمشێر تیز | وست نەدلیشان ڕۆز ڕەستاخیز |
| دیش ئەلیاس ئاما قەبزەی تیغ بەدەست | بشانو نەفەرق شازادەی سەرمەست |
| حەمڵە بەرد پەرێش بەوێنەی پڵەنگ | شی بەنەزدیکش نەمەیدان جەنگ |
| بازوو گوشاد کەرد بەردش وەباڵا | دانەرووی فەرقش جەزەربەش ناڵا |
| ئەلیاس بەیەک زەرب کەفت نە ڕووی زەمین | بەهوون ڕەنگین بی سەرتاپای شیرین |
| سەعید و مەسعوود هەردوو شازادە | پەڕێ جەنگ وێشان کەردن ئامادە |
| هەر دوو بەیەک بار جۆش ئاوەردشان | پەرێ شازادە حەمڵە بەردشان |
| شێر هونەرمەند تیغ کین بەدەست | خرۆشا بەتاو وێنەی شێر مەست |
| هەردووشان بە تیغ بەدەن کەرد خەستە | چون مورغ تیژباڵ شاباڵ شکەستە |
| ڕەستاخێز خێزا نەکووچە و گوزەر | جە سام شمشێر شێر دڵاوەر |
| مەشعەلدار مەشعەل گرتەبێ بە چەنگ | مدرا بێ وە پا نە مەیدان جەنگ |
| شێر سەرئەفراز بەور کینە کێش | بەتوندی و چالاک وێش یاونا پێش |
| دا نە گەردەنش کەفت زەرب سەهمگین | مەشعەل نەدەستش کەفت نەرووی زەمین |
| چراغ و مەشعەل خامۆش بی جە دوور | تاریک پەیدا بی چون شەب دەیجوور |
| بەو تەور زوڵمات بی کەس کەس نەناسا | هەر جەنگ بی نەبەین وە بی مواسا |
| چونکە تاریک بی شازادەی چالاک | چەنی ڕەفیقان نە مەیدان بین تاک |
| کەنارەگیر بین جە ڕاگوزارێ | گرتشان نەوەر گۆشە و کەنارێ |
| شازادان بە داغ سیاسەت مەندن | حەربە نە کاپۆڵ یەکتەر مەشەندن |
| هەر ئێد مەزانان بەدئەندێشانەن | نەزانان زەرەر بەخت وێشانەن |
| وەختێ کە زانان مەعلووم بی لێشان | وێشان مەکەردن جەنگ چەنی وێشان |
| کەمتەر مەندە بێ لێشان وە پاوە | فیرار بین لوان شێران بەدماوە |
| چەنی غوڵامان ئوفتادە و خێزان | یاوان بە مەنزڵ ئەسرین مەرێزان |
| گشت بەدەن خەستە زار و ناتەوان | خاتر پەرێشان بێزار بین جە گیان |
| حەکیمان زام پەیدا کەردشان | پەی مجرووح زام شەو ئاوەردشان |
| خەبەر بەردشان پەی جەهانگیر شا | جە مەعرەکەی جەنگ شاکەردن ئاگا |
| شازادان یەکسەر مەجرووح و خەستە | یەکسەر دەست و پا بەدەن شکەستە |
| شا حەرارەت گرت خەشمش خرۆشا | وەزیر تەڵەب کەرد بەهەیبەت جۆشا |
| بشۆ بە تەعجیل ئەی دانای ڕەئیس | باوەرە پەرێم ئەلیاس وە مەجلیس |
| وەزیر بە فەرمان شای داراشناس | ئاوەرد وە مەجلیس شازادە ئەلیاس |
| ئاما بە خزمەت شای نگون بەخت | سوجدە بەرد لوا نیشت وە بان تەخت |
| شا پەرسا ئەلیاس ئینە چ غەوغان | نە کووچە و بازاڕ دەمشق هوەیدان |
| جەواب دا ئەی شا ئیمشەو شازادە | تەمام مەست بین جە مەستیی بادە |
| جە گڕەی شەڕاب فەرقشان جۆشان | هیچ نەبین وە حاڵ وێنەی بێ هۆشان |
| جە حاڵ مەستی بادەی کەیف وەردن | جە بێ هۆشیدا ئەی کارە کەردن |
| شا کە ئێد شنەفت هیچ نەبی وە تەنگ | خامۆش بین نە جەنگ شێران ڕۆی جەنگ |
| شازادان یەکسەر خاتر پەرێشان | هۆرێزان لوان بە ماوای وێشان |
| ئەلیاس وات مەلیک ئەرێ بێ مایە | یە پەی چی کارمان تۆ کەردی زایە |
| مەلیک محەمەد خەجاڵەت کێشا | شی نە بەحر فیکر خەیاڵ وێشا |
| وەزیر یە زانا ئاما بە گوفتار | وات مەلیک محەمەد نەوەی نامدار |
| من نەکەردی کار هۆشیارم دایم | مەزانوون مەنزڵ سوڵتان ئیبراهیم |
| ئینشەڵا ئەمن وە بی وەسیلە | ماوەرووم پەرێت وە مەکر و حیلە |
| ئیمشەو نەخەودا بە دەست بەستە | ماوەرووم پەرێت بەزاری و خەستە |
| مەلیک وات وەزیر ئەر ئینە کەری | بە دەست بەستە پەرێم باوەری |
| سەوگەندم بەزات پادشای قەدیم | مەردەرووت پەنە تاج و تەخت ویم |
| وەزیر سەبرش کەرد تا یاوا بە شام | دمای شام خێزا ئەسباب بەست تەمام |
| شەب دەیجوور بی تاریک بی تەمام | بەرگ شەورەنگی پۆشا بە ئەندام |
| لوا وە بێ دەنگ نە پای کووچەی شار | تا شی بە مەنزڵ شێر نامدار |
| شی بە مەتبەخ وێش کەردش پەنهان | کەس پێش نەزانا مەلعوون خەیان |
| نیگا کەرد تەعام حازر کەردەبێن | بە عەزم خوردەن دەست نەبەردەبێن |
| حەمید مەلاح نەوەی نامدار | ئاب مەکەرد بە دەست شازادەی سالار |
| نییەن جە مەتبەخ دایەرولبەشەر | هیچ کەس جە مەتبەخ نەدارۆ خەبەر |
| تەک دا بە تەعام وەزیر دانا | دارووی بێ هۆشی نە تەعام شانا |
| نە جاگەی تاریک وێش پەنهان بکەرد | سەرئەنجام وێش بە قەزا سپەرد |
| شازادە و یاران تەعام دڵکێش | ئیشتیها کەردن ئاوردن وە پێش |
| دەست کێشان وەردن تەعامان بەکام | دەرسات هەرسێشان بێ هۆش بین تەمام |
| نیگا کەرد جەدوور وەزیر ناپاک | یاران بێ هۆشن کەفتەن نە ڕووی خاک |
| کەمەندش ئاوەرد جە خەیاتەی خام | شازادە پێچا سەر تا پا تەمام |
| گرت بەدۆشەوە شازادەی دڵڕێش | ڕووکەرد نەدما پەی مەنزڵگای وێش |
| سا با شازادە بمانۆ نە دۆش | بشین بە سەروەخت نازدار لاڵ پۆش |