ستا د سپينه مخه ځار زما زړګی شه

From Wikisource
Jump to navigation Jump to search
ستا د سپينه مخه ځار زما زړګی شه
by خاطر اپريدی

ستا د سپينه مخه ځار زما زړګی شه
هم له تانه سپېلنې او هم لوګی شه

د زړګي زخمونه ګورمه چې څه کا
يو ځل بيا هغه پخوا په رنګ مُسکی شه

ستا په ژبه باندې هر ژبه خوند کا
ای اشنا لا پېښوری لا افريدی شه

لکه کور دې د زړګي زما ويران کړو
هجره دغسې ويرانه دې کورګی شه

زه او ته د چا ژړا او خندا څه کړو
زما اوښکې دي باران ته پسرلی شه

اوس يې لرې شه د ګل ځنې رقيبه
چې پخپله باندې ګل شي بيا اغزی شه

زه خاطر دې نور خاطر کولی نشم
ای رقيبه که پوهيږې نو سړی شه

چې صحرا شي را ښکاره دنيا فاني شي
ته خاطر ته په کتو لکه هوسی شه


This work is now in the public domain in Pakistan because it originates from Pakistan and its term of copyright has expired. According to Pakistani copyright laws, all photographs enter the public domain fifty years after they were published, and all non-photographic works enter the public domain fifty years after the death of the creator.