| دە ساقی بە حەقی پیاڵەی شەراب
|
بە جەرگی پڕووزاوی هەر وەک کەباب
|
| دەرونم لە خەم کەیک، کەللەم لە تەم
|
جگەر پڕ لە زووخاو، دڵ پڕ لە غەم
|
| بشۆرە بە مەی چڵک و ژەنگی دەروون
|
چ مەی وەک چرای نوور ڕووناک و ڕوون
|
| ئەوا فەسڵی نەورۆزە و وەعدەی گوڵە
|
سەدای چەهچەهەی شیوەنی بوڵبوڵە
|
| گوڵاڵە بە خەیمە سەمەن گڵ بە کوڵ
|
سپی چووزەرە و ساق هەر وەک سەهۆڵ
|
| لەبن قەڵبەزە و شاخ و تافا چنوور
|
لەگەڵ بەرزەلنگ تێکەڵ و خوار و ژوور
|
| کەمەر گوڵ گوڵ و بەر کەمەر ئاڵ و واڵ
|
نمی شەونمە بێ دەغیلە و زەڵاڵ
|
| وەنەوشە بە گەردەن کەچی وەک هەتیو
|
دڵۆپە لە ئەشکەوت وەک شووشە زیو
|
| چەمەن سەوز پۆش و چیا زەرد و سوور
|
بریقەی سەرئاوان هەر وەک بلوور
|
| ***
|
| دە ساقی بە میحرابی هەردوو برۆت
|
بەناز و کرشمەی دووچاوانی خۆت
|
| ژمارەی پیاڵەم مەکە تا بەهار
|
نەچێ با بچێتە هەزاران هەزار
|
| سەرم مەست کە با سوڕێ مەستانە دەم
|
دەمم تەڕ کە با، نوتقی مەردانە دەم
|
| بڕێژم بەسەر خاکەدا سیم و زەڕ
|
بنێژم لەسەر بەردەدا سەوڵی تەڕ
|
| کە هەر کەس لە سەوڵم گوڵێ بۆ بکا
|
وەیا پارەیێ زێڕ و زیوم ببا
|
| لە پەستی هەڵی سێنمۆ بێتە باڵ
|
بەفڕکە لە فڕگە هەتا نووکی یاڵ
|
| بکێشم قەڵەم وەک پەڕی جەبرەئیل
|
فوارەی تەڕی نیکتە وەک سەلسەبیل
|
| بنووسم سەراسەر بەیەک داستان
|
لە ئێمە هەتا خلقەتی جن و جان
|
| ***
|
| دە ساقی بەحاجەت ڕۆژی لانزار
|
بەزەردی خەزان و بەسەوزی بەهار
|
| من و خۆت و مەجلیس بە مەی داگرە
|
کە مەستی لە سستی گەلێک چاترە
|
| دوو گوێم پڕکە پەی پەی لە قەهقاهی جام
|
شەکر دە، وەکوو تووتی بێمە کەلام
|
| شەرابێ کەرەم کە! پیاڵەی بلوور
|
نەوەم پشت بە پشت مەست بێ تا نەفخی سوور
|
| ئەگەر سەرخۆشم کەی بە دوو جامی مەی
|
ئەڕێژم حکایاتی جەمشید و کەی
|
| دە ساقی بەخاتر شەرابی دروست
|
بە نەشئەی سەری لاوی میللەت پەرست
|
| هەتا چنگ و چنگاڵی شەهبازی مەرگ
|
لە سینەم سەری هەڵ نەداوە لە جەرگ
|
| بڕێژە لە بارانی مەی سوبح و شام
|
زڕەی ئیستیکان و جەلاجیلی جام
|
| وەها سەرخۆشم کەی بەسەیرانی گوڵ
|
لە مەیتیم دووسەد مەرگ مات و خەجڵ
|
| ***
|
| دە ساقی بەسەر گەردی سەرپەنجەکەت
|
بە گۆزەی بلورینی پڕ گەنجەکەت
|
| بڕێژە و بگێڕە و بنۆشە شەراب
|
بەناڵینی عود و بەزیکەی ڕوباب
|
| وەها بم کە ئاگام نەبێ قەت لە خۆم
|
کە خەم هات بەسەربەستی من خەم بخۆم
|
| چ خۆشە بە مەستی بناڵێنی شەو
|
چ خۆشە نەترسی لە ئەم یا لە ئەو
|
| بە گەرمی سەرم با بسووتێ وڵات
|
بە شۆری دڵم شێت ئەکەم کایەنات
|
| سەدایێ بخوێنم بە سۆزی گرین
|
مەلایتک بڵێن سەد هەزار ئافەرین
|
| ***
|
| دەساقی بە عەشقی سەری پڕ هەوەس
|
بەیادی برۆی چەوت و چاوانی مەس
|
| کەرەم کە پیاڵەیێ گوڵی زەڕ نیگار
|
هەتا فرسەتە ماوە وەعدەی بەهار
|
| کە فەوتا بەهار و نەما نەستەرین
|
من و بوڵبوڵیش دێینە سەر زار و شین
|
| ئەمن هەر دەگریەم لەبەر داخی دڵ
|
ئەویش هەر ئەزیڕێنێ بۆ بۆنی گوڵ
|
| ببارێنە بەحری سەخا و کەرەم
|
لەسەر دەرکە مێحنەت، لەدڵ دەرکە هەم
|
| ***
|
| دە ساقی خوا حافیزی نازەکەت
|
سەر و ڕۆح پێشکەش سەدای سازەکەت
|
| بخوێنە بەدەم نازەوە فەرد، فەرد
|
لەبەر دەفعی هیجران و تەسکینی دەرد
|
| مقامێ بڵێ خوێنی دڵ بێتە کوڵ
|
کە یادی زەمانەی قەدیم بێتە دڵ
|
| چ خۆشە سەدای موزیک و چەنگ و نەی
|
چ خۆشە من و ساقی و یار و مەی
|
| چ خۆشە دەف و بەربوت و هەڵ هەڵە
|
چ خۆشە سەدای شیوەن و وەل وەلە
|
| هەتا زیندوم یەک دوو جامێ گران
|
کەرەم کە بە فیدیەی قەزای باخەوان
|
| کە مردم وەکوو شێخی سەعدی قەدیم
|
لە ژێر خاکەدا ئەبمە عەزمی ڕەمیم
|
| نە ئێستە ئەزانن کە من چیم و کێم
|
نە کەس قابلە پێ بنێ جێگە پێم
|
