زرگر کیشی‌نین اولدورولمه‌سی‌نین تانریمیزین حؤکم‌ویله اولماسی‌نین بیانی
| زرگر کیشی‌نین اولدورولمه‌سی‌نین تانریمیزین حؤکم‌ویله اولماسی‌نین بیانی یازار: مولوی |
او زرگرین اؤلومو، ناققین مصلحتی‌یله،
نه ایسته‌یه باغلی‌یدی، نه ده ضعیف بیر گوله.
نه‌ده همین پادیشاهین، ایستک آرزوسو ایدی،
تانری‌دان حؤکم اوخونموش، آلین یازی‌سی ایدی.
بیر آدامین باشی‌نی، ووروبسا خیزیر ایلیاس،
نه قدر آختارسالار، او باش داها تاپیلماز.
کیم کی، ناققیندان آلیر، وحی‌ینی، خیطابی‌نی،
نه ایش ایجرا ائدرسه، آلاجاق ثاوابینی.
سنه جانی وئرن کس، اونو آلسا روادیر،
سنی اؤلدورن الی، اونا وئرن خودادیر.
سن ده ایسماعیل کیمی، وئر باش تانری یولوندا،
شادو- خندان صیدق ایله، صافلاش تانری یولوندا.
عومرون بویو سئوینج‌له، یاشایارسان قالارسان،
سن احدین، احمدین، پاک جانی تک اولارسان.
عاشیق فرح جامی‌نی، ائله کی، باشا چکر،
اؤزو- اؤز، ال‌لری‌یله جانان آغوشا چکر.
شاه بو قانی تؤکمه‌یی، شهوت اوچون ائتمه‌دی،
بدگومان اولما اوندان، بو قانی او تؤکمه‌دی.
بئله گومان ائتمه‌سن، زرگری اؤلدورن شاه،
اونو اؤلدورمک اوچون، بو تله‌نی قوران شاه.
ائی بدگومان درک ائیله، خطا ظنن‌یندن اؤتوش،
ظنن‌ین خطا اولارسا، گوناه‌کارسان باشا دوش.
بو اذیت بو جفا، گرک بهره‌سین وئرسین،
وفاسیزلیق یوخ اولسون، آرتیق تاماه‌لیق اؤلسون.
بو ایمتیحان سورغو دا، آشکار اولار نیکو-بد،
نفسه قالیب گلمه‌یه، جیهاد لازیم تا ابد.
اولماسایدی بو عمل، حؤکم‌و ایله خودانین،
شاه‌لا فرقی اولمازدی، بیر وحشی‌نین، گیدانین.
شاه شهوت‌دن تاماه‌دان، قلبینی پاک ائیله‌دی،
تاماه‌کارین حریص‌ین، قلبینی چاک ائیله‌دی.
باخما خیزیر دریادا، گمی باتیردی اؤزو.
یوز دوستو ایتیرسه‌ده، داییم خاطیرده اؤزو.
موسی پئیغمبریمیز، اؤز نورو هونری‌یله،
اوندان اوتانیردی کی، خالقی مشغول شر ایله.
ائتمه حساب قان اونو، قیزیل گول لچه‌یی‌دیر،
بیلمه مجنون سن اونو، عاغیلین گؤیچه‌یی‌دیر.
آخیتسایدی اگر او، بیر موسلمان قانی‌نی،
کافرم اگر، چکسم اونون آدی – سانی‌نی.
دوشمنی مدح ائیله‌مک، ربب‌ی غضب‌لندیرر،
بدگومان اولار هامی، مؤمین‌ی حیرص‌لندیرر.
او شاه کیمی شاه ایدی، هر شئی‌دن آگاه ایدی،
او سئچیلمیش شاه ایدی،خالقینا پناه ایدی،
او، اؤلمه‌لی مرد ایدی، چون اؤزو نامرد ایدی،
اونون تاماه‌کارلیغی، جانینا بیر درد ایدی.
یاریم جان اولماق‌لا او، یوز جانا جان بخش ائتدی،
زرگر جومرد اولمادی، حیاتی هدر گئتدی
تانری‌نین غضب‌ینده، سن بیر عیبرت گؤردونمو؟
زرگرین جزاسینا قول‌دا حاجت گؤردونمو؟
نئشترله قان آلارکن، اوشاق آغلار همیشه،
اوشاق ساغالان کیمی، آنا گولر بو ایشه.
سن اؤزون‌له اونلاری، ائدیرسن موقاییسه،
چوخ اوزاغا دوشموسن بو ایش‌ده گیرمه بحثه.
بو باره‌ده حکایه یئنه سؤیله‌مک اولار،
فیکرلشک گؤرک بیز، داها نه دئمک اولار.