| تایفەی یەهوود جە دەوڵەتمەندان
|
ئەهل موبەزێر جە خودپەسەندان
|
| «بنی نضیر» و «عطفان ارجاع»
|
«بنی قریظه» و «بنی قینقاع»
|
| روئەسای قەوم تایفەی یەهوود
|
خوڎا نەشناسان ئەهل بێ وجوود
|
| یەکسەر وە هەیئەت ئێجتماع خاس
|
بەڵام نەک وە شەرت ئێرادە و ئێخلاس
|
| دەردەم وە حەزرەت هجووم بەردشان
|
گشت جە ڕێسالەت سوئال کەردشان
|
| واتن موحەممەد دڵ وە ئەندێشەن
|
تۆ جە نبووەت نشانت چێشەن؟
|
| مەخلۆقات بە چێش مەکەری دەعوەت؟
|
کارێ کەر پەی وێت نەبۆ بە زەحمەت
|
| فەرماوا بە نام پادشای ئەکبەر
|
بە تەسدیق قەوڵ خوڎا و پێغەمبەر
|
| خوڎا یەکێوەن بێ هەمتای بێ باک
|
ئەشیا گشت وە حوکم ئەو مەبۆ بە خاک
|
| ئەو کەسم خوڎا وەسفم جە تەورات
|
کەردەن پەی موسا جە ڕووی کائێنات
|
| شەفا خوای ئوممەت گشت ئێنس و جانم
|
یەقین پێغەمبەر ئاخر زەمانم
|
| وەسفم فەرماوان پادشای جەلیل
|
جە پەڕەی تەورات زەبوور و ئێنجیل
|
| عولەمای یەهوود یەکسەر مەزانان
|
دایم پەی ئێوە یەکا یەک وانان
|
| وەر جە تەوەللود من وە دەهر دوون
|
کتاب گشت عالەم کەردەن ڕەهنموون
|
| جە مەککەی شەریف نمەبۆم ئارام
|
مەدینە مەبۆ وە جای هێجرەتگام
|
| پەی چێش؟ چوون خاتەم پێغەمبەرانم
|
هەم فازڵتەرین گشت سەروەرانم
|
| سوار وشتر گڵێم پۆشەنان
|
دایم شیر گەرم وشتر نۆشەنان
|
| بە پارە نانێ قەناعەت داروون
|
بە تەنگی و عوسرەت وە شاد مەویاروون
|
| نشانم سورخی جە هەر دوو دیدەن
|
کارم بە میزان گشت پەسەندیدەن
|
| موهر نبووەت نەسبەن نە دۆشم
|
پەردەی عیوبات مەردومان پۆشم
|
| جە سایەی ئەو شای فەرد تەنیای تاک
|
جە شاهان دەور هیچ نەداروون باک
|
| یەهوود عەرز کەردن فەرموودەت ڕاسەن
|
هەر چیت فەرماوا بێ کەم و کاسەن
|
| ئێمە پەی کارێ ئاماین وە خدمەت
|
مەبۆ قەبووڵ کەی جە ڕووی مەرحەمەت
|
| با نەبۆ جە بەین جەهل و جەهاڵەت
|
قەرار دەین وە هەم سوڵح و سەڵاحەت
|
| تایفەی یەهوود هەر پەنج شەش گرۆ
|
نە دۆست بین وە تۆ نە دوشمەن وە تۆ
|
| نەدەرین ئازار هەم وە یارانت
|
هەم نەبین کومەک پەی ئەغیارانت
|
| تۆیچ هەم وە ئێمە هیچ نەبۆت کارێ
|
نەیاوۆ بە کەس جە تۆ ئازارێ
|
| تاکە بزانین ئاخر کار تۆ
|
چەنی قەوم وێت وە کۆ مەیاوۆ
|
| حەزرەت ئێلتێماس یەهوود قەبووڵ کەرد
|
وە ئیزن مەعبوود تاک تەنیای فەرد
|
| نە بە ئاشکارا نە بە پەنهانی
|
نە بە پا و دەست نە بە زەبانی
|
| نە پەشت حەزرەت، نە کومەک بە کەس
|
بە هیچ خەیاڵێ نەکەران هەوەس
|
| وەی تەور قەرار دان جە مابەین هەم
|
هەر دوو خوڎاوەند کەردشان حەکەم
|
| ئەر نەقسێ ببۆ جە پەیمانشان
|
یا خۆ فێتنەیێ جە توغیانشان
|
| هوونشان وە شای حەزرەت حەڵاڵ بۆ
|
چ جای ئەولاد و ئەزواج و ماڵ بۆ
|
| هەر قەبیلەیێ ئەو سوڵح نامە
|
نویسیا ڕەقەم، خۆش خێتامە
|
| هەر یەک دا وە یەک کۆنە مەعلوومێ
|
گومڕای دڵ جە سەنگ بەدکار شوومێ
|
| قەرار دریا سوڵح خوەلاسەی کەلام
|
سەڵاح بی جە بەین یەهوود و ئێسلام
|
