| چوون یەک ڕۆ حەزرەت شای «خير الأنام»
|
«عليه و آله صلوات و السلام»
|
| شا سوار عەرش لامەکان تەی کەرد
|
نەمام شادی دوشمەنان پەی کەرد
|
| حەبیب حەزرەت دەهندەی داوەر
|
ڕیشەی موشرێکان جە خاک بەراوەر
|
| سالار مەحشەر ڕۆی «دار القرار»
|
ئەمین دیوان موستەفای موختار
|
| جە دەست موشرێک ئەوقاتش تاڵ بی
|
مایل وە سەحرا و بێزار جە ماڵ بی
|
| تەشریف بەرد وە بەین خۆف و ڕجاوە
|
بە مەحزوون پشت دا وە کۆی سەفاوە
|
| ناگا ئەبووجەهل «علیة اللعنة»
|
پەیدا بی جەو دەم پەی تیر و تەعنە
|
| چەندێ بێ جا وات چەند جەسارەت کەرد
|
چەند کەردەی بابۆی لەعین وێش وەرد
|
| خەیلێ ئەو سەگ زاد چوون سەگ گەفا لێش
|
حەزرەت خجڵ مەند جە بێ کەسی وێش
|
| چوون بەد گوفتاری دوور بێ جە زاتش
|
موتڵەقەن نەکەرد هیچ مەکافاتش
|
| غەرەز، ئەبووجەهل گومڕای بەد ئەتوار
|
دیا کە حەزرەت ناما وە گوفتار
|
| چوون ڕەسم حەزرەت هەر سڕ پۆشی بێ
|
جواب ئەبلەهان هەم خامۆشی بێ
|
| لەعین گێڵاوە چوون سەگ جە داوا
|
تا کە بە مەجلێس قورەیش هەم یاوا
|
| جەودەم یەک عەورەت چوون ماهـ تابان
|
مەشهوور بە کەنیز «عبدالله جزعان»
|
| گفتوگۆی بووجەهل گومڕای بێ وەفا
|
یەکا یەک شنەفت جە باڵای سەفا
|
| جەو دەمدا حەمزە شێری سەنگین سام
|
عەمووی موکەڕەم شای «خير الأنام»
|
| جە شکارگای وێش موراجعەت کەرد
|
تەشریف وە تەواف «كعبة الله» بەرد
|
| سەلاح ڕۆی جەنگ پۆشابێ بە داو
|
کۆی خارا مەبی جە سامش وە ئاو
|
| کەنیز شی وە لاش وە دڵ ناکامی
|
واتش ئەی ئەمیر نامدار نامی
|
| پەرێ موحەممەد جەرگم مەدۆ جۆش
|
غوسەی دنیام گشت بیەن فەرامۆش
|
| ئارۆ ئەبووجەهل کارێ پێش کەردەن
|
یانی های جە حەد حەساب ویەردەن
|
| دڵ ڕێزە ڕێزە دەروون خاش خاشم
|
بە خوڎا حەیف سەد حەیف پەی بەنی هاشم
|
| جە دەوران دوون یەند بێ غیرەت بان
|
زیر دەست مەردوم ئەدنا و ئەوسەت بان
|
| حەمزە ئێڎ شنەفت سیا بی جە قار
|
ڕوو کەرد وە مەجلێس تایفەی کوففار
|
| دەست بەرد ئەو کەمان دووحاچەی سەنگین
|
داش وە فەوق فەرق ئەبووجەهل کین
|
| نەکەردش ئەندێش جەو فیلان مەست
|
وە یەک زەرب فەرقش نە هەفت جا شکەست
|
| واتش تۆ بێ جا و غەڵەت کەردەنی
|
نام برازای بەندە بەردەنی
|
| من هەنی تەسدیق دین ئەو داروون
|
هەنی خوڎای ئەو وە چەم مەڎاروون
|
| ئەگەر تۆ مەردی من هام نەبەردم
|
بەو تەورە کەروون ئیسە پێت کەردم
|
| جەو دما حەزرەت حەمزەی ناموەر
|
هەم شی وە خدمەت شای «خير البشر»
|
| وات یا موحەممەد ئارۆ مامۆی تۆ
|
حەق تۆش سەندەن جە عەدووی بەڎخۆ
|
| حەزرەت واتش من بێ کەس مەویاروون
|
نە پدەر نە عەم نە ئێخوان داروون
|
| بەغەیر جە مەعبوود «رب العالمين»
|
من کەسم نیەن جە ڕووی سەرزەمین
|
| حەزرەت حەمزە وات من عەهدم بەستەن
|
فەرق بووجەهلم پەی تۆ شکەستەن
|
| بزان بە تەحقیق سەرم ها نە ڕێت
|
چ شاهـ تا گەدا چێوێ واچان پێت
|
| هەر تاکە زێندەم پشتیبان تۆم
|
جە نام ئاوەران حەق ستان تۆم
|
| حەزرەت وات حەمزە ئەوند مەدەر لاف
|
جە مەککەی شەریف هەر تا وە کۆی قاف
|
| موشرێکان یەکسەر گشت قەتڵ عام کەی
|
حەبەش و قورەیش یەهوود و شام کەی
|
| مادامەن ئیمان بە دانای داوەر
|
ناوەری ئەلئان بە خوڎای ئەکبەر
|
| تۆ هەر ئەو سوار من ئەو پیادەم
|
نە تۆ عەم نە من بەرادەر زادەم
|
| حەمزە قەوڵ ئەو بە دڵ کەرد قەبووڵ
|
ئیمانش ئاوەرد بە خوڎا و ڕەسووڵ
|
| حەزرەت جە شادی فەرەح یاوا پێش
|
بین وە هام خەیاڵ چەنی مامۆی وێش
|
| سەحابان وە زەوق تەکبیر واناشان
|
قەبیلەی قورەیش یەکسەر زاناشان
|
| واتن موحەممەد قەوی بی دینش
|
ئەو باغەن حەمزە بی بە پەرچینش
|
| ئەو گوڵەن حەمزە نە دەورش خارەن
|
دینش مەحفووزەن وێش بەرقەرارەن
|
| جە حەمزە خەیلێ ستایش کەردن
|
نام حەزرەت هیچ وە بەد نەبەردن
|
