| بە قەوڵ ناقڵ دوعا موستەجاب
|
ڕاوی ڕێوایەت «روضة الأحباب»
|
| ئەوەڵین کەسێ ئیمانش ئاوەرد
|
بە قەوڵ حەزرەت بە دڵ باوەر کەرد
|
| ئەبوبەکر بێ سددیق ئەکبەر
|
تەسدیق کەرد بە قەوڵ خوڎا و پێغەمبەر
|
| جە حەرف حەزرەت لانەدا بە موو
|
«رَضي الله تَعالى عَنهُ»
|
| وەسفش جە قورئان حەق کەرد ئاشکار
|
«ثاني الأثنين إذ هما في الغار»
|
| راش کوا پەی ئەهل فەزلەت مەئابان
|
وێش بی بە سەر مەشق عەشق سەحابان
|
| یاران جە ما بەین ئەو تێغ مەودا
|
ناگا یەک یەک شین وە شۆن ئەودا
|
| هەر ئەو ڕۆ سددیق سێدقش نمانا
|
یەکسەر سێدقشان جە سددیق زانا
|
| بەڵێ هەر ئەو سێدق سددیق ئەکبەر
|
بی بە پەڕ و باڵ دین پێغەمبەر
|
| فدای سێدقت بام شای سێدق و یەقین
|
سێدقت بی بە تاج پەرێ فەرق دین
|
| باز هەم وە قەوڵ خەدیجەی کوبرا
|
والێدەی حەزرەت فاتێمەی زەهرا
|
| ئەوەڵ جە زەنان ئەو ئیمان ئاوەرد
|
بە پێغەمبەری حەزرەت باوەر کەرد
|
| هەم جە مەوالی زەید بن حارس
|
ئیمانش ئاوەرد خاستەر جە وارس
|
| بەعد ئەز ئان بێلال حەق ڕازی بۆ لێش
|
ئیمانش ئاوەرد بێ پەروا و ئەندێش
|
| جەو دما عەلی شێر کردگار
|
سوار دوڵدوڵ ساحێب زوڵفەقار
|
| بەعد، زوبەیر و ئێمام عوسمان
|
یەک نە شۆن یەک ئاوەردن ئیمان
|
| هەم «عبدالرحمن» شەجیع بێ خۆف
|
مەرد مەیدان گیر یانێ ئێبن عەوف
|
| فەرموودەی ئایەت بە دڵ کەرد قەبوول
|
ئیمانش ئاوەرد بە خوڎا و ڕەسوول
|
| جەو دما سەعد موتابعەت کەرد
|
ئیمان بە خوڎا و بە حەزرەت ئاوەرد
|
| تەلحە ئیمانش جە حەق کەرد حاسڵ
|
دین حەزرەتش قەبووڵ کەرد وە دڵ
|
| موجاهێد وەی تەور ڕێوایەت کەردەن
|
پەی شاهـ مەردان دەلیل ئاوەردەن
|
| فەزڵ خوڎاوەند جە شەئن عەلی
|
ئێڎ بی مەکرەمەت خەفی و جەلی
|
| ئەو ساڵ جە قورەیش قەحتی عەزیم بێ
|
نە باد نە باران نە سوبح نەسیم بێ
|
| چوون ئەبووتالب ساحێب عەیاڵ بێ
|
کەم دەخڵ و پەڕ خەرج وێرانە ماڵ بێ
|
| عەبباس جەو دەمدا ساحێب دەوڵەت بێ
|
هەم سەدر مەجڵێس گشت مەشوەرەت بێ
|
| شای خەتمی پەنا سەیێد سەروەر
|
شەفیع کوبرای زلزلەی مەحشەر
|
| وات ئەبووتالب شکەستە باڵەن
|
ساحێب کڵفەت و ئەهل و عەیاڵەن
|
| وە حاڵ وێمان بادا ستەم کەین
|
هەر یەک فەرزەندێش ئێمساڵ وە خەم کەین
|
| عەبباس قەبووڵ کەرد فەرموودەی حەزرەت
|
ئەلفاز شەکەر پالوودەی حەزرەت
|
| وە حزوور عەم تەشریف بەردشان
|
بە ئەبووتالب ئێزهار کەردشان
|
| ئەبووتالب وات یە خوڎا دادەن
|
یەک برا و یەکێ برادەر زادەن
|
| جای تیر و تانەی دوشمەنان نیەن
|
چوونکە سێلەی ڕەحم هەر قەدیم بیەن
|
| عەقیل پەرێ من چوونکە ئەتفالەن
|
تەمام وڕک باز و خەیلێ مناڵەن
|
| باقی مەسڵەحەت گشت بە وێتانەن
|
هەر کام قووەی، هەر چی پێتانەن
|
| عەبباس جەعفەرش وە یانەی وێش بەرد
|
حەزرەت هەم عەلی وە لای وێش ئاوەرد
|
| جەو دما عەلی دایم یارش بێ
|
عەلی مولازێم خدمەتکارش بێ
|
| جە دە ساڵەگی ئیمانش ئاوەرد
|
تەرک کیش و دین ئەبووتالب کەرد
|
| عەلی وێش بەو تەور وە حەزرەت سپەرد
|
کەس جە فەرزەندش ئێمتیاز نەکەرد
|
| «حاضر الحضور» خاک پای حەزرەت
|
ڕۆح وێش مەکەرد فێدای ڕای حەزرەت
|
| حەزرەت هەم بەو تەور خەفی تا جەلی
|
وە ساتێ سەد جار مەوات یا عەلی
|
| نەک بە زەبان ئاداب ڕەسمی
|
«لحمك لحمي جسمك جسمي»
|
| کەریم کارساز تاک تەنیای فەرد
|
«هل أتي» جە شان عەلی نازڵ کەرد
|
