| «عبدالمطلب» ئەو شەو چەنی هەم
|
پەنا بەرد دەرلاد بە کەعبەی ئەعزەم
|
| مەکەرد موناجات مەلاڵا تاو تاو
|
تا ناگا دیدەش جەو دەم شی نە خاو
|
| چگوونەگی حاڵ یەکسەر واتن پێش
|
خەیلێ دڵ وەش بی ئەو بە خواب وێش
|
| دەرلاد هۆرێزا نام ئەڵڵا بەرد
|
عەزم دیدەنی لای ئامینەش کەرد
|
| یاوا وە قاپی قەسر بۆی گوڵاب
|
حەڵقە دا وە دەر پەرێ «فتح الباب»
|
| ئامینەی وەهەب تەنهای دڵ خەفیف
|
جوابش داوە وە دەنگ زەعیف
|
| «عبدالمطلب» تاقەتش بڕیا
|
چوون کوورەی ئایر دەروونش گڕیا
|
| واتش دەخیلم سزا پێم مەدەر
|
زووتەر وە تەعجیل قاپی گوشاد کەر
|
| ئامینە دەرلاد قاپی گوشاد کەرد
|
«عبدالمطلب» تەشریف وە تۆ بەرد
|
| نگا کەرد پەی نوور چێهرەی ئامینە
|
دیش خاڵی مەندەن جای ئەو خەزێنە
|
| تاقەت پێش نەمەند دەردەم بێچارە
|
دەس بەرد یەخەی وێش بکەرۆ پارە
|
| وات ئەو شوعلەی پاک نوور چێهرەی تۆ
|
ئاخر وە کۆ شی نەونەمام نۆ
|
| ئامینە واتش وەزع حەمڵم کەرد
|
بە یەک فەرزەندێ چوون دوڕدانەی فەرد
|
| «عبدالمطلب» واتش کۆن سا کۆ؟
|
باوەر نەداروون من وە حەرف تۆ
|
| چوون ئاسار ئەو هیچ دیار نیەن
|
بۆ ڕاس واچە پێم عەیب و عار نیەن
|
| ئامینە واتش مەبەر دڵ ئازار
|
خیلافش نیەن وە پەروەردگار
|
| ئێمشەو فەرزەندێ فەرزانەم دیەن
|
جە ڕوبع مەسکوون ڕەنگ ئەو نیەن
|
| گوزەشتەی عەجیب واقێعات شەو
|
یەکا یەک تەمام عەرزش کەرد وە ئەو
|
| واتش تیوورات مەغلووبە کەردەن
|
ناگا جە لای من موحەممەد بەردەن
|
| ئینە لەحزێوەن باز ئاوەردشان
|
دیسان هەم وە دەس من سپەردشان
|
| ئەو مورغ سفید مەوینی وە چەم
|
وێش چوون پەروانە ئەو کەردەن وە شەم
|
| موحەممەد بەردەن وێنەی قەوم و خوێش
|
دایم مەشغووڵەن وێش شیر مەدۆ پێش
|
| وە پارچەی حەریر پێچیان سەر تا پاش
|
نمازۆ ساتێ من بشوون وە لاش
|
| «عبدالمطلب» هێجران کەشیدە
|
وات ئیسە جە کۆن ئەو نوور دیدە
|
| دیدار پاکش بە من بنمانە
|
هەنی جەی فێشتەر ماوەر بەهانە
|
| ئامینە واتش هەی هات تۆ جە کۆ
|
مەتاوی وێنی دیدەی ماهـ نۆ
|
| چوون شەخسێ وە تەشت زەڕنێگارەوە
|
وە یەک دەست ئێبریق کەس نەدارەوە
|
| موحەممەد ئاوەرد خاو و خەرامان
|
غوسڵش دا تەمام سەر تا وە دامان
|
| واتش تا سێ ڕۆ نە پەردەی حەرەم
|
«ديار البشر» نەوینۆش وە چەم
|
| «عبدالمطلب» وات بە زات پاک
|
ئارۆ وێم یا تۆ مەکەروون هەلاک
|
| ئامینە زانا چارش ناچارەن
|
«عبدالمطلب» دڵ بێ قەرارەن
|
| واتش جە فڵان حوجرەی مونەووەر
|
پێچیان وە سۆف ئاڵای بۆ عەنبەر
|
| خاترت جەم بۆ دڵ مەدەر وە خەم
|
بشۆ فەرزەندت بوینە وە چەم
|
| «عبدالمطلب» شادی کەرد ئاغاز
|
شی قاپی حوجرەی مونەووەر کەرد واز
|
| جەماڵ حەزرەت بوینۆ وە چەم
|
کۆتا بۆ جە لاش ئاهـ و ناڵە و خەم
|
| دیش ناگا شەخسێ خێزا وێنەی شێر
|
غەڕڕا وە هەیبەت دەس دا وە شمشێر
|
| وات جەو زیاتەر پا نەنیەی نە وەر
|
مەکەرووت شەق شەق وە مەودای خەتەر
|
| موحەممەد مەخلووت مەلەکووت بیەن
|
تا سێ ڕۆژ مەجاڵ دیدەنش نیەن
|
| تا مەلایکان جە بەشارەتش
|
گشت نەبان فارغ جە زیارەتش
|
| راگەی کەس نیەن مەعلووم ببۆ لێت
|
بشۆ دماوە ساکن بەر پەی وێت
|
| «عبدالمطلب» ڕوو ئاوەرد وە پەس
|
جە خۆف ئەو شەخس نەکێشا نەفەس
|
| لەرزش شی نە دڵ وە بێ چەند و چوون
|
پەلاپەل بەرشی ڕوو کەرد وە بیروون
|
| مایل بێ کەرۆ قەزا بی مانع
|
پەی قەوم قورەیش بەیان واقع
|
| حەرفش شی نە بەند، تەمام کەوت جە دەنگ
|
هەفت شەو بێ زەبان وێنەی لاڵ و لەنگ
|
| جەو دما وە ئەمر حەیی لایەنام
|
شەوێ هەم زووتەر وەر جە نمای شام
|
| فریشتان عەرش جەو سەرزەمینە
|
موحەممەدشان بەرد وە لای ئامینە
|
| پستان شەربەت شیر پاک ئەو
|
نیان نە دەهان شەرەفناک ئەو
|
| جبرەئیل ئەسباب گەهوارەش کەرد جەم
|
تەختەی عوود تاشا چەنی چۆی قەڵەم
|
| کەردش پەی حەزرەت بێشکەی موبارەک
|
حازر بی جە غەیب تەمام تەدارەک
|
| میکائیل دەست پێچ جە نوور دروست کەرد
|
ئێسرافیل یاوا سەر بێشکەش ئاوەرد
|
| حامڵان عەرش هەر یەک قوماشێ
|
هەر یەکێ وە تەرح نەقش نەقاشێ
|
| ئاوەردن بە وار دەس دەس جە باڵا
|
فاخرەی بەهەشت ئەلوان ئاڵا
|
| پێچاشان وە تۆی تای زەڕ بافەوە
|
وە پارچەی پەڕ زەڕ سۆف سافەوە
|
| «عبدالمطلب» فارغ بی جە غەم
|
جە شادی سەر بەرد وە چەرخ هەفتەم
|
| چەند ئوشتر کەرد زێبح چەنی چەند ئەغنام
|
سێ ڕۆ تا ئێوار حازر کەرد تەعام
|
| دەس دەس مەخلۆقات وە زیافەت بەرد
|
زومرەی سەنادید قورەیش دەعوەت کەرد
|
| پەرساشان فەرزەند تۆ نامش چێشەن؟
|
واتش موحەممەد، مەحموود هەم وێشەن
|
| «عبدالمطلب» تا یەک ڕۆ بەردش
|
داخڵ وە حەرەم «بَيت الله» کەردش
|
| هەر چوار مەقام کەعبەی موعەززەم
|
تەواف کەرد تەمام پەی حێفز خاتەم
|
| ئەو ڕۆ هەر جە سوب تا کە خوەر ئاوا
|
موناجاتش کەرد هەر تا کە تاوا
|
| واتش ئێلاهی شای کەرەم بێ شۆ
|
موحەممەد تۆ دان سپەردم بە تۆ
|
| جە شەڕ دوشمەن جە مەکر شەیتان
|
هەم جە قەزای سەخت بەڵای ناگەهان
|
| جە دیدەی بەدان، جە قەزا و قەدەر
|
نگاداریش کەی دەهندەی داوەر
|
| جە «كعبة الله» هێممەت خواهی کەرد
|
تەشریف هەم وە تۆی قەسر بەیزا بەرد
|
| ئەو دانەی گەوهەر شێوە شیرینە
|
جە نۆ تەشریف بەرد وە لای ئامینە
|
| ئامینە واتش ئەی نوور دیدەم
|
تەوافت قەبووڵ ئەی بەرگوزیدەم
|
| دیڎەش چوون دیڎەی ئاهووان جە دوور
|
مەڕەشتش دایم بە سورمەی کۆی توور
|
| پرچ مشکینش مەکەرد وە شانە
|
هەر کەسێ مەڎیش خوێش و بێگانە
|
| رۆح وێش مەکەرد فیدای جەماڵش
|
مەفتوون بێ دایم بە نوقتەی خاڵش
|
