| تایفەی قورەیش جە کینە کێشان
|
شین وە زیارەت بوتخانەی وێشان
|
| جە بوتخانە دا شەو عەید مەکەردن
|
تەعام و شەراب، شەربەت مەوەردن
|
| عەید ئەوان و مەولوود خاتەم
|
ئێتتفاق ئەو شەو هەر دوو کەوت وە هەم
|
| دیشان بوتان گشت سەرنگوون بیەن
|
هیچ کام چوون جاران بەرقەرار نیەن
|
| هەر کام نە جای وێش کەوتەن وە ڕووی خاک
|
لێش واران غوبار سیای سەهمناک
|
| قەبیلەی قورەیش سەراسیمە وار
|
گشت وە ئاهـ سەرد حەیران بین جە کار
|
| بوتان جە ڕووی خاک هۆرگێرتن وە جەخت
|
یەک یەک نیاشان هەم وە بان تەخت
|
| دیسان هەم بەو تەور جە کوفر و جە کین
|
هەر بوتێ پەی وێش دا وە ڕووی زەمین
|
| غەرەز، تا سێ جار وە دڵ پەرێشان
|
بوتان نیان گشت وە جاگەی وێشان
|
| هەر سەرنگوون بین جە ڕووی خاک خەم
|
ئەسرین چوون سەیلاب مەڕێزان نە چەم
|
| تایفەی قورەیش وە شین و زاری
|
عەیدشان گێڵا وەی دەرد کاری
|
| واتشان سەوگەند وە ڕوتبەی وێتان
|
سا ئاخر یە چێش قۆمیان لێتان
|
| یەک بوتێ عەزیم ئەعلای ئەوان بێ
|
جە لاشان مەعبوود باقی بوتان بێ
|
| شەیتان شی نە قەلب ئەو چۆی سەندەڵ تەرز
|
ئاما وە جواو وە ئاواز بەرز
|
| وات ئەی موعاشێر نیەن ئاگاتان
|
خراب بی مەسکەن بوتخانە و جاتان
|
| ئێمشەو موحەممەد مەحموود موختار
|
موستەفای مورسەل حەبیب جەببار
|
| تەوەللود بیەن جە والێدەی وێش
|
ئامان وە دنیا بێ خۆف و ئەندێش
|
| نە عەیش مەمانۆ نە هەوا و هەوەس
|
نە بوت مەمانۆ نە بوتخانە و کەس
|
| گشت مەبان باتڵ وەی وە یانەم وەی
|
تەرک مەبۆ بازار نۆشانۆش مەی
|
| چوونکە پێغەمبەر ئاخر زەمانەن
|
ناسێخ و مەنسووخ باقی ئەدیانەن
|
