| شەوێ جە شەوان شی نە جامەی خواب
|
سەر نیا وە بان موتتەکای سەنجاب
|
| جە خاو دا دیش یەک زەنجیر زەڕ
|
تەمام شەرق و غەرب مڵک بەحر و بەڕ
|
| وە ئەمر بێچوون پاک ئێلاهی
|
پۆشان ڕووی زەمین جە مە تا ماهی
|
| سەر حەڵقەش جە بان پەشت ئەو بەندەن
|
سۆماش جە سۆمای ئافتاب سەندەن
|
| ناگا ئەو زەنجیر پەڕ زیب و زیوەر
|
تەبدیل بی بە یەک درەخت ئەخزەر
|
| بەڵام ئەو درەخت پاکیزەی قەشەنگ
|
چەم وەردەن چەنی مێوەی ڕەنگاوڕەنگ
|
| دوو پیر کامڵ نوورانی خۆش بەخت
|
نیشتەبێن هەر دوو جە پای ئەو درەخت
|
| جەو واقێعاتە کەردش تەعەججوب
|
نێدا کەردن لێش یا «عبدالمطلب»
|
| بەختت بوڵەندەن کەوکەبت بەرزەن
|
بورج تالعت سەد هەزار تەرزەن
|
| تا پەرسا لێشان نامتان چێشەن؟
|
جەی عەجایبات دڵ وە ئەندێشەن
|
| یەکێشان وات نووح «نجي الله» نان
|
ئەو وات ئێبراهیم «خليل الله» نان
|
| واتشان ئی دار پەڕ بادەی ساوا
|
پەشت بە پەشت ئامان ها وە تۆ یاوا
|
| هێمای نەو هاڵەن نەیاوناش بەر
|
پەی تۆ تا مەحشەر مەبەخشۆ سەمەر
|
| «عبدالمطلب» سەراسیمە وار
|
جە خاو شیرین دەرسات بی بێدار
|
| عەرەق جە فەرقش مەڕێزا تاو تاو
|
شی وە لای کاهن پەی تەعبیر خاو
|
| دەرلاد پەی کاهن خاوش ئەدا کەرد
|
کاهن جە ئەندێش کێشا ئاهـ سەرد
|
| واتش ئی خاوە ئەسڵی و تەعبیرەن
|
ئانە شەخسێوەن ڕۆشن زەمیرەن
|
| مەعلوومەن جە پەشت تۆ پەیدا مەبۆ
|
جە قاف تا وە قاف هووەیدا مەبۆ
|
| تێغ موعجێزەش چوون برێقەی بەرق
|
خارا شکافەن جە غەرب تا وە شەرق
|
| جوملەی مەخلووقات دنیا سەرانسەر
|
بە ئێعجاز ئەو مەبۆ موسەخخەر
|
| موقیمان فەوق گرۆی مەلەکووت
|
ساکنان سەتح دایرەی ناسووت
|
| غاشیەی ئەمرش مەکێشان وە دۆش
|
حەڵقەی غوڵامیش مەکەران نە گۆش
|
| زەنجیر دەلیلەن پەی ئەحکام دین
|
حەڵقەش ئوممەتەن سلسلەن چین چین
|
| درەخت شاهێوەن «جَديد الاُصول»
|
هەرگێز جە دارەین نمەبۆ مەعزوول
|
| هەر کەس جە ئەمرش خەلاف کار مەبۆ
|
وێنەی قەوم نووح گرفتار مەبۆ
|
| رای خێلەل نیەن جە نبووەتش
|
شافێعەن پەی گشت گرۆی ئوممەتش
|
| دەلیلەن، ڕەهبەر، ڕاسەن، ڕەهنموون
|
ها وەختەن بەیۆ وە ڕووی دنیای دوون
|
| تەعبیر خاوت خوەلاسەی کەلام
|
هەر ئێڎەن واتم باقي وَالسَّلام
|
