| چوون نوور حەزرەت شای ئەعلا ڕەقەم
|
بەرشی جە بەهەشت یاوا وە ئادەم
|
| جە ئادەم و شیس چوون قەترەی مەنقووش
|
جە لای شیس هەم شی وە جەبهەی ئەنووش
|
| جە ئەنووش ویەرد وە قنیان یاوا
|
چوون باغچەی بەهەشت دنیا کەرد ئاوا
|
| وە یەد قودرەت پادشای جەلیل
|
جە قنیان هەم شی وە لای مێهلائیل
|
| وە ئەمر سوبحان تاک تەنیای فەرد
|
جە لای مێهلائیل یاوا وە لای بەرد
|
| جە بەرد هەم بەرشی چوون خەدەنگ دووخ
|
مەنزڵ بەرد وە تەخت پێشانی ئەخنووخ
|
| هەم جە لای ئەخنووخ بەرشی وە ناکام
|
یاوا وە ئێدریس «عليه السلام»
|
| سا وەختێ ئێدریس فەندێ بەر ئاوەرد
|
ئێرادەی عرووج قەسر بەهەشت کەرد
|
| نوور موحەممەد چوون ئایەی ناسخ
|
بەرشی تا یاوا وە مەشووشەلخ
|
| جەهان کەرد ڕۆشن سەما تا سەمەک
|
دیسان تەشریف بەرد وە جەبهەی کەمەک
|
| نەگێرتش قەرار وە سەد ئێحتێرام
|
تا یاوا وە نووح «عليه السلام»
|
| سا با تا چەند ساڵ چوون خەرمان گوڵ
|
جەبهەی پاک نووح ببۆش وە مەنزڵ
|
| بەڵێ، جەو دەم نووح «نبي الله» بێ
|
سەردار ئەولاد «صفي الله» بێ
|
| نیزام دەهندەی گشت بێ نەزمان بێ
|
ئەوەڵین پەنج ئولولعەزمان بێ
|
| دایم هەر مەشغووڵ وە ڕێعایەت بێ
|
خەریک ئێرشاد ڕای هێدایەت بێ
|
| تا کە هەفتسەد ساڵ جە عومرش ویەرد
|
عومر وێش نە ڕای گومڕاهان سەرف کەرد
|
| بەعزێ بەو حەزرەت ئیمان ئاوەردن
|
ما باقی یەکسەر سوحبەت مەکەردن
|
| ئەوانیچ شەیتان غاڵب بی لێشان
|
گشت پەشیمان بین جە قەوڵ وێشان
|
| قەوم بەد ئەندێش بێ حەیای بەد نام
|
پشت کەردن وە نووح ڕوو وە لای ئەسنام
|
| چوون جە تایفەی توخم قابیل بین
|
جە مەکر شەیتان تەمام زەلیل بین
|
