| ئوستاد سانع کولل مەسنووعات
|
ئیجاد کونەندەی جوملەی مەوجوودات
|
| مێعمار تەڕدەست، ڕەنگ عەمار باف
|
بێ ماڵە و جەدوەل، گوونیا و تەناف
|
| بێ مزد و مێننەت، بێ سپا و ئەسباب
|
بێ فەعەلە و قاڵ، بێ خورد و بێ خواب
|
| بێ خاک و بێ ئاو، بێ سەنگ و بێ خشت
|
بەنای موقتەدر، مەوجود ساز گشت
|
| جە سوبح سادق یەکشەنبەی ئەوەل
|
قودرەت بەرد وە کار دنیای پەڕ خێلەل
|
| جەهەننەم جە تەحت دنیا دا قەرار
|
زوڵماتێ جە بان دووزەخ کەرد ئێزهار
|
| بادی عەجایب، جە بان زوڵمات
|
ونارا تا ڕۆی هەیهات و هەیهات
|
| دیسان هەم بەحرێ جەو دەم کەرد ئیجاد
|
موعەووەق مدران وە بان ئەو باد
|
| چهل هەزار ساڵ ڕای قەعرش دوورەن
|
وە قەوڵ ڕاوی وەی تەور مەشهوورەن
|
| ماهی عەزیمێ، بزورگ ئەزرەق
|
سرشت کەرد واحێد سنعەت ساز حەق
|
| جەو بەحر بێ پەی، مدران بێ لەنگەر
|
مەبۆ نەلەخشۆ تا وە ڕۆی مەحشەر
|
| جە پشت ماهی سازا یەک بەقەر
|
هەشتاد هەزار عەین، چهل هەزار سەر
|
| ما بەین ئی سەر هەتا کە ئەو سەر
|
پانسەد ساڵ ڕاهەن بەڵکە زیادتەر
|
| هەر سەرێ میقدار سێسەد شاخ دارۆ
|
هەر شاخێ تەسبیح زیکرێ مەویارۆ
|
| ئوستاد نەققاش لاجەوەرد کاری
|
جە کەف جەوهەر دانەی مرواری
|
| وە یەد قودرەت بێ هەمتایی وێش
|
هەفت تەبەق زەمین دڵڕوبای دڵکێش
|
| سازنا وەی تەور زات ئێلاهی
|
نیاش نە موهرەی پشت گا و ماهی
|
| مەعلووم بۆ ڕاوی ڕێوایەت ڕاسەن
|
چوونکە فەرمودەی ئێبن عەباسەن
|
| بەڵام چوون بەقەر سەبوک بی بارش
|
نمەبی دنیا ساتێ قەرارش
|
| ئارامش نەبی نە وەقت و بێ وەقت
|
دایم مەلەرزا چوون زلزلەی سەخت
|
| دیسان هەم جە نۆ بینای بان سەر
|
خێلقەت کەرد کاوان کەش و کۆ و کەمەر
|
| هەردان و زەردان، شاخان، ئێڵاخان
|
بەرزان، کۆساران، زاخان، سەخناخان
|
| کان کۆی کەرەم «رب العالمين»
|
قەرار دا بەین بەین نە ڕووی سەر زەمین
|
| بەڵ لادێ زەمین بگیرۆ ئارام
|
هەنی ساکن بۆ تا «قام القيام»
|
| سەنگ و هەرد و خاک گشت مولاقی بی
|
حەرەکەی زەمین باز هەر باقی بی
|
| دیسان هەم بێ باک دانای سنعەت باف
|
مەوجوود کەرد دەر دەم هەر هەفت قوللەی قاف
|
| جە هەر هەفت ئێقلیم دەور دنیای دوون
|
قافش قەرار دا وە بێ چەند و چوون
|
| جەو زلزلەی سەخت جای هەوڵناک دا
|
کۆوان وێنەی مێخ کۆیا نە خاک دا
|
| زەمین سەنگین بی هەر تا کە تاوا
|
تا سەنگیش وە پشت گا و ماهی یاوا
|
| غەرەز وە کۆی قاف کاوان گشتەوە
|
ئەوسا نە جونبش دنیا نیشتە وە
|
| بەڵام دنیای دوون بەرەنگ دڵبەر
|
خاڵی جە شنۆی سەڎای زی بەشەر
|
| مڵک بێ ساحێب، یۆرت چۆڵ و هۆڵ
|
نە شنۆی شەماڵ، نە شنیای چاتۆڵ
|
| نە شار، نە قەریە، نە ئابادانی
|
نە دار، نە ئاتەش، نە ئاو، نە کانی
|
| تەنیای بێ شەریک لوتفش یاری کەرد
|
پەی ئاوەدانی ئاوش جاری کەرد
|
| ئەشجارات تەمام، نەباتات یەکسەر
|
بەر ئاما جە خاک بە ئەمر داوەر
|
| وە حوکم و فەرمان پادشای ئەقدەس
|
ئاما ئاتەشێ وە یەک نیم نەفەس
|
| جە کۆرەی دووزەخ کەوت وە سەر بەسات
|
باقیەن تا ڕۆی عەرسەی عەرەسات
|
| پەی ئێڎ تا کەمتەر ببۆش سۆز و تاو
|
هەفت جار شوستشان، شششان وە ئاو
|
| یە گشت جە قودرەت قەدیم بێ چوون
|
وەی تەور دایر بی نە ڕووی دەهر دوون
|
| تەیر و وحووش و مورغ و مۆر و مار
|
غەیر جە ئادەمی سازا وە یەک جار
|
| نە چۆڵ ئاوان قەرار دا جاشان
|
مەعاش و ڕۆزی، زێڎ و ماواشان
|
| غەرەز وە شش ڕۆ یاوا وە ئێتمام
|
حەق وێش فەرماوان «سِتَّةِ أَيَّام»
|
