| بە نام بێ چوون، پادشای ئەکبەر
|
قەدیم قادر، حەیی تەوانگەر
|
| بە نام بێ چوون فەرد «ذُو الْجَلال»
|
جەهان ئافەرین ڕۆژ و مانگ و ساڵ
|
| کەریم کارساز، کەرەم فراوان
|
ڕەحمان و ڕەحیم، سەنەندەی تاوان
|
| بێ ڕەنگ، بێ شەریک، بێ بەدەڵ، بێ کەس
|
زات بێ زەواڵ، فەرد فەریادڕەس
|
| حەلل موشکڵات ئاشوفتەکاران
|
ئاگا جە قەترە، دارای ئەقتاران
|
| دارای جەهاندار، دەهندەی بێ باک
|
ئافەریدەی جنس ئادەمی جە خاک
|
| نگەدار چەرخ نۆ تاق گەردوون
|
ئوستاد ئەزەڵ، کار «كُنْ فَيَكُن»
|
| دەهەندەی داوەر، دانای بێ نیاز
|
مێعمار دەوران، دنیای ڕۆشن ساز
|
| تەنیای لامەکان، فەرد بێ نەزیر
|
بێ دیدە و بێ گۆش، سەمیع و بەسیر
|
| گۆیای بێ زەبان، ڕەهنەمای جەلیل
|
فورقان و زەبوور، تەورات و ئێنجیل
|
| بێ هەمتای عەزیم، «واحِدُ الْأحَد»
|
تاق «لَمْ يَلِد»، هەم وە «لَمْ يولَد»
|
| شەهنشای عادڵ، ڕەئووف بێ عەیب
|
ڕازق ڕۆزی جە کارخانەی غەیب
|
| «واجِب الوجود» دانای لایەنام
|
ڕۆشن ئەفزای سوبح، تاریک نمای شام
|
| بە موفلیسان بەخش ڕوتبەی شاهی دەر
|
ئاخر هەم شاهان وە خاک موحتاج کەر
|
| خوڎای بوڵەندی و پەستی هەر تۆنی
|
جە هەستی و نیستی، هەستی هەر تۆنی
|
| ڕۆشنایی بەخش ڕۆژان هەر تۆنی
|
تاریکە دەیجوور شەوان هەر تۆنی
|
| ئاگا بە «سِرّ الْخَفِیّات» تۆنی
|
بەهرەی کەرامات کەشفیات تۆنی
|
| قەیووم قایم، سانع هەر تۆنی
|
کەریم و موعتی، بێ مانع تۆنی
|
| دنیا و مافیها، ئەشیا گشت تۆنی
|
فەوت و مەوت و سەوت، ئەحیا گشت تۆنی
|
| حەرەکە و جونبش جسمانی تۆنی
|
قووەی زۆر و زات ڕۆحانی تۆنی
|
| غەرەز هیچ نیەن، هەرچی هەن تۆنی
|
هەر جا حازری، نمەز جە کۆنی
|
| نەزدیک تەر جە ڕەگ گەردەن وە گشت کەس
|
تۆ نەزدیک تەری فەرد فەریادڕەس
|
| یا حەق وە کەرەم بڎەر تەوفێقم
|
تەوفێقت جە سەر ببۆ ڕەفێقم
|
| ڕۆشن کەر شوعلەی بینایی عەینم
|
پەرداخ دەر جە عام ئایێنەی زەینم
|
| تەبعم نە جاران خاستەر مەوزوون بۆ
|
فەردم چوون دانەی دوڕ مەکنوون بۆ
|
| تێغ زەبانم سەوهان دەی جە نۆ
|
بڕشت بۆ وە چەرخ گوشای فەزڵ تۆ
|
| هەوای خەیاڵم ببۆ بە جەوهەر
|
حوجرەی دەرونم پەڕ کەی جە گەوهەر
|
| تا بواچوون مەدح شای بوڕاق سوار
|
ئەحمەد، موحەممەد، موستەفای موختار
|
| «خَتم المُرسَلين» حەبیب داوەر
|
شەفیع دیوان زلزلەی مەحشەر
|
| هەر ئەو شەو مەولوود پاک شەریفش
|
ئاما وە دنیا جسم لەتیفش
|
| موعجێزەی تفڵیش تاکوو چل ساڵە
|
یەک یەک بەیان کەم چوون بن قەواڵە
|
| گرۆی ئەهل و بەیت شای «خيرالأنام»
|
خولەفا و ئەسحاب، زومرەی خاس و عام
|
| مەعرەکە و جداڵ، هەر چی بۆ لزووم
|
غەزای قەتڵ و عام کافران شووم
|
| جەمع ئەسحابان شای «خيرالأنام»
|
بەر موحەممەد بۆ سەڵوات و سەلام
|
| شەجیع ئەسحاب شای «خيرالبشر»
|
باوەروون وە نەزم چوون دوڕ و گەوهەر
|
| کتابچەی شیرین چوون توحفەی شاران
|
ڕەواج بۆ دایم جە لای دینداران
|
| هەر کەس بوانۆش وە ئێخلاس پاک
|
شەفاعەت خواش بۆ شای تاج «لَولاك»
|
| واجبەن سەنای سالاران دین
|
خوڎا ڕازی بۆ لێشان ئەجمەعین
|
| هەر جە ئەو ساعەت تا ڕۆی عەرەسات
|
بەر سەفا سەفای موستەفا سەڵوات
|
