دیوان شاکە و خان مەسۊر/پەێک ١

by شاکە و خان مەسۊر

←دڵداری ١٣

دیوان شاکە و خان مەسۊر by شاکە و خان مەسۊر پەێک ١

پەێک ٢→

خان مه‌سۊر: شه‌ماڵ وه‌ ئه‌ێوان، شه‌ماڵ وه‌ ئه‌ێوان	ده‌سم ئامانه‌ت مه‌چی وه‌ ئه‌ێوان
شه‌ماڵ وه‌ وه‌ته‌ن، شه‌ماڵ وه‌ وه‌ته‌ن	ده‌س وه‌ وه‌ دامه‌نت مه‌چی وه‌ وه‌ته‌ن
مه‌چی وه‌ وه‌ته‌ن وه‌ ساێ دار وه‌ن	جه‌سه‌م نیشان ده‌ی ده‌ ڕاێ سه‌ی حه‌سه‌ن
شه‌ماڵ به‌ن وه‌ به‌ن، شه‌ماڵ به‌ن وه‌ به‌ن	ده‌س وه‌ دامانم مه‌چی وه‌ وه‌ته‌ن
ئه‌ێوان که‌ن که‌نه‌ن، ئه‌ێوان که‌ن که‌نه‌ن	له‌ لاێ ماڵشان دز گوشگه‌ێ هه‌نه‌ن
شه‌ماڵ تۆ مه‌حره‌م بێگانه‌و خیشی	باێه‌د ئه‌ێ جه‌وره‌ په‌ێ من بکیشی
مه‌چی وه‌ مابه‌ێن خوڕان و بازان	جاگه‌ێ عه‌یش و نووش که‌مه‌ن درازان
له‌ بن که‌نێ خووه‌ت به‌ر وه‌ پێوار	نه‌وانا وه‌ لێت بوون خه‌وه‌ردار
جاگه‌ێ ده‌س چه‌پ وه‌رد نیه‌ێ له‌ مێشت	ته‌نیا وانه‌ێ هه‌س له‌و لاێ وانه‌یل گێشت
که‌نه‌ن که‌ ناوه‌ن، به‌هاراو که‌نه‌ن	له‌و لاێ ئه‌و که‌نه‌، دز کووشگه‌ێ هه‌نه‌ن
شه‌ماڵ له‌و که‌نه‌ بووس تا نیمه‌ شه‌و	تا وه‌خت واده‌ێ ئێڵ مه‌چووگه‌و خه‌و
ئه‌و حه‌ڵقه‌ێ که‌مه‌ن گیسوو گوور نه‌یت	به‌هرام نه‌مه‌د پووش ئه‌رگ دوور نه‌یت
شێخ سه‌نا نه‌یت وه‌و حاڵاته‌وه‌	وه‌و سکه‌ێ سفێد خجاڵاته‌وه‌
نازار خه‌فتگه‌ خاووێ وه‌ نازه‌	لا وه‌یشت گه‌رما شه‌و یه‌قه‌ێ وازه‌
چیت ئه‌سپه‌ر پێچ ها له‌ خووار پاش	وه‌ ڕۊ ئه‌و چیته‌ شه‌و بچوو وه‌ لاش
ئه‌گه‌ر خه‌فتگه‌ نه‌ده‌ی وه‌ خارێ	ئه‌گه‌ر بێداره‌ مه‌ده‌ی ئازارێ
بیلا بێدار بوو ئه‌و شرین خاووان	وه‌وو په‌نجه‌ێ شه‌ماڵ ده‌س به‌ێ وه‌ چاووان
ده‌س به‌ێ وه‌و چاووان گوپار گه‌رده‌ خه‌و	ئه‌جه‌و وه‌و سه‌روه‌ن وه‌ ناز به‌سه‌ ته‌و
ده‌س دا وه‌ چاووان، له‌ ماڵ هاته‌و ده‌ر	وڵات ڕووشن کرد وه‌رجه لیسک خوه‌ر
ئۊشی وه‌ پێدا تا وه‌ نزم شه‌و	تا وه‌خت واده‌ێ ئه‌و مه‌چووگه‌و خه‌و
مه‌چید ئه‌و حوزوور پاێ ته‌خت عالی	بێ ئه‌ده‌و حه‌رزه‌ی وێش نه‌که‌ی حالی
بوواچ من نامه‌ێ قه‌ێسه‌م ئاورده‌ن	قه‌ێس هه‌م په‌رێ تو ئێمانش هه‌رده‌ن