دیوان شاکە و خان مەسۊر/دڵداری ٣

From Wikisource
Jump to navigation Jump to search
دیوان شاکە و خان مەسۊر by شاکە و خان مەسۊر
دڵداری ٣
خان مەسۊرː شاکە ڕازان دیم، شاکە ڕازان دیمǃ وە دیدەت قەسەم عەجەو ڕازان دیم
وە کەماڵ مەیل دڵنەوازان دیم جفتێ ماسک لە لێو سەراوبازان دیم
ماێشتەێ دارایی دان لە دەور بەێ گاگا چۊ سەرسەوز دەلیا مەکەن تەێ
ماێشتەێ دارایی دان لە شەکەرنەێ یەک یەک چۊ ماسی دەلیا مەکەن تەێ
ماێشتەێ دارایی دان لە دەور ناف دان وە گلاڵا زوڵف کڵاف کڵاف
لە ئاو دراتن خاڵ وە رێشتەوە خان مەسۊر دێیان لە مانێشتەوە
ماسک سەر رەوێشت نواێ ماسکانǃ ھەێǃ لە خشەێ سەرمل وێش ھەراسانǃ ھەێ
گام گوڵریژ نەو خەرامانǃ ھەێǃ قیقەێ باڵابەرز سووسەن خاڵانǃ ھەێǃ
سپاێ سەونز و دێز نەووەھارانǃ ھەێǃ زڵاێ زوڵف شووڕ سەرسوارانǃ ھەێǃ
گەل گەل نازاران پێچ دان وە گەردەن تووز باێ شەماڵ لە ڕۊ خاڵ بەردەن
گەل گەل نازاران شووخ شکار چاو وە پەنجەێ شمشاڵ یەک مێان قەشاو
لە سەر سیە قڵا، لە لاشە بەتن پەریت بواچم کول کورپە دۊەتن
لە ئاو دراتن جەڵا دان سەروەن سەف دان چۊ کەڵ رەم دیار دەروەن
وێنەێ کەمووتەر شەقە دان لە باڵ وە یەێ عەێنلا داخڵ بۊن وە ماڵ
دو دوڕ، دو یاقووت، دو دانە لاڵ دیم لە ڕۊ دو سینە دو قوپەێ زاڵ دیم
وەللا وە تاقیق دو شەخش لەێ ڕەنگە گوڵ سفێد وێنەێ داناێ فەرەنگە
ھەردگیان وە ھەم تۊلە نەمامەن داێم خەدێشان وە سورمە و جامەن
گەورە لە وێنەێ نەمام لە ئاوا بۊچگ لە وێنەێ نەوتۊل ساوا
گەورە لە وێنەێ سوورگوڵ لە باخان بۊچگ لە وێنەێ بەڕەزاێ شاخان
بۊچگ لە وێنەێ ڕەنگی مەنارە گەورە لە وێنەێ ئسپێ چنارە