دیوانی مەولەوی/گ
گەرد ئالوودەن دەور مەزاری لەیلێ
[edit]| گەردئالوودەن دەور مەزاری لەیلێ | ئاوپاشی و ماڵاش لازمەن خەیلێ |
| خادمیی توربەت نازک ئەندامان | پەی دیدە و موژگان مەعدوومی ئامان |
| ئاوپاشی، ڕەویەی دیدەی نم دیدەم | ماڵاش، وەزیفەی موژەی نمیدەم |
| گەردێ نێ وە ڕووی یانەی نۆشەدا | یا خەوشێ وە حەوش عەنبەر بۆشەدا |
| پاسی نازکیی لەیل یاگەی وێشەن | جای موشاهەدەی قەیسی دڵڕێشەن |
| بەڵ باڵای ئاڵاش وە سەد خەم و چەم | باز وینوون بێخەم وەی چەم یا ئەو چەم |
| مەعدووم تاوی یاو دووری زۆر ئاوەرد | تاویا و بینای قسەی پەشێو کەرد |
| ماخۆلیایی یاو ئینە خدێشەن | وەرنە ئەی خەیاڵ پەرێشان چێشەن |
| فەسڵی وەسڵی بەزم خاسەی نەدیمان | خاوێ بی ویەرد، دیمان نەدیمان |
| بەتاڵەن هەوای دۆسی کۆچ کەردە | مەحاڵەن ئامای عومری ویەردە |
| بنیش نە گێجاو دەریای بێ پەیدا | نە گۆشەی حوجرەی سەفینەی مەیدا |
| ڕووت ڕووت ئەو جیلوەی ستارە کەر ڕاس | با خودا وە ئیخلاس، ناخودا مەناس |
| تا بادی مراد نە پێوارەوە | کەی بدۆت ئاخر ئەو کەنارەوە |
گۆشەی ئاتەشخان دڵەی پڕ جە ئێش
[edit]| گۆشەی ئاتەشخان دڵەی پڕ جە ئێش | پزیسکەی داخان ئایر وەردا تێش |
| دوودی ماردومان دوود نە فەرقم بەرد | هەوای کەڵڕەمان خۆ پاماڵم کەرد |
| پێچ مدەو چەنی زامانی کاری | نە پای ئامام هەن نە ڕستگاری |
| فەڵەک کەی بەرشوون بێخەم نە دەستت | چێشم کەرد، کەی بیم وە باوە کوشتت |
| ئەر چون غەمزەی دۆس پڕ جە ئێش و دەرد | چون فرسەتبازان پێش دەستییەش کەرد |
| ساڕێش مبۆ زام دووری تۆ کەردە | مەکەرمێ سەیران چەن وەخت ویەردە |
| وەر فرسەت نەدا فەڵەک وێنەی وێش | تۆ سڵامەت بی ئەر من نەبوو چێش |
گوم بی چون خورشید ئەو نە پڕتەودا
[edit]| گوم بی چون خورشید ئەو نە پڕتەودا | گوم بی ئەهلی عیلم نە شۆڵەی ئەودا |
| نار مەکەرد وە سەر دڵ سازانەدا | نادر بی جە ناو هامڕازانەدا |
| بنویس وە هووناو دڵ نە پەڕەی جەرگ: | نادر شێخ علی پەی تەئریخی مەرگ |
گێجی ئاڵانیی ها بە دۆشەوە
[edit]| گێجی ئاڵانیی ها بە دۆشەوە | وە قولابی چەنگ ئاهێر نۆشەوە |
| دوو ئەبرۆی سیای موژان چڕیدە | نە ڕای بەندەگیش قەترانی دیدە |
گەرمیی کوورەی قەیسی چۆڵ گەردەن
[edit]| گەرمیی کوورەی مەیل قەیسی چۆڵ گەردەن | تەئسیر نە تۆی دڵ لەیلێ ئاوەردەن |
| بەڵ نە تاو ڕەقیب وە دەرد مەشهوورەن | وەرنە دەرد و لەیل هەی نە یەک دوورەن |
گۆشەی سیاماڵ هوردا و دیاوە
[edit]| گۆشەی سیاماڵ هوردا و دیاوە | چون مانگ نە گۆشەی هەوری سیاوە |
| بە خودا قەسەم پاسەم ئومێدەن | حُورٌ مَقْصُوراتْ فِي الْخِیام ئێدەن |
گەر زەڕەی هەیە پێتەوە
[edit]| گەر زەڕەی شعوور هەیە پێتەوە | کە وتیان خودا ئەبڕێتەوە |