دڵ ناڵانشەن
Jump to navigation
Jump to search
| دڵ ناڵانشەن، دڵ ناڵانشەن | هامسەران جە دەرد، دڵ ناڵانشەن |
| زویریش جە تاو خەیاڵانشەن | ئارەزوی تەواف عەوداڵانشەن |
| جە دووری یاران بێ قەراریمەن | واوەیلاوو حەشر، شین و زاریمەن |
| ئارەزووم کەردەن چوون قەدیم ساڵان | بشوون پەی تەواف بارگەی «عەوداڵان» |
| بە دڵەی غەمناک نامرادەوە | بە دەرون غەمبار خەم بە بادەوە |
| فەسڵی گوڵ گەشتەن، وادەی گوڵانەن | عەترشان دەوای دەردی دڵانەن |
| ئێمە و دڵ هەردوو، بە زاری و لاڵان | با بشمێ وە سەیر بارگەی عەوداڵان |
| پەی دیدارشان گەرمی تاسەمەن | سەر زەمین گرتەن، دووی هەناسەمەن |
| «پیر ڕۆستەم» وێران، کەس نیەن تێشدا | وێرانیش مەدۆ جەرگم بە نێشدا |
| «شەوبۆ»ش نیلی پۆش، خەمگین دیارەن | «چنوور»ش پەشێو، چوون زوڵفی یارەن |
| سەربەرزان، هەردان، عەوداڵان تارەن | سەیرش پەی یاران چوون ژەهری مارەن |
| با بە دۆعای خەیر یاران کەرمێ شاد | خاسی عەوداڵان باوەرمێ وەیاد |
| هەر هەفت عەوداڵان بگێرمێ دامان | بەڵکم بیاوان یاران وەلامان |
| یا هەفت عەوداڵان دڵ پاکی دڵ ساف | نامتان مەشهوورەن جە قاف تا بە قاف |
| ساکنانی غار، کۆی بەرزو بوڵەند | دۆعا مەقبوڵان بارگەی خوداوەند |
| وە بەرزی ئەو کۆ بەرز بۆ پایەتان | بە دایم پەیمان مەنۆ سایەتان |
| سەیدی شەرتش بۆ چوون وەفا داران | بەیۆ پەی تەواف بارگەی عەوداڵان |
This work was published before January 1, 1929, and is in the public domain worldwide because the author died at least 100 years ago.
Public domainPublic domainfalsefalse