دوێشەو لە خەوا دیم سەنەمێ نازک و نازدار
Jump to navigation
Jump to search
| دوێشەو لە خەوا دیم سەنەمێ نازک و نازدار | شیرین دەهەنێ غونچە لەبێ وەک گوڵی گوڵزار |
| جانم بە فیدای بێ نەکوو جارێکی هەزار جار | بۆ ئەو قەدە، ئەو قامەتە، ئەو لێوە شەکەربار |
| لاکین لە دڵا مات و مەلوول، عاجز و غەمبار | |
| نازک سەنەمێ چاوی وەکوو نێرگسی شەهلا | گەردەن بە مەسەل عەینی وەکوو گەردنی مینا |
| قامەت چ قیامەت چ بڵێم قامەتە هەڵسا | دەستکردەیی ئوستادی ئەزەل حەزرەتی مەولا |
| دوور بێ لە بەڵای چاوی بەد و تەعنەیی ئەغیار | |
| قابیل نییە مەدحی چ لە حوسنا چ کەماڵا | ئەم نەوعە جەماڵە نەبووە هیچ لە خەیاڵا |
| ئەو قامەتە باریکە بەڵایە نەکوو باڵا | گوڵ گوڵ وەکوو تاوووسە لە نەقش و خەت و خاڵا |
| دوور بێ لە بەڵای چاوی حەسوودانی بەد ئەفکار | |
| لەو شەمسی ڕوخەی شەمسی فەلەک نەختێ حەیا کا | دەورانی بەجێ بێڵێ بەرەو کۆی ئەوێ ڕاکا |
| شوعلەی کە لەسەر ئەرزە بەرەو ڕوویی سەما کا | لازم نییە حاجەت بە زیا ڕەونەقی ناکا |
| دونیایە چراخانە شەو و ڕۆژی بە یەکجار | |
| لەگەڵ ئەو حۆسن و جەماڵە کە هەیە ڕووت و پەرێشان | بیبینە لەسەر تەوقی سەری تاکوو بە دامان |
| بەم بینینە بوو ماڵی من و عالەمێ وێران | ڕۆژم بووە عاشوور و بە کوڵ کەوتمە گریان |
| بۆ ئەو گوڵی نازدارە وەکوو ئاهوویی تاتار | |
| ئەمجا نەزەرم کردە جەماڵێکی بزڕکاو | ئاڵۆز و تەواو پەرش و پەشێو پەرچەمی ژاکاو |
| لەم لاوە بۆ ئەو لاوە چەماوە قەدی لاولاو | وەک توولە نەمامێ لە سەر و ژێری چەم و ئاو |
| بێ بەرگ و لق و پۆپی ڕزیو شوێنی سەرەوخوار | |
| فرمێسکی ئەڕشت عەینی وەکوو هەوری بەهاری | لێم پرسی بڵێ پێم چییە وا گریە و زاری |
| زارم بە فیدای تەنگی وەکوو غونچەیی زاری | دەک موڵکی سلێمانی هەموو بێ بە نیساری |
| ئەسبابی چییە ئەی سەنەما گریە و ئازار؟ | |
| ئەو وەختە کە دیم ئاگری بەردایە گیانم | هەر ئەو دەمە بێخود لەپڕا لاڵ بوو زمانم |
| بەو داغەوە وا ئاخری هات وەقت و زەمانم | هاوارە ئەوا دەرچوو لە تەن ڕۆحی ڕەوانم |
| ناڵەم ئەچووە چەرخی فەڵەک گونبەدی دەوار | |
| پێم گوت سەنەما بەهری خوداوەندی نەدیوە | بەو حوسن و جەماڵەی کە خودا داویە بە ئێوە |
| جوابی بدە ئەی ڕۆحی ڕەوان لەو دەم و لێوە | فریام کەوە ڕۆحم لە بەدەن دەرچوو بە پێوە |
| غەم بوو بوو ئەنیسم غەمی تۆیش لێم بووە سەربار | |
| ڕۆحم بە فیدات بۆ چی وەها مات و حەزینی | ئەسبابی چییە ئەی سەنەما چاو بە گرینی |
| وا مات و مەلوولی شەو و ڕۆژ گۆشەنشینی | خۆزگەم بەوە ئەمزانی چییە بۆ چی غەمینی |
| مردم لە غەما خەڵقە دەخیل فرسەتە هاوار | |
| لێم هاتە جواب و گوتی من مادەری کوردم | مەعلوومە کە پەروەردەکەری کوردی نەبەردم |
| بێشک نییە ئێستە کە ئەبینی ڕوخی زەردم | سەد خۆزگە بە سەد خۆزگە کە من زووتر ئەمردم |
| نەمدیایە نەوەم ببنە ئەسیر خادمی خوێنخوار | |
| من مادەری کوردانی زەمان هەر وەکوو شێر بووم | شێرانی نەبەرد دایکی کوڕی کوردی نەبەرد بووم |
| ژێردەستی نەوەی من بوو هەموو مەملەکەتی ڕووم | ئێران و هەموو موڵکی خەتا خاکی قەراقووم |
| ئەمبەخشی هەموو تاجی سەری قەیسەر و سەردار | |
| میران و شەهانێ کە لەسەر ئەم ئەرزە ئەژیان | کوردانی نەوەی من بوون لەسەر کورسیی دەوران |
| لەو بەحری ڕەشە بگرە هەتا خاکی خۆزستان | بێ غیرەتیان ئاخری گشت دەرچوو لە دەستیان |
| ئێستە کە زەلیل، زار و زەبوون غەمگین و لێو بەبار | |
| ئەو وەختە کە من بیرەوەری دایکی وەتەن بووم | فەرماندەری دەور خانمی سەر موڵکی خوتەن بووم |
| کەس ناوی نەبوو غەیری نەژادی من و من بووم | بەخوا ئیتر موستەحەقی دەفن و کەفەن بووم |
| ئێستەم کە ئەبینی شەو و ڕۆژ عاجز و بێزار | |
| هەر ڕۆڵەیی من بوون لە جیهانا هەموو پێشڕەو | دائیم لە حەشەمدا وەکوو شاهی کەی و خوسرەو |
| ئێستە کە هەموو خادمی دەرگاهی ئەم و ئەو | برسی و ڕەش و ڕووت، بێ خەبەر و چاوی پڕی خەو |
| بەو نەوعە ئەبن بۆ گەلی بێچارە مەدەدکار | |
| عیبرەت بکە بیبینە وەرە دایکی دراوسێم | داپۆشراوە ئەندامی سەراپا لە زەڕ و سیم |
| ئەمجا وەرە بنواڕە منیش ڕووتم و برسیم | ئەیزانی کە چی بووم و ئەمێستاکە کە من چیم |
| ئەولادی ئەوان بوون هەموو سالار و بە سەردار | |
| غەیر من نەوەکەم گشتی لەبەر بوخل و حەسادەت | خاڵی لە وەفا، دوو ڕووییان بۆتە عیبادەت |
| دەستی تەمەع و تەبنیان لێ بووە عادەت | ژێر دەست ئەکەون دەرچوو لەدەست حوکمی سیادەت |
| بەسیە کوڕەکانم ببنە دارێکی بەردار | |
| بۆ خاتری خوا بەسیە لەمەو لاوە حەزەر کەن | ئەم تەوسییەیی دایکی خۆتان نەختێ لە بەر کەن |
| زوو هیممەتێ ئەم خاکە لە بێگانە بە دەر کەن | ئەی ڕۆڵە کڵاوی ئەبەدی مەردی لەسەر کەن |
| ڕۆڵە وەرە غیرەت کە خێرا من بکە ڕزگار | |
| ئەی ڕۆڵە ئەمە غیرەتە من لێوە ئەبینم | سەرپۆشی سەرم بۆتە سەما فەرشە زەمینم |
| زوو کە وەرە ناو هەڵمەتی مەردانە ببینم | سەرکەوتنی خۆتان و گەلان تاکوو ئەمێنم |
| غیرەت بکەن و دەس بدەن و بێنەوە بەرکار | |
This work is first published in Iraq and is now in the public domain because its copyright protection has expired by virtue of the Law No. 3 of 1971 on Copyright, amended 2004 by Order No. 83, Amendment to the Copyright Law. The work meets one of the following criteria:
- It is an anonymous work or pseudonymous work and 50 years have passed since the year of its publication
- It is a work where the copyright holder is a legal entity or a work of applied art and 50 years have passed since the year of its publication
- It is a photographic or cinematic work that is not compositive (artistic in nature) first published before 1 January 1999
- It is work published in Iraq before 1 January 1954, and the author died before 1 January 1979
- It is another kind of work, and 50 years have passed since the year of death of the author (or last-surviving author)
- It is one of "collections of official documents, such as texts of international laws, regulations and agreements, judicial judgements and various official documents."
- It is the work of a body corporate, public or private, published by January 1st, 1980 (Article 20, 1971 law).
Public domainPublic domainfalsefalse