دریای محیط
| دریای محیط یازار: عمادالدین نسیمی |
دریای محیط جوشه گلدی
کانیله مکان خروشه گلدی
سر ازل اولدی آشکارا
عارف نئجه ایله سین مدارا
هر ذرّه گونشدن اولدی ظاهر
توپراغه سجود قیلدی طاهر
نقاش بیلیندی نقش ایچینده
لعل اولدی روان بدخش ایچینده
آجی سو شراب کوثر اولدی
هر زهر نبات شکر اولدی
کلی یئر و گوی حق اولدی مطلق
سؤیلر دف و چنگ و نی اناالحق
معشوقیله عاشق اولدی بیر ذات
محو اولدی وجود نفی و اثبات
هر قطره محیط اعظم اولدی
هر ذره مسیح مریم اولدی
داش و کسک اولدی ورد نسرین
فرهاد ایله خسرو اولدی شیرین
تریاک مزاجی توتدی آغو
لؤلؤ مدور اولدی دارو
مسجود ایله ساجد اولدی واحد
مسجود حقیقی اولدی ساجد
ایمانیله کفر بیر شی اولدی
تاتلی ایله آجی بیر می اولدی
شرکت آرادان گتوردی وحدت
وحدت دن آچیلدی باب رحمت
جانیله تن اولدی بیر حقیقت
برکیتدی شریعت و طریقت
اشیا ایکی لیکدن اولدی خالی
باقی احد اولدی لایزالی
ای طالب اگر دگیلسن اعما
گؤر وعده کل من علیها
رفع اولدی حجاب ماسوی الله
القدرت و البقا لله
غیر اولدی هلاک وجه قالدی
محو اولدی بو بحره کیم کی دالدی
چون مومنه مومن اولدی مرآت
مراتینا باخ اوندا گؤر ذات
گؤرسن سنی کی نه جسم وجانسان
مقصودزمین وآسمان سان
آدمده تجلی قیلدی الله
قیل آدمه سجده اولما گمراه
شیطان لعینه اویما زینهار
اونون سؤزونه اینانما ای یار
اویخودان اویان کی محشر اولدی
گؤر نئجه زمانه پر شر اولدی
چالیندی قیامتین نفیری
ای ساغر ائشیتمدین صفیری
مشرکدن ائدر موحدی فرق
ای وای اونا کی ایشی اولا زرق
هم خاتم الینده اولا فرمان
یعنی کی منم بوگون سلیمان
موسی منم اول عصا الیمده
حقدن ازلی قیلینج بئلیمده
فضل ایستریسن حقیقته وار
سعی ایله بو ایشده قالما زینهار
سؤیلر بو کیتابتی نسیمی
من سر کلام حق نعیمی
الحق بو نسیمی آیتیندن.
گل اوخو بوگون نهایتیندن
الفاظ نسیمی گؤرنه جاندور
دریای محیط بحر کاندور
بو بحره دالیپ دور “نسیمی”
یعنی کی ندیر زریله سیمی.